މާލޭގެ މޭޔަރަކަށް އެންމެ ރަނގަޅު ޗޮއިސަކީ އެމްޑީޕީގެ ޓިކެޓުގައި އެ ގޮނޑިއަށް ވާދަކުރައްވާ އެމްޓީސީސީގެ ކުރީގެ ސީއީއޯ އާދަމް އާޒިމް ކަމަށް ހދ. ކުޅުދުއްފުށި ސިޓީގެ މޭޔަރު މުހައްމަދު އާތިފް ރޭ ވިދާޅުވެއްޖެއެވެ.

އެމްޑީޕީގެ ޕްރައިމަރީގައި ވާދަކުރާނެ އިތުރު ކެންޑިޑޭޓަކު ނެތުމުން މާލޭގެ މޭޔަރު ކަމަށް ޕްރައިމަރީއަކާ ނުލައި އާޒިމަށް ޓިކެޓު ދިނުމަށް އެ ޕާޓީން އިއްޔެ ވަނީ ނިންމައިފައެވެ. މާލޭގެ މޭޔަރުގެ ގޮނޑި ހުސްވީ އެ މަގާމުގައި ކުރިން ހުންނެވި ޑރ. މުހައްމަދު މުއިއްޒު ރިޔާސީ އިންތިހާބުގައި ވާދަކުރައްވައި ހޯއްދެވި ކާމިޔާބީއާ އެކުގައި މިދިޔަ މަހުގެ 17 ވަނަ ދުވަހު ރައީސުލްޖުމްހޫރިއްޔާ ކަމުގެ ހުވާ ކުރެއްވުމުންނެވެ.

އާތިފް ވިދާޅުވި ގޮތުގައި އާޒިމަކީ ރައްޔިތުންނާ ގާތުން މަސައްކަތް ކުރެއްވުމުގައި ދެމިހުންނަވައި ތެދުވެރި، ހެޔޮ ބަދަލެއް ގެނެސްދެވޭނެ ވިޝަނަރީ ލީޑަރެކެވެ. ގައުމީ ބޮޑެތި މަޝްރޫއުތަކެއް މި ފާއިތުވެދިޔަ އެމްޑީޕީގެ ވެރިކަމުގައި ހިންގި އިރު، ކުންފުނީގެ އެންމެ ބޮޑު ސިއްރަކީ ސީއީއޯގެ ހަައިސިއްޔަތުން އާޒިމްގެ ލީޑަޝިޕް އަދާ ކުރި މުހިންމު ދައުރު ކަމަށް ވެސް އޭނާ ވިދާޅުވިއެވެ.

އެމްޓީސީސީން ވަނީ ރާއްޖޭގެ އެކިކަންކޮޅުތަކުގައި ތަރައްގީގެ އެކިއެކި މަޝްރޫއުތައް ހިންގައިފައެވެ. އާތިފަށް އެންމެ ބޮޑަށް ފާހަގަ ކުރެވުނީ އެމްޓީސީސީގެ ބޮޑު ހިއްސާއަކާ އެކު ރާއްޖެ ހަގީގީ ދަތުރުފަތުރުގެ ނިޒާމަކުން ގުޅާލަ ދިން "އާރުޓީއެލް" ފެރީގެ ނިޒާމެވެ.

މިކަމުގެ ގާބިލް މޭސްތިރިއަކީ އާޒިމް ކަމަށާއި ރާއްޖެ އަށް ފައްކާ ކުރެވިފައިވާ ޓެކްނޮލޮޖީއާ ރަހްމަތްތެރި މި ބިޔަ މަޝްރޫއު ލޯންޗުވުމަކީ އާންމުންނަށް ނުހަނު ލުއި ފަސޭހަކަން ގެނެސް ދިން ދިވެހި ރައްޔިތުން އިގްތިސާދީ، އިޖުތިމާއީ އަދި އުމްރާނީ ގޮތުން އާ ހަރުފަތަކަށް ގެންގޮސްދިން ކަމެއް ކަމަށް އާތިފް ވިދާޅުވިއެވެ.

"މިފަދަ ބޮޑު މަޝްރޫއުއެއް ގިނަ ގޮންޖެހުންތަކާ އެކުގައި ވެސް ކާމިޔާބު ކަމާއެކު ކުރިއަށް ގެންދެވުނީ އާޒިމްގެ ޕޮޒިޓިވް ވިސްނުމާއި އަބަދުވެސް ރައްޔިތުންނަށް ކަންތައްތައް ފަސޭހަކޮށް ދިނުމަށް ދެއްވާ އަހަންމިއްޔަތުކަމުގެ ބޮޑު ކަމުގެ ސަބަބުން،" އާތިފް ވިދާޅުވިއެވެ.

އާޒިމްގެ މާލެ ސިޓީ މޭޔަރު ކަމުގެ ދައުރެއްގައި މާލެ ރައްޔިތުން ދިރިއުޅޭ ހިތްވާނެ ފަދަ ތަނަވަސް ސިޓީއަކަށް ބަދަލުކޮށްލާނެ ފަދަ މޭޔަރެއް ކަމަށް ވެސް އާތިފް ވިދާޅުވިއެވެ.