ރައްޔިތުންގެ މަޖިލިހަށް ހުށަހަޅާފައިވާ 6.5 ބިލިއަން ރުފިޔާގެ ބަޖެޓަކީ ސަޕްލިމެންޓްރީ ބަޖެޓެއް ނޫން ކަމަށާއި މިއީ ވައްކަމުގެ ރަޝީދެއް ކަމަށް މަޖިލިހުގެ ކުރީގެ ރައީސް އަދި މައްޗަންގޮޅި މެދު ދާއިރާގެ ދަ ޑިމޮކްރެޓްސްގެ މެމްބަރު މުހައްމަދު ނަޝީދު މިއަދު ވިދާޅުވެއްޖެއެވެ.
މި އަހަރުގެ ބަޖެޓަށް އިތުރު ކުރާ 6.5 ބިލިއަން ރުފިޔާގެ ސަޕްލިމަންޓްރީ ބަޖެޓުގެ ބަހުސްގައި ނަޝީދު ވިދާޅުވީ ރައީސުލްޖުމްހޫރިއްޔާ ނުވަތަ ވަޒީރު ބޭފުޅުން އެދިވަޑައިގަންނަވާ ކަންކަމަށް ދައުލަތުގެ ފައިސާ ހަރަދު ކުރުމެއް ނޯންނާނެ ކަމަށާއި އެއީ މަޖިލިހުން ފާސް ކުރާ ކަމަކަށް ބޭނުން ކުރަން އޮންނަ އެއްޗެއް ކަމަށެވެ. އަދި މިހާރު ދިމާވެގެން އުޅޭ ކަމަކީ ސަރުކާރުގެ ހަރަދުތައް ނުބެލެހެއްޓުން ކަމަށެވެ.
"އެނގިވަޑައިގަންނަވާނެ ކޭޝް ފްލޯއެއް ނުބެލެހެއްޓުނީމަ މަސް ނިމޭ އިރުގައި އަބަދުވެސް އަތަށް މި އޮންނަނީ ތާށިވެފައި. ނިމި މިދާ ރައީސް ސޯލިހްގެ ސަރުކާރުގައި އެންމެ ބޮޑަށް ފާހަގަވާ ނުކުތާއަކީ ކޭޝް ފްލޯ ބަލަހައްޓަން އެނގިވަޑައިނުގަތުން. ސަޕްލިމެންޓްރީ ބަޖެޓާ އެކީގައި މިއީ ފުރަތަމަ ފަހަރެއް ނޫން އެ ބޭފުޅުން ވަޑައިގަންނަވާ،" ނަޝީދު ވިދާޅުވިއެވެ.
"ނަމަވެސް މިއަދު މިވާ ގޮތަކީ ކެޔޮ ކޭ ވަރު މާ ބޮޑަށް އެނގެނީ. ބިތު ފަންގި ނެގޭތީވެ،"
ނަޝީދު ވިދާޅުވި ގޮތުގައި ފިނޭންސް މިނިސްޓްރީން ނޮވެމްބަރު 2 އާ ހަމައަށް ނެރެފައިވާ ރިޕޯޓާ ހަމައަށް ސާފުވެފައި ވަނީ ބަޖެޓް އެކީ ހުސްކޮށްލައިފި ކަމެވެ. އަދި މި އަހަރުގެ 44 ވަނަ ހަފްތާ އަށް އައިއިރުގައި ހައުސިން މިނިސްޓްރީގައި އަން ޔުޓިލައިޒް މިންވަރެއް ނެތް ކަމަށް ވެސް އެމަނިކުފާނު ވިދާޅުވިއެވެ.
ރައްޔިތުންގެ ފައިސާ ހަރަދު ކުރަން ޖެހޭނީ އަމާނާތްތެރިކަމާއެކުގައި ބަލައިގެން ކަމަށާއި މިއީ ހިތް އެދޭ ގޮތަށް ބަހާލަން ޖެހޭ ފައިސާއެއް ނޫން ކަމަށް އެމަނިކުފާނު ވިދާޅުވިއެވެ. އަދި މަޖިލިހުގެ މެމްބަރުންގެ ކޮންޓްރޯލް ނެންގެވުމަށް ރައީސުލްޖުމްހޫރިއްޔާ އެ ބޭފުޅުންނަށް "ހޮޅި" ގަތުމަށާއި "ބްރިކްސް" ގަތުމަށާއި ދެން ވެސް އޮތް އެއްޗެއް ގަންނަން އެ ފައިސާ ނުދެވޭނެ ކަމަށް ނަޝީދު ވިދާޅުވިއެވެ.
"އެ ފައިސާއަކީ އަޅުގަނޑުމެންގެ ތަރައްގީ އަށް، އަޅުގަނޑުމެންގެ ދަރިންނާއި ދަރިންގެ ދަރިންނަށް ހުރި ފައިސާ. އެ ފައިސާ އެއްވެސް ހާލެއްގައި ބޭކާރު ވެސް ކޮށްގެން ނުވާނެ. ނާޖައިޒް ގޮތުގައި ވެސް ބޭނުންކޮށްގެން ނުވާނެ. ވައްކަން ވެސް ކޮށްގެން ނުވާނެ،" ނަޝީދު ވިދާޅުވިއެވެ.
"މިއީކީ ސަޕްލިމެންޓްރީ ބަޖެޓެއް ނޫން. މިއީ ވައްކަމުގެ ރަޝީދެއް،"
