އައިޖީއެމްއެޗްގައި މަސައްކަތް ކުރި ފިލިޕީންސްގެ ނަރުސް، މޭރީ ގްރޭސް އޮނެޑް ޕިނެޑާގެ މަރުގެ މައްސަލައިގައި ދައުވާ އުފުލާފައިވާ ހަލީމަތު ލަމްހާ ތިން މަސްދުވަހަށް ބަންދުން ދޫކޮށްލުމަށް ކްރިމިނަލް ކޯޓޫން ނިންމައިފިއެވެ. އޭނާ ބަންދުން ދޫކޮށްލުމަށް ނިންމަފައި މިވަނީ ބަންދުގައި ހުންނަތާ 2 އަހަރުވާން ގާތްވެފައިިވަނިކޮށެވެ.
މޭރީ މަރާލާފައި ވަނީ 2021 ވަނަ އަަހަރުގެ އޮކްޓޯބަރު މަހުގެ 19ވަނަ ދުވަހުއެވެ. މި މައްސަލާގައި ލަމްހާގެ މައްޗަށް ދައުވާ ކުރަނީ އައިޖީއެމްއެޗްގައި މަސައްކަތް ކުރަމުންދިޔަ އޭނާ ފިރިމީހާ މާވިންއާ ގުޅިގެން މޭރީ މަރާލުމުގައި ބައިވެރިވި ކަމުގެ ތުހުމަތެވެ. އަދި އިންޖެކްޝަންތަކެއް ގެންގުޅުނު ކަމަށް ބުނެ އިތުރު ދެ ދައުވާއެއް ވެސް އޭނާގެ މައްޗަށް ކުރެއެވެ.
މި މައްސަލާގައި ދެމީހުންވެސް ތިބީ ޝަރީޢަތް ނިމެންދެން ބަންދުގައެވެ. ނަމަވެސް ލަމްހާ 3 މަހަށް ދޫކޮށްލުމަށް މިހާރު ކްރިމިނަލް ކޯޓުން ވަނީ ނިންމާފައެވެ. ލަމްހާ ދޫކޮށްލަން ކޯޓުން މިއަދު އަމުރު ކުރިއިރު އެންމެ ފަހުން އޮތް އަޑުއެހުމުގައި، އޭނާގެ ފަރާތުން ވަނީ ފައިގައި ޓެގް އެޅުވުމަށް ފަހު ނަމަވެސް ބަންދުން ދޫކޮށް ދިނުމަށް އެދިފައެވެ. ނަމަވެސް ކޯޓުން މިއަދު ލަމްހާ ދޫކޮށްލަން ނިންމުމުގައި ތެގު އެޅުވުމާމެދު އެއްޗެއް ބުނެފައެއް ނުވެއެވެ.
ނަމަވެސް ދައުލަތުން އެކަމާ ދެކޮޅެވެ. ދައުލަތުން ވިދާޅުވީ، ޓެގް އެޅުވުމަށްފަހު ބަންދުން ދޫކުރުމަކީ ޖިނާއީ އިޖްރައާތުގެ ގާނޫނު ދަންނަ ކަމެއްނޫންކަމަށެވެ.
އޭގެ ރައްދުގައި ލަމްހާގެ ވަކީލް ވިދާޅުވީ، ނާއީ އިޖްރައާތުގެ ގާނޫނުގައި ބުނާގޮތަށް ކޮންމެ 30 ދުވަހަކުން އެއް ފަހަރު ބަންދު މުރާޖާ ކޮށްފައިނުވާކަމަށެވެ. މީގެ ކުރިން އެގޮތަށް އަމަލު ނުކޮށްފައިވަނީ ޤާނޫނާ ޚިލާފަށްކަމަށް ލަމްހާގެ ވަކީލް ވިދާޅުވިއެވެ.
ލަމްހާއަކީ މީގެ ކުރިން ކުށގެ ރެކޯޑް އޮތް މީހެއް ނޫންކަމަށާއި، ނަމަވެސް މީހަކު މަރާލުމުގައި ބައިވެރިވުމުގެ ތުހުމަތު އޮތް މީހަކަށް ވާތީވެ، މުޖުތަމައަށް ނުރައްކާ އޮތް ކަމަށް ބެލެވޭނަމަ، ޓެގު އަޅުވާފައި އޭނާ ހުންނަ ތަން ބެލޭނެ ގޮތަށް ދޫކޮށްލެވެންވާނެކަމަށް އޭނާ ވިދާޅުވިއެވެ.
މިކަންކަމަށްފަހު މައްސަލަ ބައްލަވާ ގާޒީ ހުސައިން ފާއިޒް ރަޝާދު ވިދާޅުވީ ބަންދަށް ލުޔެއް ދިނުމާ މެދު ދެން އޮންނަ އަޑުއެހުމެއްގައި ގޮތެއް ނިންމަވާނެކަމަށެވެ.
މިއަދުގެ ޝަރީޢަތުގައި ވަނީ ތިން މީހެއްގެ ހެކިބަސް ނަގާފައެވެ. އެއީ އައިޖީއެމްއެޗްގެ ނަރުހެއްގެ ހެކިބަހާއި ދެ ފުލުހުންގެ ހެކިބަހެވެ.
