ބިޑް ކުރުމުގެ ދައުވަތަކާއި ނުލާ ސަރުކާރަށް ޕްރޮޕޯޒަލް ހުށައެޅުމުގެ އުސޫލު ރައީސް މުއިއްޒު އުވާލައްވައިފިއެވެ.
މި އުސޫލު އުވާލިކަން ރައީސް އޮފީހުން ވަނީ ގެޒެޓް ކޮށްފައެވެ. އުސޫލު އުވަލާ ރައީސް އޮފީހުން ގެޒެޓްކުރި އިއުލާން ގައި ބުނެފައި ވަނީ މި އުސޫލަށް އަމަލު ކުރަން ފަށާނީ މި އުސޫލު ޝާއިއު ކުރާ ތާރީހުން ފެށިގެން ކަމަށެވެ.
ބިޑްކުރުމުގެ ދައުވަތަކާ ނުލައި ސަރުކާރަށް ޕްރޮޕޯޒަލް ހުށަހެޅުމުގެ އުސޫލަށް އަމަލުކުރަން ފަށާފައިވަނީ ޖެނުއަރީ 2019 ގައިއެވެ.
އޭރު ގެ ސަރުކާރުން ހަމަޖެއްސެވި އުސޫލަކީ މާލިއްޔަތު ގަވާއިދުގައި ބަޔާންކޮށްފައިވާ ގޮތުގެ މަތިން ބޭރު ގައުމެއްގެ އެހީގައި ހިންގާ ނުުވަތަ ކޮންސެޝަނަލް ލޯނެއްގެ ދަށުން ހިންގާ މަޝްރޫއުތަކާއި، ސަރުކާރުން ހިންގަން ކަނޑައަޅާ މަޝްރޫއެއް ހިންގުމަށް، ވަޒީރުންގެ މަޖިލީހުގެ ނުވަތަ ވަޒީރުންގެ މަޖިލީހުގެ ކޮމިޓީއެއްގެ މަޝްވަރާގެ މަތިން، ބިޑުކުރުމަކާ ނުލައި ރައީސުލްޖުމްހޫރިއްޔާ ކަނޑައަޅާ ފަރާތަކާ ހަވާލުކޮށްގެން އެ މަޝްރޫއެއް ކުރިޔަށް ގެންދެވޭނެ ކަމަށެވެ.
ރައީސް އޮފީހުން އޭރު ވިދާޅުވެފައިވަނީ އެ އުސޫލު ހަމަޖެއްސެވީ ދައުލަތުގެ މާލިއްޔަތު ގާނޫނާ އެއްގޮތްވާ ގޮތުގެމަތިން، ވިޔަފާރިއާއި ރައްޓެހި މާހައުލެއް ގާއިމްކުރުމުގެ މަގުސަދުގައި ކަމުގައެވެ.
އެހެންނަމަވެސް އެއީ ކޮރަޕްޝަނަށް މަގުފަހުވާ އުސޫލެއްކަމަށްބުނެ، މަދަނީ ޖަމިއްޔާތަކުންނާއި އަދި ރައްޔިތުންގެ މަޖިހުގެ މެމްބަރުންވެސް އެ އުސޫލާދެކޮޅަށް އަޑު އުފުލާފައި ވެއެވެ.
