ސިވިލްސާވިސްގެ މުވައްޒަފުން ބަންދު ދުވަސްތަކުގައި މަސައްކަތް ކުރާނަމަ ހާޒިރީ އެލަވަންސް ލިބޭގޮތަށް ދައުލަތުގެ ޕޭ ފްރޭމްވާރކަށް ބަދަލު ގެނެސްފިއެވެ.
ފިނޭންސް މިނިސްޓްރީން މިހާރު އާންމު ކޮށްފައިވާ ޕޭ ފްރޭމްވާރކުގައި ވާގޮތުން، ސިވިލްސާވިސް މުވައްޒަފުން ރަސްމީ މަސައްކަތު ދުވަސްތަކުގެ އިތުރަށް ހުކުރުދުވަސްވެސް ހިމެނޭގޮތުން ބަންދު ދުވަސްތަކުގައި ޑިއުޓީއަށް ނިކުންނަނަމަ ހާޒިރީ އެލަވަންސް ލިބޭނެއެވެ.
އެހެންނަވެސް މި އެލަވަސް ލިބޭގޮތަށް ކަނޑައަޅާފައިވަނީ، ވަޒީފާއާބެހޭ ގާނޫނުގައި ކަނޑައަޅާފައިވާ ރަސްމީ މަސައްކަތު ގަޑީގެ ޖުމްލަ ވަގުތުގެ ދެބައިކުޅަ އެއްބައި މަސައްކަތް ކުރާންޖޭހޭ ހާލަތުގައި އެކަންޏެވެ.
ދައުލަތުގެ ޕޭ ފްރޭމްވާކުގައި ކުރިން އޮންނަގޮތުން ހާޒިރީ އެލަވަންސް ލިބެނީ މުވައްޒަފުން އޮފީހަށް ހާޒިރުވާ ރަސްމީ މަސައްކަތު ދުވަސްތަކަށް އެކަންޏެވެ. އޮފީހަށް ހާޒިރުވެގެންނާއި އަދި އޮންލައިންކޮށް މަސައްކަތް ކުރިނަމަވެސް މި އެލަވަންސް ލިބެއެވެ. އެހެންނަމަވެސް މިއީ މީގެ ކުރިން، ރަސްމީ ބަންދުދުވަސްތަކުގައި ލިބޭގޮތަށް އޮންނަ އެލަވަންސެއް ނޫނެވެ.
އުސޫލަށް މި ގެނައި ބަދަލުގައިވާގޮތުން، އޮފީހަށް ހާޒިރުވުން ކަމަށް މާނަކޮށްފައިވަނީ ޖިސްމާނީގޮތުން އޮފީހަށް ހާޒިރުވުމާއި އަދި އޭގެ އިތުރުން އޮންލައިންކޮށް މަސައްކަތް ކުރާނަމަ "ސައިން-އިން" ވެގެން އޮންލައިންކޮށް މަސައްކަތް ކުުރުމުންނެވެ.
މި ގެނެވުނު ބަދަލާއެކު، އޮފީހުގެ ފަރާތުން ރާއްޖެއިން ބޭރަށާއި ރަށްރަށަށް ކުރާންޖެހޭ ރަސްމީ ދަތުރުގެ ދުވަސްތަކަށްވެސް ހާޒިރީ އެލަވަސް ލިބޭގޮތަށް ހަމަޖެހިގެން ދާނެއެވެ.
