މީގެ ހައެއްކަ އަހަރު ކުރިން ޓާމިނަލް ކެފޭގެ ތެރެއަށް މޫނު ނިވާކޮށްގެން ތިބި ބަޔަކު ވަދެ ތޫނު އެއްޗަކުން ހަމަލާދީ ނަދީމް އިބްރާހިމް މަރާލި މައްސަލާގައި ދައުވާކުރާ މީހުންގެ އިސްތިއުނާފް މައްސަލަ ނިމެންދެން އެ މީހުން ބަންދު ނުކުރެވޭނެކަމަށް ހައި ކޯޓުން ނިންމި މައްސަލަ ދައުލަތުން ސުޕްރީމް ކޯޓަށް ހުށައަޅައިފިއެވެ.
2017 ވަނަ އަހަރު ޖުލައި މަހުގެ 27 ވަނަ ދުވަހުގެރޭ އިރާކޮޅު ލޮނުޒިޔާރަތްމަގުގައި ހުންނަ ކެފޭއެއްގެ ތެރޭގައި އިންދައި، މޫނު ނިވާކޮށްގެންތިބި ބަޔަކު ކެފޭތެރެއަށްވަދެ ވަޅިން ޙަމަލާދީ މަރާލާފައިވަނީ ހއ. ތަކަންދޫ، އިބްރާހިމީހިޔާ، ނަދީމް އަބްދުއްރަޙްމާނެވެ. އޭނާ މަރުވެފައިވަނީ ވަޅިން ހަމާލާދިނުމާގުޅިގެން ހޮސްޕިޓަލްގައި ފަރުވާދެމުންދަނިކޮށެވެ.
ހއ. ތަކަންދޫ އިބްރާހިމީހިޔާ، ނަދީމް (ނަޑޭ) މަރާލި މައްސަލާގައި ތޫނު އެއްޗަކުން ހަމަލާދީ މީހަކު މެރުމުގެ ދައުވާ އުފުލީ ގ. ޝާރާޒް، މުހައްމަދު މަފާޒު ހުސައިން ސަލީމްގެ މައްޗަށެވެ. އޭގެ އިތުރުން ތޫނު އެއްޗެއް ބޭނުންކޮށްގެން ގަސްތުގައި މީހަކު މަރާލުމުގައި ބައިވެރިވި ކަމުގެ ދައުވާ ރ. އިންނަމާދޫ، ސަމަންތާ، ހުސައިން ޝާމިން އާއި ގއ. ގެމަނަފުށި، ހަވާސް، މުހައްމަދު ކަރަމް ސުހައިލް އަދި ލ. ގަން، ވިދާތަރި، އަލީ ނިފާޒުގެ މައްޗަށް އުފުލިއެވެ.
މި މީހުންގެ މައްޗަށް ކުށް ސާބިތުވާ ވަރަށް ހެކި ލިބިފައި ނުވާތީ މި މީހުން މިނިވަންކުރުމަށް ކްރިމިނަލް ކޯޓުން ހުކުމް ކުރީ މިދިޔަ ނޮވެމްބަރު 14 ވަނަ ދުވަހުއެވެ. ދައުލަތުން މިމައްސަލަ ހައިކޯޓުގައި އިސްތިއުނާފް ކުރީ މިއަހަރުގެ ޖެނުއަރީ ހަތަރުވަނަ ދުވަހުއެވެ. އަދި އިސްތިއުނާފްގެ މައްސަލަ ނިމެންދެން އެމީހުން ބަންދުކުރަން ދައުލަތުން އެދުމުން ހައި ކޯޓުން ނިންމާފައިވަނީ އެމީހުން ބަންދު ނުކުރެވޭނެކަމަށެވެ. އެގޮތަށް ނިންމީ މިދިޔަ ހަފްތާގައެވެ.
އެހެންކަމުން ދައުލަތުން ވަނީ ހައި ކޯޓުގެ އެ ނިންމުން އިސްތިއުނާފްކުރަން ސުޕްރީމްކޯޓަށް އިއްޔެ ހުށައަޅާފައެވެ. ނަމަވެސް އެ މައްސަލަ ބަލައިގަތުމަށް އަދި ވަކިގޮތެއް ނުނިންމައެވެ.
