ސަންގު ޓީވީގެ ބަހުސްގައި ބައިވެރި ނުވާން ނިންމާފައިވާކަމަށް، އެމްޑީޕީގެ ޓިކެޓްގައި މާލޭ ސިޓީގެ މޭޔަރުކަމަށް ވާދަކުރައްވާ އާދަމް އާޒިމް ވިދާޅުވެއްޖެއެވެ.
އާދަމް އާޒިމް މިއަދު ކުރެއްވި ޓުވީޓެއްގައި ވިދާޅުވެފައިވަނީ ސަންގު ޓިވީއިން އިންތިޒާމްކޮށްގެން ބޭއްވުމަށް ހަމަޖައްސާފައިވާ ބަހުސްގައި އަޅުގަނޑު ބައިވެރިނުވާނެ އެފަރާތަށް މީގެ ދެދުވަސްކުރިން އަންގާފައިވާނެ ކަމަށެވެ.
އާޒިމް އޭގެ ސަބަބެއްކަމަށް ވިދާޅުވީ، ސަންގުޓީވީ ބަހުސް މިނިވަން ކަމާއެކު ކުރިއަށް ގެންދިއުމަށް މިނިވަން މޮޑާރޭޓަރެއް ބަހައްޓައިދިނުމަށް އޭނާ އެދިފައިވުމާއެކުވެސް އެކަމަށް އެއްވެސް އިޖާބައެއް ނުލިބުމުން ކަމުގައެވެ. އަދި އިންތިޚާބު އޮންނަދުވަސް މިހާ ކުޑަތަންވެފައިވަނިކޮށް ހަތަރު ދުވަހަށް ދިގުދެމިގެންދާ ބަހުސެއްގައި ބައިވެރިވުމަކީ ކެންޕޭނުގައި ދެންކުރަން ހުންނަކަންތައްތަކަށް އަސަރުކުރާކަނެކަމަކަށްވާތީ ކަމަށްވެސް އާޒިން ވިދާޅުވިއެވެ.
އޭގެ އިތުރަށް އާޒިމް ވިދާޅުވީ، މިހާރުވެސް ޕީއެސްއެމްއިން 6 ޖެނުއަރީ 2024 ގައި ބޭއްވުމަށް އިންތިޒާމްކުރާ އެއް އިވެންޓުގެ ބަހުސަށް ފޮނުވި ދައުވަތު ޤަބޫލުކޮށްފައިވާނެ ކަމަށެވެ.
މާލޭގެ މޭޔަރުގެ ގޮނޑި ހުސްވީ އެ މަގާމުގައި ކުރިން ހުންނެވި ޑރ. މުހައްމަދު މުއިއްޒު ރިޔާސީ އިންތިހާބުގައި ވާދަކުރައްވައި ހޯއްދެވި ކާމިޔާބީއާ އެކުގައި މިދިޔަ މަހުގެ 17 ވަނަ ދުވަހު ރައީސުލްޖުމްހޫރިއްޔާ ކަމުގެ ހުވާ ކުރެއްވުމުންނެވެ. ރައީސް މުއިއްޒާ އެކުގައި ސަރުކާރުގެ އެކިއެކި މަގާމުތަކަށް ވަޑައިގަތުމަށް މާލެ ސިޓީ ކައުންސިލްގެ ތިން ކައުންސިލަރުން ވެސް އިސްތިއުފާ ދެއްވާފައިވެއެވެ.
މި ގޮނޑިތަކަށް ބޭފުޅުން އިންތިހާބު ކުރުން އޮންނާނީ އަންނަ ޖެނުއަރީ މަހުގެ 13 ވަނަ ދުވަހު ކަމަށް އިލެކްޝަންސް ކޮމިޝަން (އީސީ) އިން ބުންޏެވެ.
މާލޭގެ މޭޔަރު ކަމަށް ވާދަކުރައްވާނެ ބޭފުޅުންގެ ތެރޭގައި ދެން ހިމެނެނީ އެމްޑީޕީގެ ޓިކެޓުގައި އެމްޓީސީސީގެ ކުރީގެ ސީއީއޯ އާދަމް އާޒިމްއާއި، މިހާރު މާލޭ ސިޓީ ކައުންސިލްގެ ގަލޮޅު އުތުރު ދާއިރާގެ ކައުންސިލަރު މުހައްމަދު ސައިފް ފާތިހު އާއި ކުރީގެ ޕޮލިސް ކޮމިޝަނަރު ހުސައިން ވަހީދުގެ އިތުރުން މިނިވަން މެމްބަރެއްގެ ގޮތުގައި ފުރަހަނި ޝުއައިބުއެވެ.
