ރާއްޖޭގެ އިގްތިސާދު ފުޅާކޮށް ވަރުގަދަކުރުމަށް ރައީސް ޑރ. މުހައްމަދު މުއިއްޒު، ތުރުކީވިލާތުގެ ފިނޭންސް މިނިސްޓަރު މެހްމެތް ސިމްސެކް އާ މަޝްވަރާ ކުރައްވައިފިއެވެ.
އަންކާރާގެ ޕްރެޒިޑެންޝަލް ގެސްޓްހައުސްގައި އިއްޔެ ބޭއްވި ބައްދަލުވުމުގައި ފިނޭންސް މިނިސްޓަރު ވަނީ ރައީސް މުއިއްޒު ރާއްޖޭގެ ރައީސްކަމުގެ މަގާމާ ހަވާލުވެވަޑައިގެންނެވުމުން މަރުޙަބާ ވިދާޅުވެފައެވެ.
މި ބައްދަލުކުރެއްވުމުގައި ރައީސް ދެއްކެވި ވާހަކަފުޅުގައި، ރާއްޖޭގެ އިގްތިސާދު ފުޅާކޮށް ވަރުގަދަކުރުމަށް އެމަނިކުފާނު ގެންގުޅުއްވާ ވިސްނުންފުޅު، ތުރުކީވިލާތުގެ މިނިސްޓަރާ ހިއްސާކުރެއްވިއެވެ. އޭގެ ތެރޭގައި ވެލާނާ އިންޓަނޭޝަނަލް އެއާޕޯޓް ތަރައްގީކުރުމުގެ މަސައްކަތް އަވަހަށް ނިންމެވުމާއި، ވައިގެ އުދުހުންތައް އިތުރުކުރުމާއި، ފަތުރުވެރިކަމުގެ ދާއިރާއިން އެއްބާރުލުން އިތުރުކުރުމާއި، ތަޢުލީމީ ދާއިރާ އަދި ދަތުރުފަތުރުކުރުމުގެ ދާއިރާއިން އެއްބާރުލުން އިތުރުކުރުން ހިމެނެއެވެ.
މި ބައްދަލުކުރެއްވުން ނިންމަވާލައްވަމުން ދެބޭފުޅުން ވަނީ ދެ ގައުމުގެ ޒަމާންވީ ގާތް ރަހުމަތްތެރި ގުޅުން އިތުރަށް ބަދަހިކުރެއްވުމަށް މަސައްކަތްކުރައްވާނެ ކަމުގައި ވިދާޅުވެފައެވެ. ރާއްޖެއާ ތުރުކީވިލާތާއެކު ސިޔާސީ ގުޅުން ގާއިމުކޮށްފައި ވަނީ 28 މެއި 1979ގައެވެ.
ރައީސް މުއިއްޒު މިހާރު ތުރުކީވިލާތަށް ކުރައްވަމުން ގެންދަވާ ރަސްމީ ދަތުރުފުޅަކީ ތުރުކީވިލާތުގެ ރައީސްގެ ދައުވަތަކަށް އެ ގައުމަށް ކުރައްވަމުން ގެންދަވާ ދަތުރުފުޅެކެވެ. މިދަތުރުފުޅުގައި ރައީސްގެ އަރިހުގައި އެމަނިކުފާނުގެ އަނބިކަނބަލުން ސާޖިދާ މުހައްމަދާއި، ދިވެހި ސަރުކާރުގެ އިސް ބޭފުޅުން ހިމެނޭ ވަފުދެއް ބައިވެރިވެވަޑައިގަންނަވައެވެ.
