އިންތިޚާބުތަކުން ބަލިވާނެކަން އެނގުމުން ސަރުކާރު ވައްތާލަން އުޅުމަކީ ބަލިވާކަމުގެ ނިޝާނެއްކަމަށް މާލެ ސިޓީގެ މޭޔަރުކަމަށް ޕީއެންސީގެ ޓިކެޓުގައި ވާދަކުރައްވާ އާއިޝަތު އާޒިމާ ޝަކޫރު ވިދާޅުވެއްޖެއެވެ.

އާޒިމާ މިހެން ވިދާޅުވީ، ރައީސާއި ނައިބު ރައީސް އަޒުލުކުރުމަށް މަޖިލީހުން ގެނައި އިޞްލާހާއި ގުޅިގެންނެވެ.

މާލެ ސިޓީގެ މޭޔަރު ކެމްޕެއިން ފޯރީގައި ކުރިއަށް ދާއިރު، ވާދަވެރިން ކަންބޮޑު މި އިންތިޚާބުގައި ޢާޒިމާއާއި އެމްޑީޕީން ވާދަކުރައްވަނީ، އެމްޓީސީސީގެ ކުރީގެ ސީއީއޯ އާދަމް ޢާޒިމެވެ.

އާޒިމް ވިދާޅުވީ، މޮޅުކަމަކީ ދަނޑުމަތީގައި މޮޅުވުންކަމަށެވެ.

ރައީސާއި ނައިބު ރައީސް މަޤާމުން ވަކިކުރެވޭނީ ރައްޔިތުންގެ މަޖިލީހުގެ ޖުމްލަ މެންބަރުންގެ ތިންބައިކުޅަ ދެބައި އަޣްލަބިއްޔަތުން އެކަނިކަމަށްވެސް ޢާޒިމާ ވިދާޅުވިއެވެ. އަޒުލްކުރުން އަދި އިތުބާރު ނެތްކަމުގެ ވޯޓުގެ ތަފާތު ނޭނގޭބަޔަކު، ދުސްތޫރު ބަދަލުކުރަން ހިފީމައި އެނގެނީ ޤާނޫނީ ވިސްނުމުގެ ބަލިކަށިކަންކަމަށްވެސް ޢާޒިމާ ވިދާޅުވިއެވެ.

ރައީސް އާއި ނައިބު ރައީސް މަގާމުން ވަކިކުރުން ކުރިޔަށް ގެންދާނެ ގޮތް ރައްޔިތުންގެ މަޖިލިހުގެ އިންތިޚާބުގައި މިހާރު ބަޔާންކޮށްފައި ވަނީ މިހާރު ހިނގަމުންދާ 19 ވަނަ މަޖިލީހުން އެކުލަވާލާ ފާސްކޮށްފައިވާ ގަވާއިދުގެ 41 ވަނަ ބާބުގަ އެވެ.

ރައީސް ނާއިބު ރައީސް މަގާމުން އަޒުލްކުރާ ބާބުގެ މާއްދާތަކަށް ބަދަލު ގެންނަން އާންމު ކޮމިޓީއަށް ހުށަހެޅުއްވީ ދަ ޑިމޮކްރެޓްސްގެ ޕާލިމެންޓަރީ ގްރޫޕުގެ ލީޑަރު، މެދުހެންވޭރު ދާއިރާގެ މެންބަރު އަލީ އާޒިމެވެ. އަލީ އާޒިމްގެ ހުށަހެޅުން ކޮމިޓީން މިހާރު ވަނީ ފާސްވެސް ކޮށްފަ އެވެ.

މިހާރު ބެލެވޭ ގޮތުގައި މި އިސްލާހު ރައްޔިތުންގެ މަޖިލިހުގެ ތަޅުމަށް ފޮނުވައިގެން ތަޅުމުން ފާސް ކުރާނެއެވެ.

ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނާއިބު އަޒުލުކުރުމުގެ އުސޫލުތައް ކަނޑައަޅާ އުސޫލުތަކަށް ގެނައުމަށް ކޮމިޓީން ފާސްކޮށްފައިވާ އުސޫލުތަލުގެ ތެރޭގައި، ރައީސް އާއި ނައިބު ރައީސް އަޒުލުކުރުމުގެ ގަރާރެއް ހުށަހަޅައިފި ނަމަ މަޖިލީހުގެ ރައީސްގެ މޭޒުކޮޅުގައި މައްސަލަ ހުއްޓުވާފައި ބޭއްވިޔަ ނުދިނުމަށްޓަކައި، މުއްދަތުތަކެއްވެސް ވަނީ އެކަށައަޅާފައެވެ. އޭގެ ތެރޭގައި ހިމެނެނީ، ރައީސްއާއި ނާއިބު ރައީސް ވަކިކުރުމުގެ ގަރާރު ލިބޭތާ ދެ ދުވަސްތެރޭގައި ނޯޓިސް ފޮނުވަން ލާޒިމް ކުރުމުގެ އިތުރުން، ނޯޓިހުގެ ތާރީހުން ފެށިގެން 14 ދުވަސް ދިނުމަށް ފަހު މައްސަލަ ކުރިއަށް ގެންދަން ޖަލްސާއެއް ބޭއްވުމަށް ލާޒިމް ކުރުން ހިމެނެއެވެ.

އޭގެ އިތުތުން އެފަދަ މައްސަލައެއްގެ ބަހުސްގެ ވަގުތަކީ ތިން ގަޑިއިރު ކަމަށް ކަނޑައަޅާ، ރައީސް ނުވަތަ ނައިބު ރައީސް އަށް ދިފާއުގައި ވާހަކަ ދައްކަވަން 30 މިނެޓު ކަނޑައެޅުންވެސް ހިމެނެއެވެ. ހަމަ އެއާއެކު، ތުހުމަތު ދިފާއުކުރެއްވުމަށްޓަކައި ގިނަވެގެން ތިން ވަކީލުން ގެންދިއުމުގެ ފުރުސަތު ރައީސް އާއި ނާއިބު ރައީސް ދޭންވެސް އިސްލާހުގައި ވަނީ ފުރުސަތު ދީފައެވެ.