ތިމާވެށްޓާ ރަޙްމަތްތެރި ޓެކްނޮލޮޖީއާ އިޢާދަކުރަނިވި ހަކަތައަށް ރުޖޫޢަވުން މިހާރަށްވުރެ އިތުރުކޮށް ހަލުވިކުރުމަށް ސަރުކާރުން މިހާރު އަމާޒު ހިފާފައިވަނީ، ރާއްޖެގައި ބޭނުންކުރާ ކަރަންޓުގެ 33 އިންސައްތަ ފުއްދައިދޭނެ އިޢާދަކުރަނިވި ހަކަތައިގެ ނިޒާމު، ކުރިއަށް އޮތް ފަސް އަހަރުގެ ތެރޭގައި ޤާއިމުކުރުމަށް ކަމުގައި ރައީސް މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، 28 ވަނަ ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ކޮޕް28) ގެ ވަރލްޑް ލީޑަރސް ސަމިޓުގައި މިއަދު ތަގުރީރު ކުރައްވަމުންނެވެ.
ރައީސް ވިދާޅުވީ، މި ވަގުތު ރާއްޖޭގައި އިޢާދަކުރަނިވި ހަކަތަ ބޭނުންކުރެވޭ މިންވަރު ހުރީ 4 އިންސައްތާގައި ކަމުގައެވެ. އެހެންކަމުން، މި ކަނޑައެޅި ލަނޑުދަނޑި ޙާޞިލްކުރުމަށްޓަކައި 600 މިލިއަން ޑޮލަރު އިތުރަށް ހޯދަން ޖެހޭނެކަން ފާހަގަކުރައްވަމުން ރައީސް ވިދާޅުވީ، މިކަން ވާން ހަމައެކަނި މިއޮތީ، ބައިނަލްއަގުވާމީ މުޖުތަމައުގެ އެހީތެރިކަމާއެކު ކަމުގައެވެ.
ރައީސް މުއިއްޒުގެ ތަގުރީރުގައި އެމަނިކުފާނު އިތުރަށް ވިދާޅުވީ ހުރިހާ އެންމެންގެވެސް ދިރިތިބުމަށާ، ދިރިއުޅުން ބިނާކުރުމަށްވެސް، މި ނާޒުކު ތިމާވެށި ރައްކައުތެރިކަމާއެކު ދަމަހައްޓަން ބޭނުންވާ ކަމުގައެވެ. އަދި އަވަސްއަވަހަށާ ލަސްލަހުންވެސް، މި ނާޒުކު ވެށްޓަށް ލިބެމުންދާ ކޮންމެ ގެއްލުމަކުން އަރައިގަތުމަށްޓަކައި އެހީތެރިކަން ރާއްޖެއިން ބޭނުންވާކަމުގައިވެސް ރައީސް މުއިއްޒު ވިދާޅުވިއެވެ.
އެގޮތުން ރައީސް ވިދާޅުވީ މޫސުމަށް އަންނަބަދަލުތަކުން ލިބޭ ގެއްލުންތަކުން އަރައިގަތުމަށް އެހީތެރިވާ، 'ލޮސް އެންޑް ޑޭމަޖް ފަންޑު' ގެ ބޭނުން ހިފަން ފަށައިގަތުމަށް، އިއްޔެ ނިންމި ނިންމުމާމެދު އެމަނިކުފާނު އުފާކުރައްވާ ކަމުގައެވެ.
ޔޫއޭއިން މިކަމުގައި އިސްނަންގަވައި މަގު ދެއްކެވީތީ، އަދި ޤައުމުތަކުން މިކަމަށް ތާއީދުކުރައްވައި އެއްބާރުލުންދެއްވައި، މި ފަންޑަށް ބޮޑެތި އެހީތަކެއް ވެދެއްވާނެކަމުގެ ޔަޤީންކަން ދެއްވީތީ އަޅުގަނޑު ޝުކުރު ދަންނަވަން. އަދި ކުރިއަށް އޮތް ތަނުގައި، އިތުރު ގިނަ ފަރާތްތަކުން މި ކަމުގައި ބައިވެރިވާނެކަމަށް އަޅުގަނޑު އުންމީދުކުރަން.
ރައީސް ވިދާޅުވިއެވެ.
ރައީސް މުއިއްޒު ވިދާޅުވީ މި ފަންޑުގެ ބޭނުން އެންމެ އެދެވޭގޮތުގައި ހިފޭނެކަމަށް އުއްމީދު ކުރައްވާ ކަމަށާއި، އެންމެ ބޮޑަށް ބޭނުން ޖެހިފައިވާ ފަރާތްތަކަށް މި ފަންޑުގެ މަދަދު ފަސޭހައިން ހޯދޭނެކަމަށްވެސް އުންމީދުކުރައްވާ ކަމުގައެވެ.
ކޮމެންޓު ފޮނުވާ