ރާއްޖޭގައި އިއާދަ ކުރަނިވި ހަމަތަ އުފައްދާ މިންވަރު 33 އިންސައްތަ އިތުރުކުރުމަށް އިތުރު 600 މިލިއަން ޑޮލަރު ބޭނުންވާ ކަމުގައި ރައީސް މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، 28 ވަނަ ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ކޮޕް28) ގެ ވަރލްޑް ލީޑަރސް ސަމިޓުގައި މިއަދު ތަގުރީރު ކުރައްވަމުންނެވެ.
މި ވަގުތު އިޢާދަކުރަނިވި ހަކަތަ ބޭނުންކުރެވޭ މިންވަރު ހުރީ 4 އިންސައްތާގައި. އަޅުގަނޑުމެން މި ކަނޑައެޅި ލަނޑުދަނޑި ޙާޞިލްކުރުމަށްޓަކައި 600 މިލިއަން ޑޮލަރު އިތުރަށް ހޯދަން ޖެހޭނެ. އަޅުގަނޑުމެންނަށް މިކަން ވާން ހަމައެކަނި މިއޮތީ، ތިޔަ ބޭފުޅުންގެ އެހީތެރިކަމާއެކު.
ރައީސް ވިދާޅުވިއެވެ.
ރައީސް މުއިއްޒުގެ ތަގުރީރުގައި އެމަނިކުފާނު އިތުރަށް ވިދާޅުވީ ހުރިހާ އެންމެންގެވެސް ދިރިތިބުމަށާ، ދިރިއުޅުން ބިނާކުރުމަށްވެސް، މި ނާޒުކު ތިމާވެށި ރައްކައުތެރިކަމާއެކު ދަމަހައްޓަން ބޭނުންވާ ކަމުގައެވެ. އަދި އަވަސްއަވަހަށާ ލަސްލަހުންވެސް، މި ނާޒުކު ވެށްޓަށް ލިބެމުންދާ ކޮންމެ ގެއްލުމަކުން އަރައިގަތުމަށްޓަކައި އެހީތެރިކަން ރާއްޖެއިން ބޭނުންވާކަމުގައިވެސް ރައީސް މުއިއްޒު ވިދާޅުވިއެވެ.
އެގޮތުން ރައީސް ވިދާޅުވީ މޫސުމަށް އަންނަބަދަލުތަކުން ލިބޭ ގެއްލުންތަކުން އަރައިގަތުމަށް އެހީތެރިވާ، 'ލޮސް އެންޑް ޑޭމަޖް ފަންޑު' ގެ ބޭނުން ހިފަން ފަށައިގަތުމަށް، އިއްޔެ ނިންމި ނިންމުމާމެދު އެމަނިކުފާނު އުފާކުރައްވާ ކަމުގައެވެ.
ޔޫއޭއިން މިކަމުގައި އިސްނަންގަވައި މަގު ދެއްކެވީތީ، އަދި ޤައުމުތަކުން މިކަމަށް ތާއީދުކުރައްވައި އެއްބާރުލުންދެއްވައި، މި ފަންޑަށް ބޮޑެތި އެހީތަކެއް ވެދެއްވާނެކަމުގެ ޔަޤީންކަން ދެއްވީތީ އަޅުގަނޑު ޝުކުރު ދަންނަވަން. އަދި ކުރިއަށް އޮތް ތަނުގައި، އިތުރު ގިނަ ފަރާތްތަކުން މި ކަމުގައި ބައިވެރިވާނެކަމަށް އަޅުގަނޑު އުންމީދުކުރަން.
ރައީސް ވިދާޅުވިއެވެ.
ރައީސް މުއިއްޒު ވިދާޅުވީ މި ފަންޑުގެ ބޭނުން އެންމެ އެދެވޭގޮތުގައި ހިފޭނެކަމަށް އުއްމީދު ކުރައްވާ ކަމަށާއި، އެންމެ ބޮޑަށް ބޭނުން ޖެހިފައިވާ ފަރާތްތަކަށް މި ފަންޑުގެ މަދަދު ފަސޭހައިން ހޯދޭނެކަމަށްވެސް އުންމީދުކުރައްވާ ކަމުގައެވެ.
ކޮމެންޓު ފޮނުވާ