އއ. އުކުޅަހުގައި ކާނި ހޮޓެލްސް އެންޑް ޓުއާސްގެ ފަރާތުން އަޅާ ސިޓީ ހޮޓާގެ މަސައްކަތް ހަލުވިކަމާއެކު، ކުރިއަށްދާ ކަމަށް އެ ކުންފުނިން ބުނެފިއެވެ.
އުކުޅަހުގައި ސިޓީ ހޮޓަލެއް އެޅުމަށް ކާނި ހޮޓެލްސް އާއި އެ ރަށު ކައުންސިލާ ދެމެދުގައި އެއްބަސްވުމެއްގައި ސޮއިކުރީ މިދިޔަ ނޮވެމްބަރު މަހުގެ 22 ގައެވެ. މި މަޝްރޫއު ނިންމުމަށް އެއްބަސްވުމުގައި ކަނޑައަޅާފައި ވަނީ ދެ އަހަރު ދުވަހުގެ ތެރޭގައެވެ.
Kaani Haven Beach, Ukulhas 3rd slab completed. 137 room tourist hotel. @aasisaleem @kaanihotels @visitmaldives @MoTmv #localislandtourism #visitmaldives pic.twitter.com/HfGxYYLEhI
— Abdulla Nasheed (@kaaniablo) October 23, 2023
ކާނި ހޮޓެލްސްގެ އޮފިޝަލަކު މިއަދު ވިދާޅުވީ އުކުޅަހުގައި އަޅާ ސިޓީ ހޮޓަލުގެ މަސައްކަތް ވަރަށް ހަލުވިކަމާ އެކުގައި ކުރިއަށްދާ ކަމަށެވެ. އަދި މަސައްކަތްދާ ގޮތުން އެއްބަސްވި މުއްދަތުގެ ކުރިން ނިންމާލެވޭނެ ކަމަށް އުންމީދު ކުރައްވާ ކަމަށް ވެސް އޭނާ ވިދާޅުވިއެވެ.
"އަޅުގަނޑުމެން އުންމީދު ކުރަނީ 2025 ގެ އޭޕްރީލް މަހުގައި މަސައްކަތް އެއްކޮށް ނިންމާލެވޭނެ ކަމަށް. ހުރިހާ މަސައްކަތެއް ނިންމާފައި މި ތަން ހުޅުވާލަން ނިންމާފައި އޮތީ." ދިހަ ބުރީގެ އިމާރާތާ ގުޅޭ ގޮތުން ކާނި ހޮޓެލްސްގެ އޮފިޝަލް ވިދާޅުވިއެވެ.
އޭނާ ވިދާޅުވި ގޮތުގައި 250 އެނދުގެ އަދި 137 ކޮޓަރި ހިމެނޭ ސިޓީ ހޮޓަލްގެ ތިން ވަނަ ޝީޓް އަޅާ މިހާރު ވަނީ ނިމިފައެވެ.
މި ޕްރޮޖެކްޓްގެ ސަބަބުން އުކުޅަސް ރައްޔިތުންނަށާއި މުޅި ޓޫރިޒަމް އިންޑަސްޓްރީ އަށް ވެސް އޭގެން ފައިދާ ވާނެ ކަމަށް ވިދާޅުވިއެވެ.
މި ސިޓީ ހޮޓާ އެޅުމަށް އުކުޅަސް ބީޗް ފްރަންޓުން 7،808 އަކަ ފޫޓުގެ ބިމެއް ކާނި އަށް ދީފައިވެއެވެ. އުކުޅަހަކީ ރާއްޖޭގެ ރަށްތަކުގެ ތެރެއިން ލޯކަލް ޓޫރިޒަމް އެންމެ ބޮޑަށް ފުޅާވެފައި އޮތް އެއް ރަށެވެ. އުކުޅަހުގައި މިހާރު ވެސް 33 ގެސްޓްހައުސް ހުންނަ އިރު، އެއީ 680 އެނދެވެ.
