ފަލަސްތީނުގެ މުސްލިމުންގެ ހައްޤުގައި އަދާލަތު ޕާޓީ އާއި ސެއިޚް އިމްރާން ޢަބްދުﷲ ކުރެއްވިވަރަށް މަސައްކަތްކުރި ދިވެހި މީހެއް ނުހުންނާނެކަމަށް އިހަވަންދޫ ދާއިރާގެ މެންބަރު މުޙައްމަދު ޝިފާޢު ވިދާޅުވެއްޖެއެވެ. އޭނާ މިހެން ވިދާޅުވީ، ޝައިޚް ޢިމްރާން ހޯމް މިނިސްޓަރަކަށް ހުންނަވައި، 2021 ވަނަ އަހަރު ފަލަސްތީނުގެ ރައްޔިތުންގެ ހައްގުގައި އަޑުއުފުލަށް ބޭއްވި ސައިކަލު ބުރު ހުއްޓުވުމަށްފަހު، ފަލަސްތީނުގެ ރައްޔިތުންގެ ހައްގުގައި ނިކުތުމުން، އެމަނިކުފާނަށް ފާޑުކިޔުން އަމާޒުވެފައިވަނިކޮށެވެ.
ޝިފާޢު ވިދާޅުވީ، ފަލަސްތީނުގެ މުސްލިމު އަހުންނާއި އުޙުތުންގެ ހައްޤުގައި އަދާލަތު ޕާޓީ އާއި ޝެއިޚް ޢިމްރާން ކުރެއްވިވަރަށް މަސައްކަތް ކުރެވުން ދިވެހި އެހެން ޖަމައަތެއްވެސް ފަރުދެއްވެސް ނުހުންނާނެކަމަށެވެ.
އިމްރާން ވަނީ ފަލަސްޠީނުގެ ހައްގުގައި ތެދުވުމަށް ގޮވާލާފައެވެ. އަދި އެއްވުމެއް ބޭއްވުމަށްވެސް ރޭވިއެވެ. ނަމަވެސް ގިނަ ބައެއްގެ ފާޑުކިޔުން އަމާޒުވިއެވެ.
އިމްރާން މީގެ ކުރިން ވިދާޅުވެފައިވަނީ، މުުޅި އުންމަތް އެއްބައިވެ އެކަތިގަނޑަކަށްވާންވީ ވަގުތު މިއޮތީ ޖެހިފައި ކަމަށެވެ.
"ފަރުދީ ތަފާތު ތަކާ މަސްލަހަތުތައް އެއްފަރާތް ކޮށްގެން މެނުވީ އުންމަތުގެ ކަރާމަތާއި، ޝަރަފާ، އިއްޒަތް ސަލާމަތްވާނެ ހަމަ އެއްގޮތެއްވެސް ނެތް." އިމްރާން ވިދާޅުވިއެވެ.
އިމްރާން ވިދާޅުވީ ކޮންމެ މުސްލިމަކު އެމީހެއްގެ ދައުރު ފުރިހަމައަށް އަދާކުރަން ޖެހޭ ކަމަށެވެ.
