ސްޓެލްކޯ އިން އަންނަ އަހަރު 185 މިލިއަން ރުފިޔާ ދަރަނީގެ ގޮތުގައި ދައްކަން ޖެހޭ ކަމަށާއި އެއީ އެ ކުންފުނިން އެ ފައިސާ ދައްކަން ދަތިވާނެ ކަމަށް އިންތިގާލީ އޮފީހުން ތައްޔާރު ކުރި ރިޕޯޓުގައި ބުނެފިއެވެ.
އިންތިހާބީ ރައީސްގެ އޮފީހުން މިއަދު މ. ދިމްޔާތުުގައި ބޭއްވި ނޫސްވެރިންގެ ބައްދަލުވުމެއްގައި އިންތިގާލީ މުއްދަތުގެ ތަރުޖަމާނު މުހައްމަދު ފިރްޒުލް ވިދާޅުވީ ސްޓެލްކޯގެ ޖުމްލަ ދަރަނި 3.7 ބިލިއަން ރުފިޔާ އަށް އަރާ އިރު، ސްޓެލްކޯއަކީ ކޮންމެ އަހަރަކު ވެސް ފައިދާ ހޯދާ ކުންފުންޏަކަށްވާތީވެ ޖުމްލަ ގޮތެއްގައި ސްޓެލްކޯގެ މާލީ ހާލަތު މިއަދަށް ބަލާއިރު، އެހާ ގޯސް ނޫން ކަމަށެވެ. އަދި ސްޓެލްކޯ އޮތީ އެކަށީގެންވާ އެވްރެޖް ހާލަތެއްގައި ކަމަށް ވެސް އޭނާ ވިދާޅުވިއެވެ.
"ނަމަވެސް ކުންފުންޏަށް ދިމާވެފައި ހުރި ޑޮލަރު ލިބުމުގެ ދަތިތަކާއި ކޭޝް ފްލޯ ދަށްވުމުގެ ދަތިތަކުގެ ސަބަބުން ކުންފުނިން 2024 ވަނަ އަހަރު އަދާ ކުރަން ޖެހިފައި އޮތް 185 މިލިއަން ރުފިޔާ އަދާ ކުރުމަށް ކުންފުންޏަށް ދަތިވާނެ ކަމަށް ވަރަށް ބޮޑަށް ބެލެވޭ،" ފިރްޒުލް ވިދާޅުވިއެވެ.
ފިރްޒުލް ވިދާޅުވި ގޮތުގައި އެކަމުގެ ސަބަބުން ކުންފުންޏަށް ފައިދާ ވަމުން ދިޔަ ކަމުގައި ވިޔަސް، ކުރިއަށް އޮތް މުއްދަތުގެ ތެރޭގައި ދައުލަތުގެ ފަރާތުން ކެޕިޓަލް އިންޖެކްޓް ކުރަން ޖެހޭނެ ކަމަށެވެ.
އަންނަ އަހަރުގެ ހޫނު މޫސުމަށް ނުވަތަ ޕީކް ސީޒަނަށް ތައްޔާރުވާން ޖެހޭ ވަރަށް ސްޓެލްކޯ އިން ތައްޔާރުވެފައި ނުވާ ކަމަށް ވެސް ފިރްޒުލް ވިދާޅުވިއެވެ. އޭނާ ވިދާޅުވީ ސްޓެލްކޯއާ ގުޅިގެން އެކަން ހައްލުކުރުމުގެ މަސައްކަތް އިންތިހާބީ ރައީސްގެ އޮފީހުން މިހާރު ކުރަމުން އަންނަ ކަމަށެވެ.
