ކުރީގެ ރައީސް އަބްދުﷲ ޔާމީންގެ ވެރިކަމުގައި ހިއްކި ހުޅުމާލެ ދެވަނަ ފިޔަވަހިން ބޮޑު ސަރަހައްދެއް އޮތީ "އަތް ނުލާ" ކަމަށާއި އެ ތަން ތަރައްގީކޮށްގެން ރާއްޖެ އަށް މާ ފައިދާ ބޮޑުވާނެ ކަމަށް އަންނަ ޖެނުއަރީ މަހު މާލޭގެ މޭޔަރަކު ކަނޑައެޅުމަށް ބާއްވާ ބައި އިލެކްޝަންގައި ވާދަކުރައްވާ ކުރީގެ ޕޮލިސް ކޮމިޝަނަރު ހުސެއިން ވަހީދު ވިދާޅުވެއްޖެއެވެ.
ޕީޕަލްސް ނެޝަނަލް ފްރަންޓް (ޕީއެންއެފް) އިން ރޭ އެ ޕާޓީގެ އޮފީހުގައި ބޭއްވި ޖަލްސާގައި ހުސެއިން ވަހީދު ވިދާޅުވީ ހުޅުމާލެ ދެވަނަ ފިޔަވަހިން ރައްޔިތުންނަށް ގޯއްޗާއި ފްލެޓު ދެވޭނެ ޖާގަ އެބަހުރި ކަމަށެވެ. އަދި އެ ތަނުގައި ބޭނުންކޮށްފައި ވަނީ އެންމެ 10 ވަރަކަށް ޕަސަންޓު ކަމަށް ވެސް އޭނާ ވިދާޅުވިއެވެ.
"ގާތްގަނޑަކަށް ބުނާ ނަމަ، ހުޅުމާލޭގެ ދެވަނަ ފޭސްގެ ކުޑަކުޑަ ސަރަހައްދެއްގައި، 10 ވަރަކަށް ޕަސަންޓު ކަން ނޭނގެ މިހާރު ބޭނުން ކުރެވެމުން މިދަނީ. ބާކީ 80 ޕަސަންޓު ނޫނީ 90 ޕަސަންޓު މިއޮތީ އަތް ނުލާ. ބޭނުން ކުރައްވަންވީ ނޫންތޯ؟ ރައްޔިތުން ދެކެ ތިހާ ލޯބިވަންޏާ އަޅާ ދޭން ވީނުންތޯ ފްލެޓުތަކާއި ގޯތިތަކާ؟" ހުސެއިން ވަހީދު ވިދާޅުވިއެވެ.
ހުސެއިން ވަހީދު ވަނީ ފުށިދިއްގަރުފަޅު ހިއްކަން ހަވާލު ކުރި ސްރީ ލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އަށް 70 ހެކްޓަރު ދޭން ނިންމުމާ ގުޅިގެން އެކަމަށް ފާޑު ވިދާޅުވެފައެވެ. ސަރުކާރުން ބުނި ގޮތުގައި ސީއެމްސީ އަށް ދީފައި ވަނީ ހުޅުމާލެ އިން 10 ހެކްޓަރާއި ފުށިދިއްގަރުފަޅުން 60 ހެކްޓަރެވެ.
ހުސެއިން ވަހީދު ވިދާޅުވި ގޮތުގައި އެއީ 2،500 އަކަފޫޓޫގެ ގޯއްޗަކުން މިނޭ ކަމަށް ވާ ނަމަ، 3،500 ގޯތީގެ ޖާގައެވެ. އެހެންވެ، ތަނެއް ހިއްކުމަށް ވުރެ، މިހާރު ހިއްކާފައިވާ ހުޅުމާލެ ދެވަނަ ފިޔަވަހި ތަރައްގީ ކުރުން މާ ރަނގަޅުވާނެ ކަމަށް ހުސެއިން ވަހީދު ވިދާޅުވިއެވެ.
ފުށިދިއްގަރު ފަޅު ހިއްކަން ފެށީމިމަހުގެ 18 ވަނަ ދުވަހުއެވެ. ފުށިދިއްގަރުން 1،153 ހެކްޓަރުގެ ބިމެއް ހިއްކުމެއް ހަމަޖެހިފައިވެއެވެ.
މި މަޝްރޫޢުގެ އީއައިއޭ ރިޕޯޓުގައި ވާގޮތުން، ފުށިދިއްގަރު ފަޅު ހިއްކުމުގެ މަޝްރޫއު ކުރިއަށްގެންދާނީ ބާރަ ސައިޓަކަށް ބަހާލައިގެންނެވެ. އެއީ 'ސައިޓް އޭ' އިން ފެށިގެން 'ސައިޓް އެލް' އަށެވެ. އަދި އެ ސައިޓުތަކުގެ ތެރެއިން ފަށާފައިވަނީ 'ސައިޓް ޖޭ’ގެ 29 ހެކްޓަރު ހިއްކުމުގެ މަސައްކަތެވެ. މިއީ މުޅި މަޝްރޫއުގެ ނިސްބަތުން ބަލާ ނަމަ، ހިއްކަން ކަނޑައަޅާފައިވާ ބިމުގެ %2.9 އެވެ. އީއައިއޭގައި ފާހަގަ ކޮށްފައިވާ 29 ހެކްޓަރުގެ އެ ބިމަކީ، މަޝްރޫއުގެ މަސައްކަތަށް ބޭނުންވާ ވޯކް ސައިޓަކަށް ބޭނުންކުރަން ނިންމާފައިވާ ސަރަހައްދެވެ.
