ރައްޔިތުންގެ މަޖިލިހުގެ އިނގުރައިދޫ ދާއިރާގެ ގިނަ އަދަދެއްގެ ބަޔަކު ޕީއެންސީއަށް ސޮއިކޮށް، ފޯމުތައް ޕީއެންސީގެ ރައީސް ޑރ. މުއިއްޒުއާއި ހަވާލުކޮށްފިއެވެ. ޕީއެންސީއަށް ސޮއިކުރި ގިނަ އަދަދެއްގެ މީހުންގެ ފޯމުތައް ޑރ. މުއިއްޒުއާއި ހަވާލުކޮށްފައިވަނީ އެދާއިރާގެ ރައްޔިތުންގެ މަޖިލިހުގެ ކުރީގެ މެމްބަރު އިބުރާހިމް ފަލާހުއެވެ.
ފޯމުތައް އިންތިޚާބީ ރައީސް ޑރ. މުއިއްޒުއާއި ހަވާލުކުރުމަށްފަހު "ޚަބަރު އޮންލައިން"އަށް މައުލޫމާތު ދެއްވަމުން ފަލާހު ވިދާޅުވީ އިނގުރައިދޫ ދާއިރާގެ މެޖޯރިޓީ އޮތީ ފާއިތުވި ރިޔާސީ އިންތިޚާބު ކާމިޔާބު ކުރެއްވި ޕީޕީއެމް/ޕީއެންސީގެ ކޯލިޝަނަށާއި ޑރ. މުއިއްޒުގެ ސަރުކާރަށް ކަމުގައެވެ. އެގޮތުން އެދާއިރާގެ ގިނަ ބަޔަކު ޕީއެންސީއާއި ގުޅެން ބޭނުންވާކަން ފާހަގަކުރައްވަމުން ފަލާހު ވިދާޅުވީ މިއަދު ޑރ. މުއިއްޒުގެ އަތްޕުޅަށް އަރުވާފައިވަނީ އޭގެ ތެރެއިން އަދި ބައެއް ފޯމުތައް ކަމުގައެވެ.
ދާއިރާގެ ބޮޑު މެޖޯރިޓީއެއްގެ ތާއީދު އޮތީ އިންތިޚާބީ ރައީސް ޑރ. މުއިއްޒުގެ ސަރުކާރަށް. ކުރިޔަށް އޮތް ތަނުގައިވެސް ފެނިގެންދާނެ ދައިރާގެ ގިނަ އަދަދެއްގެ ރައްޔިތުން ޕީއެންސީއާއި ގުޅެމުންދާތަން.
ފަލާހު ވިދާޅުވިއެވެ.
ފަލާހު އިތުރަށް ވިދާޅުވީ ޕީއެންސީއާއި ގުޅުމަށް އެދެމުންދާ، ދާއިރާގެ އިތުރު ރައްޔިތުންގެ ފޯމުތައް ވަރަށް އަވަހަށް ޕީއެންސީގެ ރައީސް ޑރ. މުއިއްޒުއާއި ހަވާލު ކުރައްވާނޭ ކަމަށެވެ.
ފަލާހުވަނީ ރައްޔިތުންގެ މަޖިލިހުގެ ކުރިޔަށް އޮތް ދައުރުގެ އިނގުރައިދޫ ދާއިރާގެ މަޖިލިސް ކެމްޕޭން، ބޮޑު ތާއީދަކާއެކީ ފައްޓަވާފައެވެ.
18 ވަނަ މަޖިލިހުގައިވެސް އިނގުރައިދޫ ދާއިރާގެ މެމްބަރުކަން ކުރެއްވި ފަލާހު ކުރިޔަށް އޮތް ދައުރުގައި އެދާއިރާގެ މަޖިލިސް އިންތިޚާބުގައި ވާދަކުރައްވަން ނިންމެވިއިރު އޭނާވަނީ ފާއިތުވި ރިޔާސީ އިންތިޚާބު ޑރ. މުއިއްޒުއަށް ކާމިޔާބު ކޮށްދިނުމުގައި އިސްދައުރެއް އަދާކޮށްފައެވެ. މިގޮތުން އޭނާވަނީ "ދިވެހީންގެ ރާއްޖެ" ކެމްޕޭންގެ ރ. އަތޮޅުގެ އެންމެ އިސްފަރާތެއްގެ ގޮތުގައި މަސައްކަތް ކޮށްފައެވެ.
ރައްޔިތުންގެ މަޖިލިހުގެ ކެމްޕޭން ފެއްޓެވުމަށްފަހު ފަލާހު ވިދާޅުވެފައިވަނީ މަޖިލިހުގެ ކުރިޔަށް އޮތް ދައުރަށް ކުރިމަތިލައްވަން ގަސްތު ކުރެއްވީ ދާއިރާގެ ގިނަ އަދަދެއްގެ ރައްޔިތުންގެ އެދުމުގެ މަތިންކަމަށާއި، ދާއިރާގެ ބޮޑު ތާއީދަކާއެކީ އިންތިޚާބުކުރި ޕީޕީއެމް/ޕީއެންސީގެ ސަރުކާރަށް ރައްޔިތުންގެ މަޖިލިހުގެ ތެރެއިން އެއްބާރުލުން ދިނުމަށްވެސް ރައްޔިތުން ބޭނުންވާ ކަމުގައެވެ.
ފަލާހުވަނީ ދާއިރާގެ ރައްޔިތުންގެ ތާއީދު ހޯދުމުގެ އިތުރުން ފާއިތުވި ރިޔާސީ އިންތިޚާބުގައި އިނގުރައިދޫ ދާއިރާއިން ޕީޕީއެމް/ޕީއެންސީގެ ކެނޑިޑޭޓް ޑރ. މުއިއްޒުއަށް ލިބިގެންދިޔަ ބޮޑު ތާއީދަށް ޝުކުރު އަދާކުރުމަށްޓަކާ ދާއިރާގެ ބައެއް ރަށްތަކަށް ޒިޔާރަތް ކޮށްފައެވެ.
18 ވަނަ ރައްޔިތުންގެ މަޖިލިހުގައި އިނގުރައިދޫ ދާއިރާގެ މެމްބަރުކަން ކުރެއްވި އިބުރާހިމް ފަލާހުއަކީ ކުރީގެ ރައީސް ޔާމިންއާއި އަދި އިންތިޚާބީ ރައީސް ޑރ. މުއިއްޒުގެވެސް އަރިސް ފަރާތެއްކަން ފާހަގަ ކޮށްލެވެއެވެ.
