ޖެހިޖެހިގެން ދެވަނަ ހަފުތާ ބަންދުގައި ލަންޑަނުގައި ފަލަސްތީނަށް ތާއީދުކޮށް ކުރި މުޒާހަރާގައި އެތައް ހާސް ބަޔަކު ބައިވެރިވެއްޖެ އެވެ.
އިނގިރޭސިވިލާތުގެ ވެރިރަށް ލަންޑަންގެ ޑައުނިން ސްޓްރީޓް ކައިރީގައި ބޭއްވި އެއްވުމަކުން ނިމިގެން ދިޔަ މި ހިނގާލުމުގައި އެއް ލައްކައެއްހާ މީހުން ބައިވެރިވި ކަމަށް މެޓް ފުލުހުން ލަފާކުރެ އެވެ. މީގެ އިތުރުންވެސް، އިނގިރޭސިވިލާތުގެ ބައެއް ސިޓީތައް ކަމުގައިވާ ބާމިންހަމް، ބެލްފާސްޓް، ކާޑިފް އަދި ސަލްފޯޑްގައި ކުދި ކުދި މުޒާހަރާތައް ވަނީ ކުރިއަށް ގެންގޮސްފަ އެވެ.
އިންގިރޭސިވިލާތުގައި ފަލަސްތީނަށް ތާއީކޮށް މުޒާހިރާ ކޮށްފައި މިވަނީ، ހަމާސް ޖަމާއަތުން އިސްރާއީލުގައި ދިން ހަމަލާއެއްގައި 1،400 މީހުން ޝަހީދުކޮށްލުމާ ގުޅިގެން އިސްރާއީލުން ގާޒާ ހިސާރުކޮށް އެސިޓީ ބަންދު ކުރި ފަހުން ފުރަތަމަ ފަހަރަށް ޣައްޒާއަށް އެހީ ފޯރުކޮށްދޭ ފަށަފައި ވަނިކޮށެވެ.
ފަލަސްތީނުގެ އޮފިޝަލުން ވިދާޅުވާ ގޮތުގައި އިޒްރޭލުން ދިން ބޮމުގެ ހަމަލާތަކުގައި މިހާތަނަށް ފަލަސްތީނުގެ 4،000 އަށް ވުރެ ގިނަ މީހުން ވަނީ ޝަހީދުވެފައެވެ.
އިނގިރޭސި ފުލުހުން ބުނެފައިވަނީ، ލަންޑަންގައި ކުރިޔަށްދިޔަ މުޒާހިރާތަކުގެ ސަލާމަތީކަންކަން ބެހެއްޓުމުގައި 1000 އަށް ވުރެ ގިނަ ފުލުސް އޮފިސަރުން ހަރަކާތްތެރިވި ކަމަށެވެ.
އިނގިރޭސިވިލާތުގެ ކާޑިފްގައި ފަލަސްތީނުގެ ދިދަތަކާއި ތާއީދުކުރާ ބޯޑުތައް ހިފައިގެން ތިބި ގާތްގަނޑަކަށް 1000 އެއްހާ މީހުން ވަނީ ވޭލްސްގެ ޕާލަމެންޓާ ދިމާލަށް ހިނގާލުމެއްގައި ބައިވެރިވެފަ އެވެ. މި މުޒާހަރާ އިންތިޒާމްކޮށްފައިވަނީ ޣައްޒާގައި ވަގުތުން ހަނގުރާމަ ހުއްޓާލުމަށް ބާރު އެޅުމަށާއި އިންސާނީ އެހީތެރިކަން ފޯރުކޮށްދިނުމަށް އިނގިރޭސިވިލާތަށާއި ވޭލްސްގެ ސަރުކާރަށް ގޮވާލަމުންނެވެ.
ފަލަސްތީނުގެ ސޮލިޑަރިޓީ ކެމްޕޭން ކާޑިފްގެ ފަރާތުން މެގީ މޯގަން ވިދާޅުވި ގޮތުގައި އެމީހުން މަގުތަކަށް ނުކުންނަނީ ޣައްޒާގެ ރައްޔިތުންނަށް އެއްބައިވަންތަކަން ދެއްކުމުގެ ގޮތުންނާއި، އެ މީހުންނަށް ތާއީދު ކުރާކަން ދެއްކުމުގެ ގޮތުން ކަމަށެވެ. އަދި ސަރުކާރަށް އެމީހުންގެ އަޑުތަށް އިއްވުމަށް ކަމަށްވެސް ބުނެފައި ވެއެވެ.
އިސްރާއީލުން ޣައްޒާއަށް ތެލާއި ކަރަންޓާއި ފެނުގެ ސަޕްލައި ކަނޑާލީ މިދިޔަ އޮކްޓޯބަރު މަހުގެ 7 ވަނަ ދުވަހު ހަމާސްގެ އަސްކަރީ ގޮފިން ބޯޑަރު ހުރަސްކޮށް އިސްރާއީލަށް ވަދެ މީހުން މަރާލައި 200 އަށް ވުރެ ގިނަ މީހުން ރަހީނުކުރުމާ ގުޅިގެންނެވެ.
އޭގެ ފަހުން އިސްރާއީލުން ވަނީ ޣައްޒާއަށް ވައިގެ މަގުން ހަމަލާ ދޭން ފަށާފައެވެ. މި ޙަމަލާތަކުގެ ސަބަބުން ޣައްޒާގެ ގާތްގަނޑަކަށް 1.4 މިލިއަން މީހުން ގެދޮރު ގެއްލިފައިވާއިރު، އދ.ގެ 147 ހިޔާގައި ބައި މިލިއަނަށްވުރެ ގިނަ މީހުން ދިރިއުޅެމުންދާކަމަށް އދއިން ބުނެއެވެ. އަދި ފަލަސްތީނުގެ 4،000 އަށްވުރެ ގިނަ މީހުން މިހާތަނަށް އައިއިރުވަނީ ޝަހީދު ވެފައެވެ.
