މާލެ ސާފުތާހިރުކޮށް ބޭއްވުމަކީ މާލޭ ހުރިހާ ރައްޔިތުންގެވެސް އެދުމެއް ކަމަށާއި، މާލޭ މޭޔަރުކަމަށް އިންތިޚާބު ވެއްޖެނަމަ، 6 މަސްދުވަހުގެ ތެރޭގައި ބުޅަލުގެ ޕާކެއް ހަދާދީ، މާލޭގެ އެކި ސަރަހައްދުތަކުގައި ތިބި ބުޅާތައް އެ ޕާކަށް ބަދަލުކޮށް ދޭނެކަމުގައި އެމްޑީޕީގެ ޓިކެޓުގައި މާލޭ މޭޔަކަމަށް ވާދަކުރައްވާ އެމްޓީސީސީގެ ކުރީގެ ސީއީއޯ އާދަމް އާޒިމް ވިދާޅުވެއްޖެއެވެ.
އާދަމް އާޒިމް މިހެން ވިދާޅުވީ މާލެ ސިޓީ ކައުންސިލް ބައި-އިލެކްޝަން 2024ގެ އެމް.ޑީ.ޕީ ފެހި ތަނަވަސް މާލެ މެނިފެސްޓޯ ލޯންޗުކުރުމަށް ރޭ ބޭއްވި އިވެންޓުގައި ވާހަކަ ދައްކަވަމުންނެވެ.
ރޭގެ އިވެންޓުގައި ވާހަކަ ދައްކަވަމުން އާޒިމް ވިދާޅުވީ މާލޭގަ ގާއިމްކުރާ "ޕެޓް ޕާކު"ގައި ޕެޓްގެ ޚިދުމަތްތައް ލިބޭގޮތް ހަމަޖައްސާ އެތަނަކީ ހިތްފަސޭހަ ތަނަކަށް ހަދާދޭނެ ކަމުގައެވެ. އާޒިމް ވިދާޅުވީ މާލެ ހިތްފަސޭހަ ތަނަކަށް ހަދާދެނީ މާލޭގަ އުޅޭ މީހުންނަށް އެކަނި ނޫން ކަމަށާއި، މާލޭގަ އުޅޭ ބުޅާތަކަށްވެސް މާލެއަކީ ހިތްފަސޭހަ ތަނަކަށް ހަދާދޭނެ ކަމުގައެވެ.
އަޅުގަޑުމެން އަބަޖެހޭ އެކަން ކުރަން. އެހެން ނޫނިއްޔާ އަޅުގަޑުމެންނަކަށް އެކަކު އަނެކަކުދެކެ ލޯބިވާކަށް ދަހެއް ނުކޮށްދެވޭނެ. މިގައުމުގައި ވަރަށް މުހިންމުކަމެއް އެކަކު އަނެކަކުދެކެ ލޯބިވާ އޯގާތެރި މުޖުތަމައެއް ބިނާކުރަން މަސައްކަތް ކުރުމަކީ.
އާޒިމް ވިދާޅުވިއެވެ.
ބުރާސްފަތި ދުވަހުގެ ރޭ ބޭއްވި ރަސްމިއްޔާތެއްގައި އެ މެނިފެސްޓޯގެ ތަފްސީލްތައް ހިއްސާކޮށްދެއްވީ އެމްޑީޕީގެ މާލެސިޓީ މޭޔަރ ކެނޑިޑޭޓް އަދި އެމްޓީސީސީގެ ކުރީގެ ސީއީއޯ އާދަމް އާޒިމެވެ.
ފެހި ތަނަވަސް މާލެ މެނިފެސްޓޯގެ ތެރޭގައި ޖުމްލަ 5 ކަމެއް ހާމަކުރައްވާފައިވާއިރު އޭގެ ތެރޭގައި ޒުވާނުންނާއި ގުޅުން ހުރި ކަންކަމާއި އިޖްތިމައީކަންކަން އަދި އިދާރީ ކަންކަން ވެސް ހިމެނެއެވެ.
