ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ މައްޗަށް އިތުބާރު ނެތް ކަމަށް ނިންމައި މަޖިލިހަށް ހުށަހެޅި ގަރާރު ބޭރު ކޮށްލަން މަޖިލީހުގެ ރިޔާސަތު މިއަދު ބެލެހެއްޓެވި ވިލުފުށީ ދާއިރާގެ މެންބަރު ހަސަން އަފީފް ނިންމެވީ ނަޝީދުގެ އިތުބާރު ނެތްކަމަށް ހުށަހެޅި ގަރާރުގައި ދީބާޖާއެއް ނެތިގެންނެވެ.
މިއަދު ހެނދުނު ބޭއްވުނު ޖަލްސާގައި ރިޔާސަތު ބެލެހެއްޓެވި ހަސަން އަފީފު މަޖިލިހުގެ ޖަލްސާ ފެށުމާއެކު ނިޒާމީ ނުކުތާ ނަންގަވާ، މެދުހެންވޭރު ދާއިރާގެ މެމްބަރު އަލީ އާޒިމް ވިދާޅުވީ ގަރާރު މަޖިލީހަށް ހުށަހަޅާފައިވަނީ މަޖިލިހުގެ ގަވާއިދާ ޚިލާފަށް ކަމުގައެވެ. އޭނާ ވިދާޅުވީ ގަރާރުތައް ހުށަހަޅަންޖެހޭ ގޮތް މަޖިލިސް ގަވާއިދުގައި އެބައޮތް ކަމަށެވެ. އެހެންކަމުން، ގަވާއިދު ހިފެހެއްޓުމަށްޓަކާ ގަރާރު އަބުރާ ގެންގޮސް އަލުން މަޖިލިހަށް ހުށަހަޅަންޖެހޭކަމަށް އޭނާ ވިދާޅުވިއެވެ.
ގަރާރު އޮންނަންޖެހޭނީ ގަރާރެއްގެ ސިފައިގައޭ. މިގަވައިދު މިބުނާ ގޮތަށް ގަރާރު ނެތް. އަޅުގަޑަކަށް ނުފެނޭ ގަރާރު އެގޮތަކަށް. އެންމެ ބޮޑު އެއްކަމަކީ ގަރާރު ދީބާޖާއެއް އޮންނަންޖެހޭނެކަމަށް މިގަވާއިދު އެބަ ބުނޭ. މިހާރު ހުށަހެޅިފަ އޮތް ކަރުދާހުގައި އަޅުގަޑު ބަލާއިރުގަ ދީބާޖާއެއް ނެތް. އެހެންވީމަ އަޅުގަޑު ދެކެނީ މިއީ ނިޒާމީ މައްސަލައެއް ކަމަށް. ބޮޑު މައްސަލައެއް ކަމަށް. އަނެއްކާވެސް މި ބޭފުޅުންނަށް ދެވިދާނެ، ސުޕްރިމް ކޯޓަށް ގެންގޮސްގެން ހޯދަންވީ ކޮބައިތޯ އެކަން ކުރަންވީ ގޮތަކީ. އެހެންނަމަވެސް މި ގަވައިދުގަ ވަކި ގޮތަކަށް ބުނެފަ އޮއްވާ، ވަކިކަމެއް ވަކިގޮތަކަށް ކުރަން ބުނެފަ އޮއްވަކައެއް ދެނެއް އެހެން ގޮތަކަށް ކުރުމުގެ ފުރުސަތެއް އަޅުގަޑެއް ޔަގީންނުންވެސް ދީގެން މިތާކު ނީންނާނަން.
އެމްޑީޕީން ހުށެހެޅި ގަރާރުގައި ދީބާޖާއެއް ނެތްކަމަށް ވިދާޅުވަމުން އަލީ އާޒިމް ވިދާޅުވިއެވެ.
އަލީ އާޒިމްގެ ނިޒާމީ ނުކުތާ ގަބޫލު ކުރައްވަމުން ރިޔާސަތުގައި އިންނެވި ހަސަން އަފީފު ވިދާޅުވީ އެއީ ނިޒާމީ މައްސަލައެއް ކަމަށާއި، ގަރާރު މަޖިލީހުން ބަލައިނުގަނެ ބޭރު ކޮށްލީ ކަމުގައެވެ.
އޭރުވެސް އެމްޑީޕީގެ މެމްބަރުން ދިޔައީ މަޖިލިހުގައި އިހުތުޖާޖް ކުރަމުންނެނެވެ.
ރައްޔިތުންގެ މަޖިލީހަށް މިއަދު އެޖެންޑާކޮށްފައި އޮތް މައްސަލަ ހެނދުނުގެ ޖަލްސާގައި ރިޔާސަތުން ބޭރުކޮށްފައި ވަނިކޮށް، އެ މައްސަލަ އަލުން ކުރިއަށްގެންދެވޭނެ ކަމަށް ގަބޫލު ނުކުރައްވާ ކަމަށް ވިދާޅުވެ، އެ މައްސަލަ ކުރިއަށްގެންދަވަން މަޖިލީހުގެ ނައިބު ރައީސް އީވާ ދެކޮޅު ހައްދަވައި، މަޖިލިހުގެ ދެވަނަ ޖަލްސާވެސް ކުރިޔަށް ނުގެންގޮސް ވަނީ ނިންމާލާފައެވެ.
މެންދުރަށް ތާވަލުކުރި ޖަލްސާ ފައްޓަވަމުން ރިޔާސަތު ބެލެހެއްޓެވި އީވާ ވިދާޅުވީ، ނަޝީދު ވަކިކުރުނަށް ހުށަހަޅާފައި އޮތް ގަރާރަކީ މަޖިލީހުން ބޭރިކޮށްފައިވާ ގަރާރަކަށް ވާތީ އެއީ މިހާރު ސައްހަ ގަރާރެއް ނޫން ކަމުގައެވެ. އެހެންކަމުން ޖަލްސާ ނިންމާލީކަމަށް ވިދާޅުވެ އީވާ ޖަލްސާ ނިންމާލީއެވެ.
މިއަދު ހެނދުނު ބޭއްވުނު ޖަލްސާ ރިޔާސަތު ބެލެހެއްޓެވި، ވިލިފުށީ ދާއިރާގެ މެމްބަރު ހަސަން އަފީފު ނިންމާލީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ މަގާމުން ވަކިކުރަން އެމްޑީޕީން ހުށަހަޅާފައިވާ އިތުބާރު ނެތްކަމުގެ ގަރާރު ހުށަހަޅާފައިވަނީ މަޖިލީހުގެ ގަވާއިދާ ހިލާފަށް ކަމަށް ބުނެ، އަލުން ގަރާރު ހުށަހަޅަން ޖާގަދީ އެވެ.
އެތައް ފަހަރެއްގެ މަތިން ގަރާރު އެޖެންޑާ ކުރިޔަސް، އެ ކަން ކުރިއަށް ނުގެންދެވި ދިގުލައިގެންގޮސްފައި އޮއްވައި، އެ މައްސަލަ މިއަދުގެ ޖަލްސާއަށް އެޖެންޑާކުރީ ސުޕްރީމް ކޯޓުން މިދިޔަ ބުރާސްފަތި ދުވަހު ކުރި ހުކުމަށް ފަހުއެވެ. ނަޝީދުގެ އިތުބާރު ނެތް ކަމަށް އެމްޑީޕީން ހުށަހެޅި މައްސަލަ ފަސް ފަހަރެއްގެ މަތިން އެޖެންޑާކުރި ނަމަވެސް މަޖިލީހުގެ ނައިބު ރައީސް އީވާ ސަލާމުގައި ހުންނެވުމުން ކުރިއަށް ނުގެންދެވެއެވެ. އެހެންވެ އެމްޑީޕީން ސުޕްރީމް ކޯޓަށް މައްސަލަ ހުށަހެޅީ ނައިބު ރައީސް ނެތް ހާލަތްތަކުގައި ރިޔާސަތު ބަލަހައްޓާ މެމްބަރަކު އިންނަވައިގެން ޖަލްސާ ކުރިއަށް ގެންދަން ޖެހޭނެ ކަމަށް ކަނޑައެޅުމަށެވެ.
އެ މައްސަލަ ހުށަހެޅުމާ އެކު، އީވާ ވަނީ އެކަމުގައި ސުޕްރީމް ކޯޓުން ގޮތެއް ކަނޑައެޅެންދެން ރިޔާސަތު ބަލަހައްޓަވަން އުޒުރުވެރިވެވަޑައިގަންނަވާ ކަން މަޖިލީހުގެ އިދާރާއަށް އަންގަވައިފައެވެ. ސުޕްރީމް ކޯޓުން ކުރި ހުކުމުގައި ބުނީ މަޖިލީހުގެ ރައީސާއި ނައިބު ރައީސަށް ރިޔާސަތު ނުބެލެހެއްޓޭ ހާލަތްތަކުގައި މަޖިލީހުގެ ގަވާއިދުގެ ދަށުން ކަނޑައަޅަންޖެހޭ ފަސް މެމްބަރުންނަށް ރިޔާސަތު ބެލެހެއްޓޭނެ ކަމަށް އޮންނަ އޮތުމަކީ މިފަދަ މައްސަލައެއް ދިމާވާ ހާލަތުގައި އަތުވެދާނެ ގާނޫނީ ހުސްކަމަން އޮތް ހައްލެއް ކަމަށެވެ. އެ ފަސް މެންބަރުންނަށް ރިޔާސަތު ނުބެލެހެއްޓޭނެ ހާލަތެއް ގަވައިދުގައި ނެތްކަން ހުކުމުގައި ފާހަގަކުރިއެވެ.
