އައްޑޫސިޓީ މަރަދޫ އެމްޑީޕީގެ ކުރީގެ ކައުންސިލަރު ފައިސަލް އިބްރާހިމް އެޕާޓީ ދޫކޮށް ޕީއެންސީއާއި ގުޅިއްޖެއެވެ.
އޭނާ ސޮއިކޮށް ފޯމު ހަވާލު ކުރެއްވީ ޕީއެންސީގެ ޗެއާޕާސަން އަބްދުއްރަހީމާއިއެވެ. އައްޑޫ ސިޓީއަށް ޕްރޮގްރެސިވް ކޮންގްރެސް ކޯލިޝަނުން މި ހަފްތާ ބަންދުގައި ކުރި ދަތުރުގައި ޕީޕީއެމް/ޕީއެންސީއާއި އައްޑޫން ގިނަ ބަޔަކު ވަނީ ގުޅިފައެވެ. އައްޑޫ ސިޓީއަށް ޕީޕީއެމް/ޕީއެންސީގެ ލީޑަރޝިޕުން ކުރި މިދަތުރުގައި އައްޑޫ ސިޓީގެ ހުރިހާ އަވަށްތަކަކަށް ވަޑައިގެން ވަނީ ޢާންމު މެމްބަރުންނާއި ގޮފިތަކާއި ބައްދަލުކޮށްފައެވެ.
މިދަތުރަކީ އެކޯލިޝަނުން ވެރިކަން ކާމިޔާބު ކުރުމަށްފަހު ކުރި ފުރަތަމަ ދަތުރެވެ. ޕީޕީއެމް/ޕީއެންސީގެ ލީޑާޝިޕްގެ ބޭފުޅުން އައްޑޫއަށް ކުރައްވާ ދަތުރުފުޅުގައި އައްޑޫ ހައި ސްކޫލްގައި ބޭއްވި ޖަލްސާގައި ވާހަކަ ދައްކަވަމުން އަދުރޭ ވިދާޅުވީ، ގާނޫނު ތަންދޭ އެންމެ ގިނަ ދުވަހަކު އެ ދެ ޕާޓީން ވެރިކަން ކުރުމަކީ އެބޭފުޅުންގެ އުއްމީދެއް ކަމަށެވެ.
އަދުރޭ ވަނީ ޕީޕީއެމް ބައިބައި ކުރުމަށް ފުރުސަތު ނުދެއްވުމަށާއި، އެކަމަށް އެއްބާރުލުން ޕާޓީގެ މެންބަރުން ނުދެއްވުމަށް އެދިވަޑައިގެންފައެވެ. ޕީޕީއެމް/ޕީއެންސީ ތެރޭގައި މައްސަލަ ޖެހިފަިއވާކަމަށް އެކި ފަރާތްތަކުން ބުނަމުންދާކަމަށާއި، ނަމަވެސް އެއީ ހަގީގަތާ ޚިލާފު ވާހަކަތަކެއެއް ކަމަށް އަދުރޭ ވިދާޅުވިއެވެ. އަދި ޕީޕީއެމް/ޕީއެންސީން މިހާ ހިސާބަށް މި އާދެވުނީ ލީޑާޝިޕާއި ސަޕޯޓަރުން ދެއްކި ހިތްވަރުން ކަމަށްވެސް އޭނާ ވިދާޅުވިއެވެ.
އަދުރޭ ވިދާޅުވީ މިއީ ރައްޔިތުންނާ ގާތުން މަސައްކަތްކުރުމަށް ރައްޔިތުންގެ ގާތަށް ކުރައްވާ ދަތުރެއް ކަމަށާއި މި ދަތުރުގައި ރައްޔިތުންގެ ކަންބޮޑުވުންވެސް އައްސަވާނެކަމަށެވެ. އެބޭފުޅުންގެ މި ދަތުރަކީ ނިމިދިޔަ އިންތިޚާބުން ލިބުނު ކާމިޔާބީ ފާހަގަކުރަން ކުރައްވާ ދަތުރެއް ކަމަށް ވެސް އަދުރޭ ވިދާޅުވިއެވެ.
