މަކަރާއި ހީލަތުން އެތައްބައެއްގެ އަތުން ފައިސާ ހޯދާފައިވާ މައްސަލާގައި ދައުވަ ކޮށްފައިވާ ސީލައިފް ގްލޯބަލް ޕްރައިވެޓް ލިމިޓެޑުގެ ވެރިޔާ އަޙްމަދު މޫސާ (އައްމަޓީ)، ބޭސް ފަރުވާއަށް ލަންކާއަށް ދިއުމުގެ ހުއްދަ ކުރިމިނަލް ކޯޓުން ދީފިއެވެ.
ކުރިމިނަލް ކޯޓުން ބުނެފައިވަނީ މީގެ ކުރިން އޭނާ ކޯޓަށް އެއްބާރުލުން ދީފައިވާތީ، އޭނާގެ ހުށަހެޅުންތައް ދިރާސާ ކުރުމަށްފަހު އޭނާގެ ފުރުން މަނާކުރުމަށް ނެރެފައިވާ އަމުރު ވަގުތީގޮތުން ސަސްޕެންޑް ކޮށްފައިވާ ކަމުގައެވެ.
ކޯޓުން ބުނެފައިވަނީ އޭނާގެ މައިބަދައިގެން އޮޕަރޭޝަނެއް ކުރުމަށް ޑޮކްޓަރުން ލަފާ ދީފައިވާކަން އެނގެން އޮންނަ އިރު، ޕާސްޕޯޓު ހިފެހެއްޓުމުގެ އަމުރު ބާތިލް ކުރުމަށް ބޭނުންވާ ލިޔެކިޔުންތައް އޭނާގެ ފަރާތުން ހުށަހަޅާފައިވާ ކަމުގައެވެ.
އައްމަޓީގެ ފަރާތުން އެދިފައިވަނީ އޭނާގެ އާއިލާ ވެސް ދިރިއުޅެމުން އަންނަނީ ލަންކާގައި ކަމަށްވާތީ، އާއިލާ ކައިރީގައި ހުރެ އެފަދަ އޮޕަރޭޝަނެއްކޮށް ފަރުވާ ހޯދުމުގެ ފުރުސަތެއް ފަހިކޮށްދިނުމަށެވެ.
އައްމަޓީގެ ޕާސްޕޯޓް ދޫކުރުމަށް ކޯޓުން ނިންމާފައިވަނީ މިމަހުގެ 26 ވަނަ ދުވަހާއި ހަމައަށެވެ.
ސީލައިފް ގްލޯބަލް އިންކް ޕްރައިވެޓް ލިމިޓެޑުގެ ވެރިޔާ އަޙްމަދު މޫސާ 2021 ވަނަ އަހަރު ލަންކާއިން ހައްޔަރުކޮށްގެން މާލެ ގެނެސް މައްސަލަ ތަހުޤީގުކުރުމަށްފަހު އޭނާގެ މައްޗަށް ޕްރޮސެކިއުޓަރ ޖެނެރަލްގެ އޮފީހުން ވަނީ ޚިޔާނާތުގެ 42 ދައުވާއެއް އުފުލާފައެވެ. މިއީ އޭނާ ޚިޔާނާތްތެރިވި ކޮންމެ މީހެއްގެ ދައުވާ ވަކިވަކިންނެވެ. އަޙްމަދު މޫސާގެ މައްޗަށް އުފުލާފައިވާ ދައުވާ ސާބިތުވެއްޖެނަމަ އޭނާގެ މައްޗަށް 65 އަހަރުގެ ޖަލު ހުކުމެއް އަންނާނެވެ.
