މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގެ ޕަރމަނަންޓް ސެކްރެޓަރީ ޢަބްދުﷲ ފަޔާޒް ސަސްޕެންޑްކޮށްފިއެވެ.
ފަޔާޒު ސަސްޕެންޑްކޮށްފައިވާކަން ބަޔާންކޮށް ސިވިލް ސާރވިސް ކޮމިޝަނުން ނެރެފައިވާ ބަޔާނެއްގައި ވަނީ މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގެ ޕަރމަނަންޓް ސެކްރެޓަރީ ސަސްޕެންޑް ކޮށްފައިވަނީ އެކޮމިޝަނަށް ހުށައަޅާފައިވާ މައްސަލަތަކެއް ތަޙްޤީޤްކުރުމަށްކަމަށެވެ. އޭނާ ސަސްޕެންޑްކޮށްފައިވަނީ މުސާރަ ލިބޭގޮތަށް އެއްމަސްދުވަހުގެ މުއްދަތަކަށެވެ.
އެނގިފައިވާގޮތުގައި އޭނާ ސަސްޕެންޑްކޮށްފައިވަނީ ޝިޕިންގ އެޖެންސީގެ ޚިދުމަތް ދިނުމާއި ބެހޭ ގަވާއިދު ޓްރާންސްޕޯޓް މިނިސްޓްރީން އުވާލުމާއި ގުޅިގެން ބަލަމުންދާ މައްސަލަތަކެއްގައެވެ.
ޕަރމަނަންޓް ސެކްރެޓަރީންނަކީ، އެ މަގާމުގައި ތިއްބެވި ބޭފުޅުން ވަޒީފާ އަދާކުރާ މިނިސްޓަރުންގެ ދަށުން މިނިސްޓްރީ ހިންގައި ބެލެހެއްޓުމާއި، އެ މިނިސްޓްރީގެ މަސައްކަތްތަކާ ގުޅޭގޮތުން މިނިސްޓަރަށް ލަފާދީ އެހީތެރިވެދިނުމާއި، އެ މިނިސްޓްރީގެ ދާއިރާގެ ސިވިލް ސަރވިސްގެ މުވައްޒަފުންނާ ބެހޭ އެންމެހައި ކަންތައްތައް ހިންގާ ބެލެހެއްޓުމުގެ ޒިންމާ ޤާނޫނީ ގޮތުން ހަވާލުވެފައިވާ ބޭފުޅުންނެވެ.
އަބްދުﷲ ފަޔާޒަކީ ރައީސް ޔާމީން ސަރުކާރުގައި މިނިސްޓްރީ އޮފް ހައުސިންގް އެންޑް އިންފްރާސްޓްރަކްޗަރގެ ޑެޕިއުޓީ މިނިސްޓަރުގެ މަގާމު އަދާކުރެއްވި ބޭފުޅެކެވެ. އަދި ސިވިލް ސަރވިސް އިން މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގެ ޕާމަނަންޓް ސެކެރަޓަރީގެ މަގާމަށް އަބްދުﷲ ފަޔާޒް އައްޔަން ކޮށްފައިވަނީ އޭޕްރިލް 2019 ގައެވެ.
މައިގަނޑު 8 މައްސަލައެއްގެ މައްޗަށް ބިނާކޮށް މިނިސްޓްރީގެ މުވައްޒަފުން ހުށަހެޅި މައްސަލަތަކުގެ ތެރޭގައި ސިވިލް ސަރވިސްގެ ގަވާއިދާ ހިލާފަށް އަބްދުﷲ ފަޔާޒާއެކު ކުރިން ހައުސިންގ މިނިސްޓްރީގައި މަސައްކަތް ކުރި 5 ފަރާތަކަށް ވަޒީފާ ދިނުމާއި، ވަކި ފަރާތަކަށް ވަޒީފާ ހަމަޖެއްސުމުގެ ނިޔަތުގައި ވަޒީފާއަށް ކުރެވޭ އިއުލާންތަށް ބާތިލްކޮށް އަލުން އިއުލާންކުރުމާއި މަގާމުގެ ޝަރުތު ހަމަނުވާ ފަރާތެއް ގަވާއިދާ ހިލާފަށް ވަޒީފާގައި ގެންގުޅުމާއި، ތިއަރީ އިމްތިހާން ނުހަދައި ދޫކޮށްފައިވާ ލައިސަންސް ކާޑުތަކެއްގެ ލިޔެކިޔުންތަށް ނައްތާލުން ހިމެނެއެވެ.
ކޮމެންޓު ފޮނުވާ