ރައްޔިތުންގެ މަޖިލިހުގެ އިނގުރައިދޫ ދާއިރާގެ އެންމެ އިސްކޮށް ހަރަކާތްތެރިވާ ބޭފުޅުންތަކެއް، ކުރިޔަށް އޮތް ރައްތުންގެ މަޖިލިހުގެ އިންތިޚާބުގައި، އެދާއިރާއަށް ކުރުމަތި ލެއްވުމަށް ނިންމަވާފައިވާ، ރައްޔިތުންގެ މަޖިލުގެ ކުރީގެ މެމްބަރުން އިބުރާހިމް ފަލާހުއަށް ތާއީދުކުރަން ނިންމަވައިފިއެވެ.
އިނގުރައިދޫ ދާއިރާއިން، ފަލާހުއަަށް ތާއީދުކުރުމަށް މިއަދު ނިންމާފައިވަނީ، މިހާތަނަށް އެދާއިރާގައި އެމްޑީޕީގައި އެންމެ އިސްކޮށް ހަރަކާތްތެރިވެފައިވާ މެމްބަރުންގެ އިތުރުން އެ މެމްބަރުންނަކީ އެދާއިރާގެ މިހާރުގެ މެމްބަރުން ހަސަންޓޭގެ އެންމެ ގާތް މެމްބަރުންކަމަށްވެސް "ޚަބަރު އޮންލައިން"އަށް ވަނީ މައުލޫމާތު ލިބިގައެވެ.
ފަލާހުއަށް ތާއީދުކުރުމަށް އިނގުރައިދޫ ދާއިރާގެ އެމްޑީޕީގެ އިސް ބޭފުޅުންތަކެއް ނިންމާފައިވާއިރު، އެދާއިރާގެ ގިނަ އަދަދެއްގެ ބަޔަކު މިއަދުވަނީ ޕީއެންސީއަށް ސޮއިވެސް ކޮށްފައެވެ. މިގޮތުން ޕީއެންސީއަށް ސޮއިކުރި ގިނަ އަދަދެއްގެ މެމްބަރުންގެ ފޯމުތައް މިއަދުވަނީ ޕީއެންސީގެ ރައީސް ޑރ. މުއިއްޒުއާއި ހަވާލުކޮށްފައެވެ. މެމްބަރުންގެ ފޯމުތައް ޑރ. މުއިއްޒުއާއި ހަވާލުކޮށްފައިވަނީ އެދާއިރާގެ ރައްޔިތުންގެ މަޖިލިހުގެ ކުރީގެ މެމްބަރު އިބުރާހިމް ފަލާހުއެވެ.
ފަލާހުވަނީ ރައްޔިތުންގެ މަޖިލިހުގެ ކުރިޔަށް އޮތް ދައުރުގެ އިނގުރައިދޫ ދާއިރާގެ މަޖިލިސް ކެމްޕޭން، ބޮޑު ތާއީދަކާއެކީ މި އޮކްޓޯބަރުމަހު 22 ވަނަ ދުވަހު ފައްޓަވާފައެވެ.
18 ވަނަ މަޖިލިހުގައިވެސް އިނގުރައިދޫ ދާއިރާގެ މެމްބަރުކަން ކުރެއްވި ފަލާހު ކުރިޔަށް އޮތް ދައުރުގައި އެދާއިރާގެ މަޖިލިސް އިންތިޚާބުގައި ވާދަކުރައްވަން ނިންމެވިއިރު އޭނާވަނީ ފާއިތުވި ރިޔާސީ އިންތިޚާބު ޑރ. މުއިއްޒުއަށް ކާމިޔާބު ކޮށްދިނުމުގައި އިސްދައުރެއް އަދާކޮށްފައެވެ. މިގޮތުން އޭނާވަނީ "ދިވެހީންގެ ރާއްޖެ" ކެމްޕޭންގެ ރ. އަތޮޅުގެ އެންމެ އިސްފަރާތެއްގެ ގޮތުގައި މަސައްކަތް ކޮށްފައެވެ.
ރައްޔިތުންގެ މަޖިލިހުގެ ކެމްޕޭން ފެއްޓެވުމަށްފަހު ފަލާހު ވިދާޅުވެފައިވަނީ މަޖިލިހުގެ ކުރިޔަށް އޮތް ދައުރަށް ކުރިމަތިލައްވަން ގަސްތު ކުރެއްވީ ދާއިރާގެ ގިނަ އަދަދެއްގެ ރައްޔިތުންގެ އެދުމުގެ މަތިންކަމަށާއި، ދާއިރާގެ ބޮޑު ތާއީދަކާއެކީ އިންތިޚާބުކުރި ޕީޕީއެމް/ޕީއެންސީގެ ސަރުކާރަށް ރައްޔިތުންގެ މަޖިލިހުގެ ތެރެއިން އެއްބާރުލުން ދިނުމަށްވެސް ރައްޔިތުން ބޭނުންވާ ކަމުގައެވެ.
އަދި އޭނާ ވިދާޅުވެފައިވަނީ ކުރިޔަށް އޮތް އެ ދާއިރާގެ މަޖިލިސް އިންތިޚާބު ބޮޑު ތަފާތަކުން ކާމިޔާބު ކުރައްވާނެ ކަމުގައެވެ.
ފަލާހުވަނީ ދާއިރާގެ ރައްޔިތުންގެ ތާއީދު ހޯދުމުގެ އިތުރުން ފާއިތުވި ރިޔާސީ އިންތިޚާބުގައި އިނގުރައިދޫ ދާއިރާއިން ޕީޕީއެމް/ޕީއެންސީގެ ކެނޑިޑޭޓް ޑރ. މުއިއްޒުއަށް ލިބިގެންދިޔަ ބޮޑު ތާއީދަށް ޝުކުރު އަދާކުރުމަށްޓަކާ ދާއިރާގެ ބައެއް ރަށްތަކަށް ޒިޔާރަތް ކޮށްފައެވެ.
18 ވަނަ ރައްޔިތުންގެ މަޖިލިހުގައި އިނގުރައިދޫ ދާއިރާގެ މެމްބަރުކަން ކުރެއްވި އިބުރާހިމް ފަލާހުއަކީ ކުރީގެ ރައީސް ޔާމިންއާއި އަދި އިންތިޚާބީ ރައީސް ޑރ. މުއިއްޒުގެވެސް އަރިސް ފަރާތެއްކަން ފާހަގަ ކޮށްލެވެއެވެ.
