ރައީސް ޔާމީން ޕީޕީއެމްގެ އޮފީހުގަ ޕާޓީގެ މެމްބަރުންނާ ބައްދަލު ކުރައްވަމުން އެބަ ގެންދަވައެވެ.

މިބައްދަކު ކުރެއްވުމުގެ ބައެއް މަންޒަރުތައް ޗެނަލް 13އިން ވަގުތުން ގެނެސްދިން ނަމަވެސް އަޑު ގެނެސްދީފައެއް ނުވެއެވެ. ޗެނަލް 13 އިން ރިޕޯޓު ކޮށްފައިވާ ގޮތުގައި ރައީސް ޔާމިން ބައްދަލު ކުރައްވާފައިވަނީ ޕީޕީއެމްގެ ގްރާސް ރޫޓުގެ ބައެއް ފަރާތްތަކާއެވެ.

ރައީސް ޔާމިން ޕީޕީއެމްގެ ގްރާސް ރޫޓުގެ މެމްބަރުންނާއި ބައްދަލު ކުރައްވަނީ ކަރެކްޝަނަލް ސާވިސްއިން ބޮޑު އެމަނިކުފާނުގެ ޖަލު ހުކުމަށް ބޮޑު ލުޔެއް ދީފައި ވަނިކޮށެވެ.

އެގޮތުން ކަރެކްޝަންސްއިން މިއަދުވަނީ ރައީސް ޔާމިން ރަށު ބަންދަށް ބަދަލު ކޮށްފައެވެ. އަދި މި ބަދަލާއެކު ރައީސް ޔާމިންނަށް މީހުންނާއި ބައްދަލު ކުރުމާއި ޖަލްސާތަކުގައި ބައިވެމުގެ ހުއްދަވެސް ކަރެކްޝަންސްއިން ދޫކޮށްފައިވާކަމަށްވެސް ވަނީ އެނގިފައެވެ.

އެހެންނަމަވެސް ކަރެކްޝަނަލް ސާވިސްއިން މައުލޫމާތު ދީފައިވާ ގޮތުގައި ރައީސް ޔާމިންއަށް ގެއިން ބޭރަށް ވަޑައިގެންނެވޭނީ "ސިއްޙީ ފަރުވާއާއި ގުޅޭ ކަންކަމުގައި" އެ ސާވިސްގެ ހުއްދަ ހޯދައިގެންނެވެ.

ރައީސް ޔާމިން "ރަށު ބަންދަށް" ދޫކޮށްލާފައިވަނީ އެމަނިކުފާނާ ރައީސް ސާލިހާދެމެދު ކުރެވުނު މަޝްވަރާތަކަށް ފަހުއެވެ. އަދި މި ބަދަލާއެކު ޔާމީނަށް މާލޭ ސަރަހައްދުގައި (މާލެ، ވިލިމާލެ، ހުޅުމާލެ) ބާއްވާ ޖަލްސާތަކަށް ހާޒިރުވެވި، އަދި މީހުންނާ ބައްދަލުކޮށްވެސް ހެދޭނެއެވެ.

އެހެންނަމަވެސް ޔާމިންގެ ބަންދަށް މި ގެނައި ބަދަލާއި ގުޅޭގޮތުން އެމަނިކުފާނުގެ ގާނޫނީ ވަކީލުންގެ ފަރާތުން އަދި އެއްވެސް މައުލޫމާތެއް ހާމަކޮށްފައެއް ނުވެއެވެ. ޑރ. މިއުއްޒު ރިޔާސީ އިންތިޚާބު ކާމިޔާބު ކުރެއްވުމަށްފަހު، ޔާމިން ގެއަށް ބަދަލު ކޮށްފައިވަނީ މި އޮކްޓޯބަރުމަހުގެ 1 ވަނަ ދުވަހުއެވެ.