ހުޅުމާލޭގެ ދެވަނަ ފިޔަވަހީގައި އަޅާފައިވާ ހިޔާ ފްލެޓެއްގައި ރޭ ހިންގި މާރާމާރީއާ ގުޅިގެން މީހަކު ހައްޔަރުކޮށްފިއެވެ.
ފުލުހުން ބުނީ އެ މައްސަލައިގައި ހައްޔަރު ކުރީ އުމުރުން 19 އަހަރުގެ ދިވެހި ފިރިހެނެއް ކަމަށެވެ. ތޫނު އެއްޗަކުން ހަމަލާ ދިނުމުގެ ސަބަބުން މި މާރާމާރީގައި ޒަހަމްވެފައިވަނީ 22 އަހަރުގެ ދިވެހި ފިރިހެނަކަށެވެ. އެމީހާ އަށް ހުޅުމާލެ ހޮސްޕިޓަލްގައި ދަނީ ފަރުވާދެމުންނެވެ.
ފުލުހުން ބުނީ މި މާރާމާރީއަކީ އާއިލާ ތެރޭގައި ޖެހުނު މައްސަލައެއްގައި ހިނގި މާރާމާރީއެއް ކަމަށެވެ. ވަޅިން ހަމަލާ ދީފައި ވަނީ ހިޔާގެ ހަ ވަނަ ޓަވަރުގެ އެޕާޓްމަންޓެއް ތެރޭގައެވެ.
ފަހަކަށް އައިސް މާލެ އާއި އައްޑޫގައި މާރާމާރީތައް ވަނީ ވަރަށް ބޮޑަށް އިތުރުވެފައެވެ. އެހެންވެ، ފުލުހުން ވަނީ ހާއްސަ ފިޔަވަޅުތަކެއް އަޅައިފައެވެ.
މާލޭގެ އޯކިޑް މަގު، ރޫޓު ފިހާރަ ކައިރީގައި ވެސް އިއްޔެ ދެ މީހެއްގެ ދެމެދުގައި މާރާމާރީއެއް ހިންގާފައިވެއެވެ. މި މާރާމާރީގައި އަނިޔާވި މީހާއަށް އައިޖީއެމްއެޗްގައި ފަރުވާދެމުން އަންނައިރު ފުލުހުން އަންނަނީ މި މައްސަލަ ވެސް ތަހުގީގު ކުރަމުންނެވެ.
މީގެ އިތުރުން އައްޑޫ ސިޓީގައި ހިންގި މާރާމާރީތަކާ ގުޅިގެން ފުލުހުން މިހާތަނަށް ވަނީ 10 މީހުން ހައްޔަރުކޮށްފައެވެ.
