ރައީސް އިބްރާހިމް މުހައްމަދު ސޯލިހްގެ ސަރުކާރުން އައްޑު އަށް ގެނައީ މަދިރި ފަނީގެ ތަރައްގީ ކަމަށް ރައްޔިތުންގެ މަޖިލިހުގެ މަހިބަދޫ ދާއިރާގެ ޕީޕީއެމްގެމެމްބަރު އަހުމަދު ތޯރިގް (ޓޮމް) މިއަދު އައްޑޫ ސިޓީގައި ވިދާޅުވެއްޖެއެވެ.
ޕީޕީއެމް/ޕީއެންސީގެ ލީޑަޝިޕްގެ ބައެއް ބޭފުޅުން އައްޑޫ ސިޓީ އަށް ކުރައްވާ ދަތުރުގައި ހިތަދޫގައި ބޭއްވި ބައްދަލުވުމުގައި ތޯރިގް ވިދާޅުވީ ރައީސް ސޯލިހް މި ފަސް އަހަރުގެ ކުރީކޮޅު ވެސް އައްޑު އަށް ވަޑައިގެން ވިދާޅުވީ، އައްޑޫ ތަރައްގީ ނުވެ، މުޅި ރާއްޖެ ތަރައްގީ ނުވާނެ ކަމަށެވެ. މި ފަހަރުގެ ރިޔާސީ ކެމްޕެއިންގައި ވެސް އައްޑޫގައި އެ މަނިކުފާނު ވިދާޅުވީ، ހަމަ އެހެން ކަމަށް ތޯރިގް ވިދާޅުވިއެވެ.
"2018 ގެ އިންތިޚާބުގެ ކެމްޕޭނުގަވެސް ހަމަ ލިޔުނީ އައްޑޫ ތަރައްގީނުވެ ރާއްޖެ ތަރައްގީ ނުވާނެކަން. ހަމައެހެންމެ ސްޕީޗް އެޑިޓްކޮށްލާފަ ފަސް އަހަރު ލިޔުނީވެސް އައްޑޫ ތަރައްގީނުވެ ރާއްޖެ ތަރައްގީނުވާނެކަން." ތޯރިގް ވިދާޅުވިއެވެ.
ތޯރިގް ވަނީ އައްޑޫގެ ކޮންމެ ގެއަކުން ނުކުންނަ އިރު، އެ ގެގޭ ދޮރުމަތީގައި މަދިރި ފެންގަނޑެއް ހަދާފައި އޮންނަ ކަމަށް ވިދާޅުވެފައެވެ.
"ކޮންމެ ގެއަކުން ނުކުންނައިރު، އެ ގެގޭ ދޮރުމަތީގައި މަދިރިފެންގަނޑެއް އެބައޮތް ހަދާފައި. އެ ނޫން ތަރައްގީއެއް ރައީސް ސޯލިހަށް ފަސް އަހަރު ދުވަހުގެ ތެރޭގައި މި ސިޓީއަށް ގެނެވިފައެއް ނެތް،" ތޯރިގް ވިދާޅުވިއެވެ.
ތޯރިގް ވިދާޅުވީ، ވަރުގަދަ ސަރުކާރެއް ބަލި ކުރުމަށް މިދިޔަ ފަސް އަހަރު ރައްޔިތުންގެ މަޖިލިހުގައި އިދިކޮޅު ޕާޓީގެ ގޮތުގައި ޕީޕީއެމް މަސައްކަތް ކުރީ އަށެއްކަ މެމްބަރުންނާ އެކު ކަމަށާއި އަލުން ވެރިކަން ލިބި، އެ ވެރިކަން ދަމަހައްޓަން ކުރަން ޖެހެނީ ސީރިއަސް މަސައްކަތްތަކެއް ކަމަށެވެ. އެ މަސައްކަތާ ގުޅިފައިވާ އެއް ކަމަކީ ތޯރިގް ވިދާޅުވި ގޮތުގައި، ރައްޔިތުންގެ މަޖިލިހުގައި އައްޑު އަށް ހާއްސަ ކޮށްފައިވާ 8 ގޮނޑި އަންނަ އަހަރު އޮންނަ މަޖިލިސް އިންތިހާބުގައި ޕީޕީއެމް/ޕީއެންސީން ކާމިޔާބު ކުރުމެވެ.
އޭނާ ވިދާޅުވީ، ޕްރައިމަރީގައި ބަލިވާ ކެންޑިޑޭޓް އިދިކޮޅު ނުވަތަ އެމްޑީޕީގެ ކެންޑިޑޭޓަށް މަޖިލިސް އިންތިހާބުގައި ތާއީދު ކޮށްފި ނަމަ އެ ގެއްލުވައިލަނީ ސިޔާސީ ހަޔާތް ކަމަށާއި ރައްޔިތުން އެ ކަމަށް މާފު ނުކުރާނެ ކަމަށެވެ. އެހެންވެ، ކުރިއަށް އޮތް ރައްޔިތުންގެ މަޖިލިހުގެ އިންތިހާބުގައި ޕީޕީއެމް/ޕީއެންސީގެ ޓިކެޓް ދޭނެ ކެންޑިޑޭޓުން ކަނޑައަޅަން އަންނަ އަހަރުގެ ޖެނުއަރީ 20 ގައި ބާއްވާ ޕްރައިމަރީން މޮޅުވާ ކެންޑިޑޭޓުގެ ފަހަތަށް ބަލިވާ ކެންޑިޑޭޓުން އެރުމަށް ތޯރިގް އެދިވަޑައިގަތެވެ.
