ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ގެ ސީއީއޯގެ މަގާމަށް ޕީޕީއެމްގެ ކުރީގެ ސްޕޯކްސް ޕާސަން ހީނާ ވަލީދު ހަމަޖައްސައިފިއެވެ.

ހީނާ އެންސްޕާއަށް ހަމަޖެއްސެވިއިރު އޭނާ ގިނަ ދުވަހު މަސަައްކަތް ކޮށްފައިވަނީ މީޑިއާގެ ދާއިރާގައެވެ. ރައީސް ޔާމިންގެ ވެރިކަމުގައި އޭނާ މަސައްކަތް ކުރެއްވީ ފޮރިން މިނިސްޓްރީގެ ޕޮލިޓިކަލް ޑިރެކްޓަރުގެ މަގާމުގައެވެ. ހީނާ އެންމެ ގިނަ ދުވަހު މަސައްކަތް ކުރައްވާފައިވަނީ ޕީއެސްއެމް ނުވަތަ ޓީވީއެމްގެ ޕްރެސެންޓަރެއްގެ މަގާމުގައެވެ.

ޓީވީއެމް ދޫކުރެއްވިއިރު ހީނާ ހުންނެވީ އެ ތަނުގެ  އެގްޒެކެޓިވް އެޑިޓަރުގެ މަގާމުގައެވެ.

އެންސްޕާގެ ސީއީއޯގެ މަގާމަށް ހީނާ ހަމަޖެއްވިއިރު އޭނާ މިވަގުތު ހުންނެވީ ކެންސަރަށް ފަރުވާ ހޯއްދެވުމަށް ރާއްޖެއިން ބޭރުގައެވެ.

ގައުމީ އިޖްތިމާއީ، ސިއްހީ އިންޝުއަރަންސް ސްކީމު ހިންގާ ބެލެހެއްޓުމާއި އިޖްތިމާއީ ރައްކާތެރިކަމުގެ ގާނޫނުގެ ދަށުން ކަނޑައެޅިފައިވާ ޕްރޮގްރާމްތައް ރާވާ ހިންގުގެ މެންޑޭޓާއެކީ އެސްޕާ އެންމެ ފުރަތަމަ ވުޖޫދަށް އައީ އޮގަސްޓް 27، 2008 ގައެވެ.

އެ މުވައްސަސާގެ އެންމެ ފުތަމަ ސީއީއޯއަކީ މަރިޔަމް ޝަފީގުއެވެ.

އެންސްޕާ އިން ކުރިއަށް ގެންދާ އެހީގެ ޕްރޮގްރާމްތަކަކީ:-

1. ބޭސް ފަރުވާގެ އެހީގެ ޕްރޮގްރާމް
2. ނުކުޅެދުންތެރިކަން ހުންނަ ފަރާތްތަކަށް ދެވޭ މާލީ އެހީގެ ޕްރޮގްރާމް
3. ފަގީރު ހާލަތުގައި ދިރިއުޅޭ އެކަނި ދަރިން ބަލަހައްޓާ މައިން ނުވަތަ ބަފައިންނަށް ދެވޭ މާލީ އެހީގެ ޕްރޮގްރާމް
4. ފަގީރު ހާލަތުގައި ދިރިއުޅޭ މައިންބަފައިންގެ އެހީތެރިކަމެއް ނެތި އެހެން މީހަކު ބަލަހައްޓާ ކުދިންނަށާއި އެކުދިން ބަލަހައްޓާ ފަރާތަށް ދެވޭ އެހީގެ ޕްރޮގްރާމް
5. ފަގީރު ހާލަތުގައި ދިރިއުޅޭ ފަރާތްތަކުން ކާބޯތަކެތި ގަތުމަށް ދެވޭ މާލީ އެހީގެ ޕްރޮގްރާމް
6. އިޖްތިމާޢީ ސިއްޙީ އިންޝުއަރަންސް ސްކީމް.