ވެރިކަންކުރާ ޕީޕީއެމް/ޕީއެންސީ ކޯލިޝަން އިސް ލީޑަރަކަށް ރައީސް މުއިއްޒު އައްޔަން ކޮށްފިއެވެ. އެމަނިކުފާނު އެ މަގާމަށް އައްޔަން ކޮށްފައިވަނީ ރޭ ބޭއްވުނު ޕްރޮގްރެސިވް ކޮންގްރެސް ކޯލިޝަންގެ ޖޮއިންޓް ސެނެޓްގެ 6 ވަނަ ބައްދަލުވުމުގައި ބައިވެރިވި 103 ސެނެޓަރުންގެ އިއްތިފާގުންނެވެ.
ރައީސް މުއިއްޒު ވެރިކަންކުރާ ކޯލިޝަންގެ އިސް ލީޑަރަކަށް ހަމަޖައްސަވާފައިވަނީ އެ މަގާމުގައި ކުރިން ހުންނެވި، ކުރީގެ ރައީސް ޔާމިން ޕީޕީއެމްގެ ރައީސްކަމުގެ މަގާމުން އިސްތިއުފާ ދެއްވާ އަދި ޕާޓީންވެސް ވަކިވެވަޑައިގެންފައިވާތީއެވެ.
ޕީޕީއެމް/ޕީއެންސީގެ އިސް ލީޑަރެއްގެ ގޮތުގައި މީގެކުރިން ހުންނަވާފައިވަނީ ރައީސް ޔާމިންއެވެ. އެއީ އެމަނިކުފާނު ޖަލުގައި ހުންނެވިވެނަަމަވެސް، ދެ ޕާޓީގެ ޖޮއިންޓު ސެނެޓުން އެކަން ފާސްކޮށްގެން އައްޔަން ކުރި މަގާމެކެވެ.
އެހެންނަމަވެސް، ޕީޕީއެމް ހިންގުމަށް ރައީސް ޔާމިން ކޮމިޓީއެއް އެކުލަވާލެއްވި މައްސަލާގައި ކޮމިޓީގެ ބޭފުޅުންނަށް ޕީޕީއެމްއިން ފިޔަވަޅު އަޅަން ފެށުމާއެކު ރައީސް ޔާމިންވަނީ ޕީޕީއެމްއިން ވަކިވެ އާ ޕާޓީއެއް އުފެއްދުމުގެ މަސައްކަތް ފައްޓަވާފައެވެ.
ޕީޕިއެމްއިން ވަކިވެވަޑައިގަތުމަށްފަހު ރައީސް ޔާމިން ވިދާޅުވެފައިވަނީ، އެޕާޓީ ދޫކޮށްލެއްވީ ލީޑާޝިޕް އެމަނިކުފާނާ ދުރަށް ވަޑައިގަތުމުންކަމަށެވެ. ނަމަވެސް ޕީޕީއެމް ލީޑާޝިޕު ބޭފުޅުން ވިދާޅުވީ ރައީސް ޔާމީން އެބޭފުޅުންނާއި ދުރަށް ވަޑައިގަތީކަމަށެވެ. އަދި ރައީސް ޔާމީންގެ އެ ނިންމެވުންތަކުގެ އިސް ފަރާތަކީ ޑރ. ޖަމީލް ކަމަށެވެ.
ރައީސް ޔާމިން އުފައްދަވާ ޕީއެންއެފް އުފެއްދުމުގެ ހުއްދަ އިލެކްޝަންސް ކޮމިޝަނުން ދޫކުރީ ފާއިތުވި ނޮވެމްބަރުމަހުގެ 29 ވަނަ ދުވަހުއެވެ. އެޕާޓީން މިހާރު ކުރަމުންދަނީ ޕާޓީ އުފެއްދުމަށް ބޭނުންވާ 3،000 ސޮއި ހަމަކުރުމުގެ މަސައްކަތްތަކެވެ.
ކޮމެންޓު ފޮނުވާ