ތުރުކީވިލާތުގެ ސްކޮލަރޝިޕްގެ 30 ފުރުސަތަށް ކުރިމަތިލާން ހުޅުވާލައިފިއެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ތުރުކީއޭއަށް ކުރެއްވި ރަސްމީ ދަތިރުފުޅުގައި ތުރުކީއޭގެ "ޕްރެސިޑެންޓް ފޮރ ޓަރކްސް އަބްރޯޑް އެންޑް ރިލޭޓްޑް ކޮމިއުނިޓީސް އޮފް ދަ ރިޕަބްލިކް އޮފް ތުރުކިއޭ" މރ. އަބްދުﷲ އެރެން އާއެކު ބޭއްވެވި ބައްދަލުމުމަށްފަހު ދިވެހިރާއްޖެއަށް ތުރިކީއޭއިން ދެމުންދާ ސްކޮލަރޝިޕްތަކުގެ އަދަދު ވަނީ 30 ޖާގައަށް އިތުރުކޮށްދެއްވާފައެވެ. އެހެންކަމުން މި ސްކޮލަރޝިޕްތަކަށް އެޕްލިކޭޝަން ހުށަހެޅުމުގެ ފުރުސަތު ދިވެހި ދަރިވަރުންނަށް މިހާރު ވަނީ މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓުން ހުޅުވާލާފައެވެ.
މި ސްކޮލަރޝިޕް ޕްރޮގްރާމްގެ ދަށުން ޓްރޭނިންގ ނީޑްސް ލިސްޓަގައިވާ އެކިއެކި ދާއިރާތަކުން 15 ބެޗްލަރސް ޑިގްރީ، 10 މާސްޓަރ ޑިގްރީ އަދި 5 ޑޮކްޓޯރަލް ޑިގްރީ އަށް އެޕްލިކޭޝަން ހުށަހެޅުމުގެ ފުރުސަތު އެވަނީ ހުޅުވިފައެވެ. ސްކޮލަރޝިޕްގައި ކިޔެވުމުގެ ހުރިހާ ޚަރަދެއް (ޓިއުޝަން ފީ، މެޑިކަލް އިންޝުރެންސް، ދެކޮޅު ޓިކެޓް، އެކޮމޮޑޭޝަން އަދި ސްޓައިޕެންޑް) ހަމަޖައްސާނީ ކޯސް އިންތިޒާމް ކުރާ ފަރާތުންނެވެ. އަދި ފައިނަލް ސިލެކްޝަން ހެދުމަށް ހަމަޖެހިފައިވަނީ ވެސް ކޯސް އިންތިޒާމް ކުރާ ފަރާތުންނެވެ. މިގޮތުން ލިބޭ ޚަރަދުތަކާއި އެހެނިހެން މައުލޫމާތު މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓްގެ އިޢުލާންނާއި، ވެބްސައިޓާއި، ޓަރކިޔޭ ވެބްސައިޓުގައި ހިމެނިފައިވާނެކަމަށް ހަޔަރ އެޑިއުކޭޝަން މިނިސްޓްރީން ބުންޏެވެ.
މި ސްކޮލަޝިޕްއަށް ޝައުޤުވެރިވާ ފަރާތަކުން 7 ޖަނަވަރީ 2024 ވާ އާދިއްތަ ދުވަހުގެ 13:30 އާ ހަމައަށް "މައިއެޑިޔު" ޕޯޓަލް މެދުވެރިކޮށް އެޕްލިކޭޝަން ހުށަހެޅުއްވޭނެއެވެ. އެޕްލިކޭޝަން ހުށަހެޅުމުގެ މުއްދަތު ހަމަވުމުން، އެޕްލިކޭޝަންތައް ވަޒަންކޮށް، ނަތީޖާ އާންމުކޮށް އިޢުލާން ކުރާނީ މިނިސްޓްރީ އޮފް ހަޔަރ އެޑިޔުކޭޝަން، ލޭބަރ އެންޑް ސްކިލްސް ޑިވެލޮޕްމަންޓްގެ ވެބްސައިޓުގައެވެ.
