ރައްޔިތުން ވެރިއަކު ހޮވަނީ، ޖެހިގެން އަންނަ ދުވަހު ދައުރު ހަމަވާ މަޖިލީހުން ވެރިކަން ވައްޓާލާކަށް ނޫންކަމަށް ދީނީ ޢިމްލުވެރިޔާ ޝައިޚް ޢަލީ ޒައިދު ވިދާޅުވެއްޖެއެވެ.

އެމްޑީޕީގެ އަޣްލަބިއްޔަތު އޮތް މަޖިލީހުން އެ މެންބަރުންނަށް ރައީސާއި ނައިބު ރައީސް އަޒުލްކުރެވޭގޮތަށް ގެނައި އިޞްލާހަށް ގިނަ ބަޔަކު އަންނަނީ ފާޑުކިޔަމުންނެވެ. ޝައިޚް ޒައިދު ވިދާޅުވީ، މަޖިލީހުން ބަޣާވާތެއް ގެނެސް، އެމް.ޑީ.ޕީ މެންބަރުން ރައްޔިތުންގެ އިޙްސާސްތަކުގައި ކޮޅިފައިން ނުޖަހާނެކަމަށް އުންމީދުކުރާކަމަށެވެ. 5 އަހަރުން އެއްފަހަރު ހުރިހާ ރައްޔިތުން ނުކުމެ ވެރިޔަކު ހޮވަނީ ޖެހިގެން އަންނަދުވަހު، ދައުރު ހަމަވާން ގާތްވެފައިވާ މަޖިލިސްއަކުން ބައެއް ބާރުތައް ނަހަމަގޮތުގައި ހިފައި، ވެރިކަން ވައްޓާލާކަށްނޫންކަމަށްވެސް ޒައިދު ވިދާޅުވިއެވެ.

މިހާރުވެސް ވަރަށް ބޮޑެތި ހެޔޮބަދަލުތައް ޑރ.މުޢިއްޒު ގެންނަވައިފި! ބަލައިގަންނަންޖެހޭ.

– ޝައިޚް ޒައިދު ވިދާޅުވިއެވެ.

ރައީސް އާއި ނައިބު ރައީސް މަގާމުން ވަކިކުރުން ކުރިޔަށް ގެންދާނެ ގޮތް ރައްޔިތުންގެ މަޖިލިހުގެ އިންތިޚާބުގައި މިހާރު ބަޔާންކޮށްފައި ވަނީ މިހާރު ހިނގަމުންދާ 19 ވަނަ މަޖިލީހުން އެކުލަވާލާ ފާސްކޮށްފައިވާ ގަވާއިދުގެ 41 ވަނަ ބާބުގަ އެވެ.

ރައީސް ނާއިބު ރައީސް މަގާމުން އަޒުލްކުރާ ބާބުގެ މާއްދާތަކަށް ބަދަލު ގެންނަން އާންމު ކޮމިޓީއަށް ހުށަހެޅުއްވީ ދަ ޑިމޮކްރެޓްސްގެ ޕާލިމެންޓަރީ ގްރޫޕުގެ ލީޑަރު، މެދުހެންވޭރު ދާއިރާގެ މެންބަރު އަލީ އާޒިމެވެ. އަލީ އާޒިމްގެ ހުށަހެޅުން ކޮމިޓީން މިހާރު ވަނީ ފާސްވެސް ކޮށްފަ އެވެ.

މިހާރު ބެލެވޭ ގޮތުގައި މި އިސްލާހު ރައްޔިތުންގެ މަޖިލިހުގެ ތަޅުމަށް ފޮނުވައިގެން ތަޅުމުން ފާސް ކުރާނެއެވެ.

ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނާއިބު އަޒުލުކުރުމުގެ އުސޫލުތައް ކަނޑައަޅާ އުސޫލުތަކަށް ގެނައުމަށް ކޮމިޓީން ފާސްކޮށްފައިވާ އުސޫލުތަލުގެ ތެރޭގައި، ރައީސް އާއި ނައިބު ރައީސް އަޒުލުކުރުމުގެ ގަރާރެއް ހުށަހަޅައިފި ނަމަ މަޖިލީހުގެ ރައީސްގެ މޭޒުކޮޅުގައި މައްސަލަ ހުއްޓުވާފައި ބޭއްވިޔަ ނުދިނުމަށްޓަކައި، މުއްދަތުތަކެއްވެސް ވަނީ އެކަށައަޅާފައެވެ. އޭގެ ތެރޭގައި ހިމެނެނީ، ރައީސްއާއި ނާއިބު ރައީސް ވަކިކުރުމުގެ ގަރާރު ލިބޭތާ ދެ ދުވަސްތެރޭގައި ނޯޓިސް ފޮނުވަން ލާޒިމް ކުރުމުގެ އިތުރުން، ނޯޓިހުގެ ތާރީހުން ފެށިގެން 14 ދުވަސް ދިނުމަށް ފަހު މައްސަލަ ކުރިއަށް ގެންދަން ޖަލްސާއެއް ބޭއްވުމަށް ލާޒިމް ކުރުން ހިމެނެއެވެ.

އޭގެ އިތުތުން އެފަދަ މައްސަލައެއްގެ ބަހުސްގެ ވަގުތަކީ ތިން ގަޑިއިރު ކަމަށް ކަނޑައަޅާ، ރައީސް ނުވަތަ ނައިބު ރައީސް އަށް ދިފާއުގައި ވާހަކަ ދައްކަވަން 30 މިނެޓު ކަނޑައެޅުންވެސް ހިމެނެއެވެ. ހަމަ އެއާއެކު، ތުހުމަތު ދިފާއުކުރެއްވުމަށްޓަކައި ގިނަވެގެން ތިން ވަކީލުން ގެންދިއުމުގެ ފުރުސަތު ރައީސް އާއި ނާއިބު ރައީސް ދޭންވެސް އިސްލާހުގައި ވަނީ ފުރުސަތު ދީފައެވެ.