ނޭމާގެ ތިންލަނޑާއެކު އެއްވަނައިގަ ޕީއެސްޖީ ދެވަނަބުރަށް

ޔޫއެފާ ޗެމްޕިއަންސް ލީގުގައި ގުރޫޕްގެ ފަހު މެޗު ކާމިޔާބުކޮށް ގުރޫޕްގެ އެއްވަނައިގައި ޕީއޭސްޖީ މުބާރާތުގެ ދެވަނަބުރުން ޖާގަހޯދައިފިއެވެ.

ނަސްލީތަފާތު ކުރުމުގެ މައްސަލައެއް ދިމާވެގެން ހުއްޓިލާ މެޗު އަލުން ކުޅުނު ޕީއެސްޖީ ކާމިޔާބުކުރީ ބަސަކްޝީރްއާ ވާދަކޮށް 5-1 ލަނޑުންނެވެ. މެޗަށް ނުކުތްއިރުވެސް  ގުރޫޕްގައި ހިމެނޭ މެންޗެސްޓަރ ޔުނައިޓެޑު ބަލިވުމުން މުބާރާތުގެ ދެވަނަ ބުރުގެ ޖާގަކަށަވަރުކޮއްފަވާ ޕީއެސްޖީ އަށް ރޭގެ މެޗުގައި ނޭމާ ތިން ލަނޑު ކާމިޔާބުކުރި އިރު އަނެއް ދެލަނޑު ޖެހީ އެމްބާޕޭއެވެ.

އެމްބާޕޭ ވަނީ މުބާރާތުގެ ތާރީހުގައި 20 ލަނޑު ހަމަކުރި ފުރަތަމަ ކުޅުންތެރިޔާއަށް ވެފައެވެ. ނޭމާ ޖެހި ތިންލަނޑާއެކު އޭނާ ވަނީ މުބާރާތުގެ ތާރީހުގައި ތިން ފަހަރު ހެޓްރިކް ހަދާފައެވެ. ރޭގަ ޖެހި ތިން ލަނޑާއެކު ނޭމާ ވަނީ މުބާރާތުގައި ޔޫރަޕުގެ ދެ ކުލަބަކަށްކުޅެ 20 ލަނޑުހަމަކުރި ފުރަތަމަ ކުޅުންތެރިޔާއަށެވެ.

މުބާރާތުގައި މިހާތަނަށް ޖެހި 40 ލަނޑާއެކު ނޭމާ ވެފައިވަނީ އެއަދަދަށް ލަނޑުޖެހި ބްރެޒިލްގެ ފުރަތަމަ  ކުޅުންތެރިޔާއަށެވެ. ގުރޫޕްގައި ކުޅުނު 6 މެޗުން 12 ޕޮއިންޓް ހޯދައިގެން ޕީއެސްޖީ އެއްވަނަ ލިބުނީ ލަނޑުގެ ތަފާތުންނެވެ. ދެން މިގުރޫޕުން މުބާރާތުގެ ދެވަނަ ބުރަށް ދިޔައީ ޖަރުމަނުގެ ލީޕްޒިގްއެވެ.