އަފްއާނިސްތާންގެ ވެރިރަށް ކާބުލްއަށް މިއަދު ހެދުނު ދިން ރޮކެޓް ހަަލާތަކެއްގައި އެކަކު މަރުވެ އަތައްބަޔަކު ޒަޚަމް ވެއްޖެއެވެ.
ކާބުލްގެ ފުލުހުންގެ ފަރާތުން ޔަގީން ކޮށްދީފައިވާ ގޮތުގައި، މިހަމަލާތައް ދީފައިވަނީ މިއަދުގެ ހެދުނު ވަގުތެއްގައި، ވެރިރަށުގެ އިރުމަތީގެ ސަހަދަށެވެ.
"ވެރިރަށް ކާބުލްއަށް ދިން ރޮކެޓް ހަމަލާތަކެއްގައި، އެކަކު މަރުވެ، އެތައްބަޔަކު ވަނީ ޒަޚަމްވެފަ،" އިންޓީރިއަރ މިނިސްޓަރު ވިދާޅުވެފައެވެ. "މިއީ ފާއިތުވެ އެއްމަސްދުވަހުގެ ތެރޭގައި ވެރިރަށް ކާބުލްއަށް ދީފައިވާ މިފަދަ ދެވަނަ ހަމަލާ"އެވެ.
"4 ރޮކެޓް ހަމަލާ އައިސްފައިވަނީ، ކާބުލްގެ ލާބެ ޖާރު ސަރަހައްދުން،" އިންޓިރިއަރ މިނިސްޓްރީގެ ތަރުޖަމާން ތާރިގް އަރިއާން މީޑީއާތަކަށް މައުލޫމާތު ދެއްވަމުން ވިދާޅުވެފައެވެ. އޭނާ ވިދާޅުވި ގޮތުގައި 2 ރޮކެޓް ވެއްޓިފައިވަނީ، ކާބުލްގެ އެއަރޕޯޓާ ކައިރި ސަރަހައްދަކަށެވެ.
މިދިޔަ ނޮވެމްބަރު މަހުގެ 21 ވަނަ ދުވަހު، ކާބުލްއަށް ދީފައިވާ 23 ރޮކެޓް ހަމަލާއެއްގައި، 8 މީހަކު ވަނީ މަރާލާފައެވެ. މިހަމަލާގެ ޒިންމާ އުފުލާފައިވަނީ، އިސްލާމިކް ސްޓޭޓްގެ ޖަމާއަތުންވެ.
އެހެންނަމަވެސް، މިއަދު ކާބުލްއަށް މިދިން ރޮކެޓް ހަމަލާތަކުގެ ޒިންމާ ހަގުރާމަވެރި އެއްވެސް ޖަމާއަތަކުން އަދި އުފުލާފައެއް ނުވެއެވެ.
ކާބުލްގައި މިހާރު އޮތް، ބައިނަލް އަގުވާމީ ފަރާތްތަކުން ތާޢީދު ކުރާ ސަރުކާރާ ދެކޮޅަށް ހަގުރާމަ ކުރާ ތާލިބާލްގެ ހަގުރާމަވެރިން ބުނެފައިވާ ގޮތުގައި އެ ޖަމާއަތުގެ ހަގުރާމަވެރިން އެއްވެސް ބެލުމެއްނެތި އާންމުންނަށް ހަމަލައެއް ނުދޭނެއެވެ.
އަފްއާނިސްތާން ސަރުކާރާއި ތާލިބާނުން، ސުލްހައިގެ އެއްބަސްވުމެއްގެ ސޮއިކުރުމަށް ދާދިފަހުން ވަނީ އެއްބަސްވެފައެވެ.
މީޑިއާތަކުން ރިޕޯޓު ކޮށްފައިވާ ގޮތުގައި، އަފްއާނިސްތާން ސަރުކާރާ ތާލިބާނުން އެއްބަސްވެފައިވަނީ، ސުލްހައިގެ ވާހަކަތަކުގައި ކުރިޔަށްހުރި މުހިންމު ކަންކަމާއި މަޝްވަރާކޮށް، އަދި އަމަލީގޮތުން ތަންފީޒު ކުރަންޖެހޭ މުހިންމު ކަންކަމަށް އަމަލީސިފަ ގެންނާނެ ގޮތްތަކާ ގުޅޭގޮތުންނެވެ.
މިގޮތުން، މިއެއްބަސްވުމުގައި ދެފަރާތުން ސޮއިކުރުމާއެކު މިއެއްބަސްވުން ވެގެންދާނީ، ފާއިތުވި 19 އަހަރު ދުވަހުގެ ތެރޭގައި އަފްއާނިސްތާން ސަރުކާރާ ތާލިބާނުންނާ ދެމެދު ލިޔެކިޔުމުން ސޮއިކުރެވޭ މިފަދަ ފުރަތަމަ އެއްބަސްވުން ކަމުގައެވެ.
ދުނިޔޭގެ ގައުމުތަކުންނާއި އަދި ހުޅަގުގެ ބާރުތަކުން، ވާހަކަތައް ކުރިޔަށް ދާދުވަސްވަރު ހަގުރާމަ ހުއްޓާލުމަށް ތާލިބާނުންނަށް ގޮވާލާފައިވި ނަމަވެސް، ދެފަރާތުން އެއްބަސްވާ ކަންކަމުގެ މައްޗަށް އެއްބަސްވުމަކަށް ނާދެވެނީން ހަގުރާމަ ހުއްޓާލުމަށް ތާލިބާނުން ވަނީ ދެކޮޅު ހަދާފައެވެ. ސަބަބަކީ، އަފްއާނިސްތާނުގެ މިޙާރުގެ ރައީސް އަޝްރަފް ޢަނީގެ ސަރުކާރު އަދިވެސް ތާލިބާނުން ގަބޫލު ކޮށްފައި ނުވާތީއެވެ.
