ސްޓެލްކޯ އަށް މި އަހަރު އެކަނި ވެސް 400 މުވައްޒަފުން އިތުރުވި ކަމަށް އިންތިހާބީ ރައީސްގެ އޮފީހުން މިއަދު ހާމަކޮށްފިއެވެ.
އިންތިހާބީ ރައީސްގެ އޮފީހުން ވަނީ ދައުލަތުގެ ޔުޓިލިޓީ ކުންފުނިތަކުގެ މަސައްކަތްތައް ހުރި ގޮތް ބެލުމަށް އިންތިގާލީ ކޮމެޓީތަކުން އެ ތަންތަނަށް ކުރި ޒިޔާރަތަށް ފަހު، އެކުލަވާލާފައިވާ ރިޕޯޓުތަކުން ފާހަގަކުރެވުނު ކަންތައްތައް މީޑިއާ އާ ހިއްސާކޮށްފައެވެ.
އިންތިހާބީ ރައީސްގެ އޮފީހުން މ. ދިމްޔާތުގައި ބޭއްވި ނޫސްވެރިންގެ ބައްދަލުވުމުގައި ފިރްޒުލް ވިދާޅުވީ 2018 ވަނަ އަހަރު އެ ކުންފުނީގައި 928 މުވައްޒަފުން ތިބި ނަމަވެސް މިހާރު އެ ކުންފުނީގައި 1،688 މުވައްޒަފުން އެބަތިބި ކަމަށެވެ. މިއީ 760 މުވައްޒަފުންގެ އިތުރުވުމެކެވެ.
"ކުންފުންޏަށް މި އަހަރު އެކަނި 400 މުވައްޒަފުން އިތުރުވެފައިވޭ. މި ތަނުގައި ވެސް އަޅުގަނޑުމެންނަށް ހައިރާންކަން ގެނުވި އެއް ކަމަކީ (ރިޔާސީ) އިންތިހާބު ނިމުނު ފަހުން ކުންފުންޏަށް 42 މުވައްޒަފުން އިތުރުވެފައިވާކަން،" އޭނާ ވިދާޅުވިއެވެ.
ސްޓެލްކޯގެ މުވައްޒަފުންގެ މުސާރައަށް ކުރަން ޖެހޭ ހޭދައެއް ފިރްޒުލް ހާމަކުރައްވާފައެއް ނުވެއެވެ.
ސްޓެލްކޯގެ މާލީ ހާލަތާ ގުޅޭ ގޮތުން ފިރުޒުލް ވިދާޅުވީ އެ ކުންފުނީގެ ޖުމްލަ ދަރަނި 3.7 ބިލިއަނަށް އެރި ނަަމަވެސް، ސްޓެލްކޯ އަކީ ފައިދާވާ ކުންފުންޏެއް ކަމަށެވެ. ސްޓެލްކޯ އަކީ ކޮންމެ އަހަރަކު ވެސް ފައިދާ ހޯދާ ކުންފުންޏަކަށް ވާތީ، ޖުމްލަ ގޮތެއްގައި ސްޓެލްކޯގެ މާލީ ހަލަތު މިއަދަށް ބަލާއިރު އެހާ ގޯސް ނޫންކަން ނޫނީ އެކަށީގެންވާ އެވްރެޖު ހާލަތެއްގައި އޮތް ކަމަށް ވެސް ފިރްޒުލް ވިދާޅުވިއެވެ.
ނަމަވެސް، ޑޮލަރު ލިބުމުގެ ދައްޗާއި ކޭޝްފްލޯ ދަށްވުމުގެ ސަބަބުން ކުންފުނިން އަންނަ އަހަރު ދައްކަން ޖެހޭ 185 މިލިއަން ރުފިޔާ ދައްކަން އެ ކުންފުންޏަށް ދަތިވާނެތީ، މީގެ ކުރިން ކުންފުންޏަށް ފައިދާވި ނަމަވެސް، އަންނަ އަހަރު ދައުލަތުން ސްޓެލްކޯއަށް ފައިސާގެ އެހީތެރިކަން ދޭން ޖެހޭނެ ކަމަށް އޭނާ ވިދާޅުވިއެވެ.
