ފޮރިން މިނިސްޓްރީގެ ސްޓޭޓް މިނިސްޓަރަކަށް މުހައްމަދު ފަހުމީ ހަސަން އައްޔަން ކުރެއްވިތާ ހަތަރު ދުވަސް ފަހުން މަގާމުން ވަކިކޮށްފިއެވެ.
ފަހުމީ އެ މަގާމަށް އައްޔަން ކުރައްވައި މަގާމުގެ ފަތްކޮޅު ހަވާލުކޮށްފައި ވަނީ މިދިޔަ ހޯމަ ދުވަހު އެވެ.
އެނގިފައިވާ ގޮތުގައި ރައީސް ޑރ. މުހައްމަދު މުއިއްޒު މިހާރު ވަނީ އެ މަގާމުން ފަހުމީ ވަކި ކުރައްވައިފަ އެވެ.
ފަހުމީ އެ މަގާމުން ވަކިކޮށްފައި ވަނީ ގާނޫނުއަސާސީން ރައީސުލްޖުމްހޫރިއްޔާ އަށް ލިބިވަޑައިގަންނަވާ ބާރުގެ ދަށުންނެވެ. އޭނާ ވަކިކުރި އިރު، ފަހުމީ އެ މަގާމަށް އައްޔަންކޮށްގެން މި ސަރުކާރަށް ފާޑު ކިއުން ވެސް އަމާޒުވެފައިވެއެވެ.
ފަހުމީ އަކީ ސިވިލް ސާވިސް ކޮމިޝަން (ސީއެސްސީ) ގެ ރައީސަކަށް އޭނާ ހުންނެވި އިރު، އެތަނުގެ އަންހެން މުވައްޒަފަކަށް ޖިންސީ ގޯނާކުރި ކަމުގެ ތުހުމަތު ކުރެވުނު ބޭފުޅެކެވެ. އެ މައްސަލައިގައި ފަހުމީ މަގާމުން ވަކި ވެސް ކުރިއެވެ.
ފަހުމީ ވަނީ ރާއްޖެއިން މެލޭޝިއާ އަށް ކަނޑައަޅާފައިވާ ހައި ކޮމިޝަނަރުގެ މަގާމު ވެސް ކުރައްވައިފައެވެ.
