ރައްޔިތުންގެ ހައްގުތައް ނިގުޅައިގަންނައިރު އެމްޑީޕީން މަޑުން ނޯންނާނެކަމަށް އެމްޑީޕީގެ އަންހެނުންގެ ރޫހުގެ ރައީސާ އަދި އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ. އޭނާ މިހެން ވިދާޅުވީ ކުރީ ސަރުކާރުގައި ފެށި ބިންވެރިޔާ އަދި ގެދޮރުވެރިޔާ ސްކީމަށް މިސަރުކާރުން ގެންގުޅޭ ސިޔާސަތަށް ފާޑުވިދާޅުވަމުންނެވެ.
ކުރީ ސަރުކާރުގައި ގޯތި ދީފައިވާ މީހުން އަތުން ގޯތި އަތު ނުލާނެކަމުގެ ޔަޤީންކަން މިސަރުކާރުން ވަނީ ދީފައެވެ. ނަމަވެސް ގޯތި ދީފައިވަނީ އެއްވެސް ޕްލޭނެއް ނެތި، ގޮޅި ޖަހާލައިގެންކަމަށް މިސަރުކާރުގެ ހައުސިންމިނިސްޓަރު ޑރ. އަލީ ހައިދަރު ވަނީ ވިދާޅުވެފައެވެ. އެގޮތުން ހުޅުމާލެ، ގުޅިފަޅުއ ަދި ގިރާވަރުފަޅުން ގޯތި ދޭން ނިންމާފައިވަނީ އެއްވެސް ޚިދުމަތަކަށް ޖާގަ ނުދީކަމަށް މިނިސްޓަރު ވިދާޅުވިއެވެ. އެކަމުން ރައްޔިތުންނަށް ވަރަށް ދަތިވާނެތީ އެ ޚިދުމަތްތައް ދިނުމަށް ޖާގަ ކަނޑައަޅަނެކަމަށް މިނިސްޓަރ ވިދާޅުވިއެވެ. ނަމަވެސް އެއްވެސް މީހަކަށް ލިބިފައިވާ ގޯތި އެ އެލިބުނު ރަށަކުން އެ ބޮޑުމިނުގައި ލިބޭނެކަމަށާއި، ލިބުނު ޕްލޮޓު ބަދަލުވުމަކީ އެކަށީގެންވާކަމެއްކަމަށް މިނިސްޓަރ ވިދާޅުވިއެވެ.
މީގެ އިތުރުން ފްލެޓު ލިބުނު މީހުންގެ ލިސްޓަށް 7000 އަށްވުރެ ގިނަ ޝަކުވާ ހުށައަޅާފައިވާއިރު ގިނަ ބައެއްގެ ކަންބޮޑުވުމާއެކު ފްލެޓު ދިނުން އޭސީސީން ވަނީ މަޑުޖައްސުވާލާފައެވެ. މިނިސްޓަރ ވިދާޅުވެފައިވަނީ ގިނަ ބައެއްގެ ކަންބޮޑުވުން ހުރުމާއެކު ފްލެޓު ލިސްޓު އަލުން މުރާޖައާ ކުރައްވާނެކަމަށެވެ. އަދި ފްލެޓު ލިބޭނީ އޭގެ އެންމެ ހައްގުވެރިންނަށްކަމަށް ވިދާޅުވެފައިވެއެވެ.
ރޭ ބޭއްވި އެމްޑީޕީ ޤައުމީ މަޖިލީހުގެ ބައްދަލުވުމުގައި ނިންމި ކަންކަމަށްބަލައި ރޮޒައިނާ މިއަދު ކުރެއްވި ޓްވީޓްގައިވަނީ ފްލެޓުތައް އަތުލަނީ،ކަމަށާއި، ދެން ހުރި އެއްޗެހި ވެސް އަތުލަނީކަމަށެވެ. ނަމަވެސް އެއްވެސް މީހެއްގެ އަތުން ފްލެޓ ނައަތުލާނެކަމަށް ސަރުކާރުން ބުނެއެވެ.
ރޮޒައިނާ ވަނީއެމްޑީޕީ އަކީ ރާއްޖޭގެ އެންމެ ގިނަ ރައްޔިތުން ތަމްސީލުކުރާ ޕާޓީކަމަށް ވިދާޅުވެ އެޕާޓީގެ ވަރަށް ބޮޑު ޒިންމާއެއް އެބައޮތްކަން ހާމަކުރައްވާފައެވެ. ރައްޔިތުންގެ ހައްގުތައް ނިގުޅައިގަންނައިރު އެމްޑީޕީން މަޑުން ނޯންނާނެކަމަށް ރޮޒައިނާ ވިދާޅުވިއެވެ.
ރައީސް ޑރ. މުއިއްޒު ވަނީ ސިޔާސީ ވަޒީފާތައް ފިޔަވައި އެހެން އެއްވެސް މީހަކު ވަޒީފައިން ވަކި ނުކުރާނެކަމަށްވެސް ވިދާޅުވެފައެވެ.
