އެމަނިކުފާނުގެ ސަރުކާރު ކޮރަޕްޓް ނުވެ ހިންގަވާނެ ކަމަށާއި އެފަދަ މައްސަލައެއް ފާހަގަވެއްޖެ ނަމަ، ފަސް ޖެހުމެއް ނެތި ފިޔަވަޅު އަޅުއްވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
ބައިނަލްއަގުވާމީ އެންޓި ކޮރަޕްޝަން ދުވަހުގެ މުނާސަބަތުގައި ބޭއްވި ޖަލްސާގައި ރައީސް މުއިއްޒު ވިދާޅުވީ އެމަނިކުފާނުގެ ސަރުކާރުގައި އެއްވެސް ފަރާތަކުން ކޮރަޕްޝަންގެ ނުވަތަ ހިޔާނާތުގެ އަމަލެއް ހިންގާކަން ސާބިތުވެއްޖެ ހާލަތެއްގައި އެ ފަރާތަކާ މެދުގައި އަޅަން ޖެހޭ ގާނޫނީ ފިޔަވަޅު ފަސް ޖެހުމެއް ނެތި އަޅުއްވާނެ ކަމަށެވެ.
"އެކަމުގައި އަޅުގަނޑުމެން އެއްވެސް ހިޔާލު ތަފާތުވުމެއް ނޯންނާނެ." ރައީސް ވިދާޅުވިއެވެ.
ރައީސް ވިދާޅުވީ ކޮރަޕްޝަނާ ގުޅޭ ގޮތުން ހޭލުންތެރިކަން އިތުރުކޮށް، ނަޒާހަތްތެރި މުޖުތަމައުއެއް ބިނާ ކުރުމަށް ކުރަން ހުރި ހުރިހާ މަސައްކަތެއްގައި އަދި އިލްމީ ފެންވަރެއްގައި މަސައްކަތްތައް ކުރިއަށް ގެންދަވާނެ ކަމަށެވެ.
ރައީސް ވިދާޅުވި ގޮތުގައި އެމަނިކުފާނުގެ ސަރުކާރުގެ ސިޔާސަތަކަށް ވާނީ ކޮރަޕްޝަނާ ދެކޮޅަށް ކުރެވޭ ކޮންމެ ކަމެއްގައި ސަރުކާރުގެ ފުރިހަމަ އެއްބާރުލުން ދިނުމެވެ. ރައީސް ވިދާޅުވީ ބޭރު މީހުންގެ އިތުބާރު ރާއްޖެއާ މެދުގައި އުފެދޭނީ ރީތި އަހުލާގެއް އަދި ތަހުޒީބު ދިރިއުޅުމަކުން ކަމަށެވެ.
ރާއްޖޭގެ ފަތުރުވެރިކަމާއި އެ ނޫން ވެސް ދާއިރާތަކަށް ބޭނުންވާ އިންވެސްޓްމަންޓުތައް ލިބޭނީ ބޭރު ދުނިޔޭގެ އިތުބާރު އާލާ ކުރެވިގެން ކަމަށާއި ކޮރަޕްޝަނާ ދެކޮޅަށް މަސައްކަތް ކުރުމަކީ ގައުމީ ކަމަކަށް ހަދަން ޖެހޭ ކަމަށް ވެސް އެމަނިކުފާނު ވިދާޅުވިއެވެ.
"އެއީ ދިވެހި ގައުމަށްޓަކައި ކުރާ ކަމަކަށް ވާން ޖެހޭ. ދިވެހިންގެ ސަލާމަތަށްޓަކައި ކުރެވޭ ކަމަކަށް ވާން ޖެހޭ. ދިވެހިންގެ ފުދުންތެރިކަމަށްޓަކައި ކުރެވޭ ކަމަކަށް ވާން ޖެހޭ. އަދި މި ފަހުރުވެރި ގައުމުގެ އަބުރާއި އިއްޒަތަށްޓަކައި ކުރެވޭ ކަމަކަށް އެކަން ވާން ޖެހޭ،" ރައީސް ވިދާޅުވިއެވެ.
ރައީސް މުއިއްޒު ވިދާޅުވި ގޮތުގައި ފެހި ގާނޫނުއަސާސީގެ ދަށުން 2007 ވަނަ އަހަރު އުފެއްދި އެންޓި ކޮރަޕްޝަން ކޮމިޝަން (އޭސީސީ) އިން މިހާތަނަށް އައިއިރު ގިނަ މަސައްކަތްތަކެއް ފުރިހަމަކޮށް، ގިނަ ކާމިޔާބީތަކެއް ހޯދާފައިވެއެވެ.
"ކޮރަޕްޝަން އުފަންވާ ހާއްޔަކީ ހުދު ގިރުވާން ކަމަށް ބުނެވޭ. ކޮރަޕްޝަންގެ ކުށަކީ ހުދު ގިރުވާނުލީ ގިންތީގެ ކުށެއް ކަމަށް ބުނެވޭ. އޭގެ މާނައަކީ ނަހަމަ ގޮތުގައި ނުފޫޒު ފޯރުވުމުގެ ކުށް ހިނގަނީ ސިޔާސީ ގޮތުންނާއި މާލީ ގޮތުން މަތީ ދަރަޖަ އަށް ދެވިފައިވާ މީހުންގެ މެދުގައި ކަމަށް ބުނެވޭ. އެހެންކަމުން މި ތަނުގައި ލިބޭ ފިލާވަަޅަކީ ގައުމުގެ އިޖުތިމާއީ، ސިޔާސީ ހަރުގަނޑުން ތިމާ އަށް މައްޗަށް އެރުނު ވަރަކަށް އަމާނާތްތެރިކަމާއި ތެދުވެރިކަމުގެ މަގަށް ބަލަން ފަރުވާތެރި ވާން ޖެހޭ ކަން،" ރައީސް ވިދާޅުވިއެވެ.
ރައީސް މުއިއްޒު ވިދާޅުވީ ކޮރަޕްޝަނަކީ ދިވެހިންނާއި ދިވެހިންގެ ރާއްޖެއާ ވަރަށް ބީރައްޓެހި އެއްޗެއް ކަމަށާއި ދިވެހި ތާރީހުގެ ފަތްފުތްތަކަށް ބަލާލުމުން މިކަމުގައި ވަރަށް ރީތި މިސާލުތަކެއް ފެންނަން އެބަހުރި ކަމަށެވެ.
