2021 ވަނަ އަހަރުގެ މެއިމަހު ކުރީގެ ރައީސް ނަޝީދު އަވަހާރަ ކޮށްލަން ދިން ހަމަލާއާއި ގުޅުން އޮތީ ހަރުހަށި ފިކުރާ ކަމަށާއި، އެމަނިކުފާނު އަވަހާރަ ކޮށްލަން ދިން ހަމަލާގެ ފަހަތުގައި ސިޔާސީ ސަބަބެއް ނެތްކަމުގައި އެ މައްސަލައިގެ ތަހުގީގަށް ރައީސް އިބްރާހިމް މުހައްމަދު ސޯލިހު އައްޔަން ކުރެއްވި ރާއްޖެ އިން ބޭރުގެ މަންދޫބު އައްބާސް ފާއިޒް މިއަދު ވިދާޅުވެއްޖެއެވެ.
ނަޝީދު އަވަހާރަކޮށްލަން ދިން ބޮމުގެ ހަމަލާގެ ތަހުގީގާއި ގުޅޭގޮތުން މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އައްބާސް ފާއިޒު ވިދާޅުވީ އެމައްސަލާގެ ތަހުގީގު ކުރިޔަށް ދިޔައިރު ހަރުކަށި ފިކުރުގެ މީހުންގެ އިތުރުން އިތުރު 3 ބައެއްގެ މައްޗަށް ތުހުމަތު ކުރެވިގެން ދިޔަކަމަށެވެ.
އެގޮތުން އޭނާ ފާހަގަ ކުރެއްވީ، އިދިކޮޅު ޕާޓީއާއި އާއި ސަރުކާރާއި ދެން އެމްއެމްއާރުސީގެ ޚިޔާނާތާއި ގުޅުންހުރި ފަރާތްތަކެވެ. އެހެންނަމަވެސް މިއިން އެއްވެސް ފަރާތެއްގެ ބައިވެރިވުން ހަމަލާގައި އޮތްކަމުގެ އެއްވެސް ހެއްކެއް ތަހުގީގަށް ފެނިފައި ނުވާކަމަށް އޭނާ ވިދާޅުވިއެވެ.
އޭނާ ވިދާޅުވީ ބުމުގެ ހަމަލާއާއި ގުޅޭގޮތުން ކުރިޔަށް ގެންދެވިފައިވަނީ ވަރަށް ފުރިހަމަ ތަހުގީގެއް ކަމުގައެވެ.
އިދިކޮޅާއި އަދި ސަރުކާރުގެ ފަރާތަކުން ރައީސް ނަޝީދު މަރާލުމަށް ދިން ހަމަލާގައި ބައިވެރިވި ކަމުގެ އެއްވެސް ހެއްކެއް ފެނިފައެއް ނުވޭ. ހަމަ އެހެންމެ އެމްއެމްޕީއާރުސީގެ މައްސަލައިގައި ޝާމިލުވާ ފަރާތްތަކުން ވެސް ހަމަލާގައި ބައިވެރިވަކަމުގެ ހެއްކެއް ނެތް. އެމްއެމްޕީއާރުސީގެ ލިސްޓު ހާމަކުރައްވާނެ ކަމަށް ރައީސް ނަޝީދު ވިދާޅުވުމުގެވެސް ކުރިން އެ ހަމަލާތައް ދިން މީހުން ދިޔައީ އެ ހަމަލާ ދޭން ތައްޔާރުވަމުން.
ތަހުގީގުގެ ހޯދުންތަކާއި ގުޅޭގޮތުން އައްބާސް ވިދާޅުވިއެވެ.
އައްބާސް ވިދާޅުވީ ހަމަލާ ދިން މީހުންނާ ހަރުކަށި ފިކުރުގެ މީހުންނާ ގުޅުން އޮތްކަމަށް ތަހުގީގަށް ފާހާގަ ކުރެވުނު ކަމުގައެވެ.
ނަޝީދަށް އަމާޒުކޮށް ދިން ބޮމުގެ ހަމަލާއާއި އެއްވެސް ސިޔާސީ ގުޅުމެއް ނެތްކަމަށް އައްބާސް ފާއިޒު ވިދާޅުވިނަމަވެސް، ނަޝީދަށް ތާއީދުކުރާ ފަރާތްތަކުން ބުނަމުންދަނީ އެހަމަލާއާއި ރައީސް ސަލިހަށް ތާއީދުކުރާ ފަރަތްތަކާއި ގުޅުން އޮތް ކަމަށެވެ. އަދި ހަމަލާގެ ފަހަތުގައި ތިބި މީހުން ހޯދާ އިންސާފު ގާއިމް ކުރުމަށް ސަރުކާރުން އެކަށިގެންވާ މަސައްކަތެއް ކޮށްފައި ނެތްކަމަށްވެސް ނަޝީދަށް ތާއީދުކުރާ ފަރާތްތަކުން ތުހުމަތު ކުރެއެވެ.
