އިދިކޮޅު އެންމެ ބޮޑު ޕާޓީ، އެމްޑީޕީން ރައީސް ޑރ. މުހައްމަދު މުއިއްޒުގެ އަނބިކަނބަލުން އަދި ފަސްޓްލޭޑީ ސާޖިދާ މުހައްމަދާ ފޮށެން އުޅުމަކީ ހަޑި ކަމެއް ކަމުގައި ރައްޔިތުންގެ މަޖިލިހުގެ މާފަންނު މެދު ދާއިރާގެ ދަ ޑިމޮކްރެޓްސް މެމްބަރު އިބްރާހިމް ރަޝީދު (ބޮންޑެ) މިއަދު ވިދާޅުވެއްޖެއެވެ.

ހެލްތު މިނިސްޓްރީގެ ދަށުން ހިންގާ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)ގެ ސީނިއާ ސައިންޓިފިކް އޮފިސަރުގެ މަގާމުގައި ދެމިހުރުމަށް ސިވިލް ސާވިސް ކޮމިޝަން (ސީއެސްސީ) އާ އެކު ސާޖިދާ ހެދި ކޮންޓްރެކްޓު ބާތިލް ކުރަން ގޮވާލައި މަޖިލިހަށް މިއަދު ވަނީ ކުއްލި މައްސަލައެއް ހުށަހަޅައިފައެވެ.

އެ މައްސަލަ އަށް ބަހުސް ކުރައްވަމުން ބޮންޑެ ވިދާޅުވީ އެމްޑީޕީން މިދިޔަ ފަސް އަހަރު ކުރި ކަމަކީ ކުރީގެ ރައީސް މުހައްމަދު ނަޝީދުއާ ދިމާކޮށް ފޮށި، ފުރައްސާރަ ކުރުން ކަމަށެވެ. ނަޝީދު މިހާރު ސިޔާސީ މައިދާނުގައި ނެތުމުން މިހާރު އެމްޑީޕީން ކުރާ ކަމަކީ އަންހެނަކާ ފޮށުން ކަމަށް ބޮންޑެ ވިދާޅުވިއެވެ.

ބޮންޑެ ވިދާޅުވި ގޮތުގައި މި ގައުމުގައި ވަރަށް ގިނަ މައްސަލަތައް އެބަހުއްޓެވެ. ގައުމުގައި ހުރި މައްސަލަތައް ހައްލުނުކޮށް އަންހެން ބޭފުޅަކާ މެދުގައި ފޮށެން އެމްޑީޕީން މަސައްކަތް ފެށުމަކީ ކުރެއްވި ހަޑި ކަމެކެވެ.

"މިފަދަ ބޮޑެތި ޖިނާއީ ކުށްތައް ނުބަލައި އަންހެނަކާ ފޮށެން ހެނދުނު ދަޅައިގައި އިރުއެރި ތަނުން މިކަން ކުރީމަ މިއީ ހަޑި ކަމެއް. ހަޑި ހުތުރު ކަމެއް." ބޮންޑެ ވިދާޅުވިއެވެ.

ސާޖިދާއަކީ ވަރަށް މަސައްކަތް ކުރައްވާ ބޭފުޅެއް ކަން ފާހަގަ ކުރައްވައި ބޮންޑެ ވިދާޅުވީ ފުޑް އެންޑް ޑްރަގް އޮތޯރިޓީއާ ގުޅޭ ބިލެއް މަޖިލިހަށް ފޮނުއްވައިގެން އެއާ ގުޅޭ ވަރަށް ގިނަ މަސައްކަތްތައް ސާޖިދާ ކުރެއްވި ކަމަށެވެ. ހަމައެއް ލަމައެއް ނެތި ކާބޯތަކެތި ވިއްކާ މައްސަލައިގައި އެއަށް ރައްކާތެރިކަން ހޯދައި ދިނުމަށް ބިލެއް ފޮނުވައިގެން އެއަށް ލޮބީ ކުރައްވައިގެން ސާޖިދާ މަސައްކަތް ކުރައްވާތާ ތިން އަހަރުވެފައިވާ ކަމަށް ވެސް އޭނާ ވިދާޅުވިއެވެ.

އެހެންވެ، ބޮންޑެ ވިދާޅުވި ގޮތުގައި މިހާރު އެމްޑީޕީއަކީ ފަސާދައިގެ ޕާޓީއެކެވެ. އެމްޑީޕީ ރަނގަޅުވެގެން ނޫނީ ދެން ރައްޔިތުންގެ މަޖިލިހުގެ ގޮނޑިއެއް ވެސް ނުލިބޭނެ ކަމަށް ބޮންޑެ ވިދާޅުވިއެވެ.

"ރައްޔިތުންނަށް ކޮށްދޭން ޖެހޭ ކަންކަން ނުކޮށްދީ މިގޮތަށް ފުރައްސާރަ ކުރަން މަސައްކަތްކޮށްފިއްޔާ ދެން ގެއްލުވާލާނީ ހުރިހާ ގޮނޑިތަކެއް،" ބޮންޑެ ވިދާޅުވިއެވެ.

ސީނިއާ ސައިންޓިފިކް އޮފިސަރެއްގެ މަގާމުގައި ހުންނަވައިގެން ސާޖިދާ ޓެކްނިކަލް މުހިއްމު މަސައްކަތްތަކެއް އެތަނުގައި ކުރައްވަމުން ގެންދަވާއިރު، އޭނާއަކީ އެ ދާއިރާ އިން ކިޔަވާ ވިދާޅުވެ ހުންނެވި ހަމައެކަނި ބޭފުޅާއެވެ.

ފަސްޓްލޭޑީ ކަމަށް ވަޑައިގަތުމަށް ފަހު ސާޖިދާ ވަނީ ސީއެސްސީގެ ވަޒީފާއިން މުސާރަ ނުލިބޭ ގޮތަށް ހަތަރު އަހަރުގެ ޗުއްޓީއެއް ނަންގަވައިފައެވެ. ނަމަވެސް ހެލްތު މިނިސްޓްރީން ސާޖިދާގެ ފަންނީ އެހީތެރިކަން ބޭނުންވާ ކަމަށް އެންގުމުން ސީއެސްސީން ވަނީ ކޮންޓްރެކްޓް އުސޫލުން ވަޒީފާ އަދާކުރަން މި މަހުގެ ހަތް ވަނަ ދުވަހު އެއްބަސްވުމެއް ހަދައިފައެވެ.

ސީއެސްސީން ސާޖިދާއާއެކު ހެދި ކޮންޓްރެކްޓުގައިވާ ގޮތުން މަސައްކަތަށް ވަޑައިގަންނަވާ ކޮންމެ ގަޑިއިރަކަށް 75ރ. ގެ އެލަވަންސެއް ލިބޭނެއެވެ. އެއީ މަހަކު 40 ގަޑިއިރު މަސައްކަތްކުރާ ގޮތަށް ކަމަށްވާތީ މަހަކު ލިބިވަޑައިގަންނަވާނީ 3،000ރ. އެވެ. އެއީ މުސާރަ ނުލިބޭ ގޮތަށް އެފަދަ އެގްރިމެންޓެއް ނުހެދޭނެތީ މަސައްކަތަށް ނުކުންނަ ދުވަސްތަކަށް ދޭ މުސާރައެކެވެ.