ކުރީ ސަރުކާރުން ރައްޔިތުންނަށް ދީފައިވާ ގޯއްޗާއި ފްލެޓް އޭގެ ހައްގުވެރީންނާއި ވީ އެންމެ އަވަހަކަށް ހަވާލުކުރުމަށް ގޮވާލާ ގަރާރެއް ރައްޔިތުންގެ މަޖިލިހަށް ހުށަހަޅައިފިއެވެ.

ގަލޮޅު ދެކުނު ދާއިރާގެ މެންބަރު މީކާއިލް ނަސީމް ހުށަހެޅުއްވި މި ގަރާރު މަޖިލީހަށް ބަލައިގަތީ 29 މެމްބަރުންގެ ވޯޓުންނެވެ. އަދި މިއަދުވަނީ ގަރާރަށް ބަހުސްވެސް ކުރަން ފަށާފައެވެ.

ގަރާރު އިއްވަމުން މީކާއީލް ވިދާޅުވީ ރައީސް ސޯލިހު ސަރުކާރުން ރައްޔިތުންނަށް ދޫކޮށްފައިވާ ގޯއްޗާއި ފުލެޓުތަކާ ބެހޭ ގޮތުން އެކި ފަހަރު އެކި ގޮތަށް އަދުގެ ސަރުކާރުން މައުލޫމާތު ދެމުންގެންދާކަމުގައެވެ.

އެހެންކަމުން މިކަމާއި ގުޅޭ މި ސަރުކާރުގެ ސިޔާސަތު ހާމަކޮށް، ގޯއްޗާއި ފްލެޓްގެ ލިޔުން ލިބިފައިވާ ފަރާތްތަކަށް އެތަންތަން ވީހާވެސް އަވަހަކަށް ހަވާލުކުރުމަށް ގަރާރުގައި ގޮވާލާފައި ވެއެވެ.

ގެދޮރުވެރިޔާ ސްކީމުގެ ދަށުން ފުލެޓު ލިބިފައިވާ ފަރާތްތަކުން އަލުން ފޯމު ހުށަހަޅަންޖެހޭނެ ހާލަތެއްވެސް އަތުވެދާނެ ކަމަށް ވަޒީރު ވިދާޅުވެފައިވާތީ އާ، ކުރީ ސަރުކާރުން މާލޭގެ ރައްޔިތުންނަށް ގޯތި ދިނުމަށް ކަނޑައަޅާފައިވާ، ހުޅުމާލެ، ގުޅީފަޅު އަދި ގިރާވަރުފަޅު ތަރައްގީކޮށް އެތަންތަނަށް ބޭނުންވާ އަސާސީ ހިދުމަތްތަށް ހިންގުމަށް އެއްވެސް އަދަދެއް 2024 އަށް ލަފާކުރާ ދައުކަތުގެ ބަޖެޓުގައި ނުހިމަނައި، ފުށި ދިއްގަރުފަޅު ހިއްކުމަށް 400 މިލިއަން ރުފިޔާ ހިމަނާފެއިވުމުން، މިއީ ސަރުކާރުގެ ނިޔަތާމެދު ސުވާލު އުފެދޭ ކަމެއް ކަމަށް ގިނަ ބަޔަކު ދެކޭ.

މީކާއިލް ނަސީމު ހުށަހެޅުއްވި ގަރާރުގައި ވިދާޅުވެފައި ވެއެވެ.

އޭނާ ވިދާޅުވީ މުއިއްޒުއަށް ވޯޓުލީ އެތައް ރައްޔިތުންނެއް ވޯޓު ލާފައިވަނީ އެތަންތަން އަތު ނުލާނެކަމަށް ވިދާޅުވެ މުއިއްޒު ވީ ވައުދުތަކަށް އިތުބާރު ކޮށްފައި ކަމުގައެވެ. އެހެންނަމަވެސް މި ސަރުކާރު ވެރިކަމަށް އައިސް ހައުސިން މިނިސްޓަރު ބޭއްވެވި ފުރަތަމަ ނޫސްވެރިންގެ ބައްދަލުވުމުގައި ކުރީގެ ސަރުކާރުގެ ބިންވެރިޔާ ސްކީމުގެ ދަށުން ދޫކޮށްފައިވާ ބައެއް ގޯތިތަކުގެ ރެޖިސްޓްރީ ސައްހަކަމާމެދު ސުވާލު އުފައްދާފައިވާކަމަށް އޭނާ ވިދާޅުވިއެވެ. އަދި ގޯތިތަކުގެ ލޮކޭޝަން ބަދަލުކުރަން ޖެހިދާނެކަމުގެ އިންޒާރުވެސް ދެއްވާފައިވާކަމަށް ގަރާރުގައި ވިދާޅުވެފައި ވެއެވެ.

މިސަރުކާރުގެ ހައުސިން މިނިސްޓަރ ޑރ. ޢަލީ ހައިދަރު ވިދާޅުވެފައިވަނީ، ގެދޮރުވެރިޔާ ސްކީމުގެ ދަށުން މިދިޔަ ސަރުކާރުން ދޫކުރަން ހުޅުވާލި ފްލެޓުތަކަމެދު ޢަމަލުކުރާނެ ގޮތެއް އެނގޭނީ އޭސީސީން މިހާރު ކުރިޔަށް ގެންދާ ތަހުގީގު ނިމުމުން ކަމުގައެވެ.

ކުރީ ސަރުކާރުން ދޫކުރަން ނިންމި ފްލެޓުތަކާއި ގުޅިގެން ގިނަބަޔަކު ވަނީ ކަންބޮޑުވުން ފާޅުކޮށް އޭސީސީއަށް މައްސަލަ ހުށައަޅަފައެވެ. ފްލެޓުތަކުގެ މައްސަލާގައި ހަތް ހާހަށްވުރެ ގިނަ ޝަކުވާ އޭރުގެ ހައުސިން މިނިސްޓްރީއަށް ހުށައެޅިއެވެ. އަދި ޢާންމުންގެ ކަންބޮޑުވުންތަކާއި ގުޅިގެން އޭސީސީން ވަނީ ފްލެޓުތައް ދޫކުރުން ހުއްޓުވާފައެވެ. އަދި އޭގެ ފަހުން ސަރުކާރު ބަދަލުވީނަމަވެސް އެކަމުގައި އަމަލުކުރާނެ ގޮތެއް އޭސީސީން އަދި އަންގާފައެއް ނުވެއެވެ.

ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީގައި ވާހަކަފުޅު ދައްކަވަމުން މިނިސްޓަރ ޑރ. ޙައިދަރު ވިދާޅުވީ، މައްސަލަ ތަޙުޤީގުކުރުމުގެ ފުރަތަމަ މަރުހަލާ 20 ދުވަހުގެތެރޭގައި ނިމޭނެ ކަމަށެވެ. ނަމަވެސް ނަމަވެސް އެއީ ޖިނާއީ ތަހުޤީގަކަށްވާތީ ގިނަ ދުވަސް ނަގާފާނެ ކަމަށް ބެލެވޭކަމަށް މިނިސްޓަރު ވިދާޅުވިއެވެ.

އަޅުގަނޑުމެންގެ އަތް ބަނދެވިފައި މިއޮތީ އަޅުގަނޑުމެން ވެރިކަމަށް އައިރު އޭސީސީއިން އެކަން ހުއްޓުވާފައި އޮތީމާ

ކޮމިޓީގައި ވާހަކަ ދައްކަވަމުން ހައިދަރު ވިދާޅުވިއެވެ.

އޭނާ އިތުރަށް ވިދާޅުވީ އޭސީސީގެ ތަހުގީގަށް ބޭނުންވާތީ ފްލެޓް ޕޯޓަލްގެ ހުރިހާ ފޯމުތަކާ ލިޔުންތަކެއް ފެންނަ ގޮތަށް އޭސީސީއަށް އެކްސެސް ދީފައިވާނެ ކަމަށާއި އެކްސެސް ދީފައިވާނީ އުނިއިތުރު ނުގެނެވޭނެ ގޮތަށް ކަމަށެވެ.

އޭނާ ވިދާޅުވީ އެއްވެސް ފެލެޓެއް އަތުލުމުގެ އެއްވެސް މި ސަރުކާރުން ނުގެންގުޅޭ ކަމަށެވެ. އަދި ފްލެޓްތަކަށް ޝަރުތުހަމަވޭތޯ ނުވޭތޯވެސް ނިންމާނީ އޭސީސީން އަންގާ ގޮތެއްގެ މައްޗަށް ކަމަށެވެ. އަދި ޝަރުރުހަމަވާނަމަ ފެލެޓް ލިބޭނެކަމުގެ ޔަގީންކަންވެސް އޭނާވަނީ ދެއްވާފައެވެ.