އިސްރާއީލްގެ އަސްކަރިއްޔާ އިން ފަލަސްތީނުގެ ޣައްޒާ އަށް ބޮން އަޅައި، އެ ތަނުގައި ހުރި ތާރީހީ މިސްކިތެއް ސުންނާފަތިކޮށްލައިފިއެވެ.
ޔަހޫދީން ބޮން އަޅައި ފުނޑުފުނޑުކޮށްލީ ޣައްޒާގެ ޖަބަލިއާގައި ހުންނަ ތާރީހީ މިސްކިތެއް ކަމަށްވާ އަލް އުމަރީ މިސްކިތެވެ. ނަސޯރާއިންގެ ފައްޅިއެއްގެ ގޮތުގައި ހުރި މި ތަން މިސްކިތަކަށް ބަދަލު ކުރެވިފައިވަނީ މީލާދީ ގޮތުން ހަ ވަނަ ގަރުނުގައި ޚަލީފާ އުމަރު ބިން ޚައްތާބު ގެ ހިލާފަތުގައި، މުސްލިމް ލީޑަރު އަމްރު އިބްނި އަލް އާސް ޣައްޒާ ފަތަހަ ކުރެއްވުމަށް ފަހުގައެވެ.
މި މިސްކިތަކީ މުސްލިމުން ޣައްޒާ ފަތަހަ ކުރުމަށްފަހު ޣައްޒާގައި ހުކުރު ނަމާދު ކުރުމުގެ ޝަރަފް ލިބިގެންދިޔަ ފުރަތަމަ މިސްކިތެވެ. އެ މިސްކިތް ބިނާ ކުރެވުނު ފަހުންވެސް މިއަދާއި ހަމައަށް އެތަނަށް ބޮޑެތި ބަދަލުތަކެއް އައެވެ. އެ މިސްކިތް ފުޅާ ކޮށްފައިވަނީ އިސްލާމީ އުންމަތުގެ އެންމެ ފަހު ހިލާފަތް ކަމަށްވާ އުސްމާނީންގެ ވެރިކަމުގައި މަމްލޫކް ސުލްތާން ނާސިރު މުހައްމަދުގެ ވެރިކަމުގައެވެ.
އޮކްޓޯބަރު މަހުގެ 7 ވަނަ ދުވަހުން ފެށިގެން އިސްރާއީލުން ޣައްޒާއަށް ދެމުންދާ ހަމަލާތަކުގައި ފަލަސްތީނުގެ 4،137 މީހުން ޝަހީދުވެ، 13،000 އަށް ވުރެ ގިނަ މީހުން ޒަޚަމްވެފައިވާ ކަމަށް ފަލަސްތީނުގެ ސިއްހަތާ ބެހޭ ވުޒާރާއިން ބުނެފައިވެއެވެ.
މީގެ ތެރޭގައި މީގެ އެއް ދުވަސް ކުރިން، އިސްރާއީލުގެ އަސްކަރިއްޔާއިން ޣައްޒާގައި ހުރި ހިސްޕިޓަލަށް ބޮންއަޅާ ޝަހީދު ކޮށްލި 471 އަށްވުރެ ގިނަ މީހުންވެސް ހިމެނެއެވެ.
އިސްރާއީލިން ފަލަސްތީނުގެ ޣައްޒާއަށް އުދުވާނީ ހަމަލާ ދެމުންދަނީ، ފަލަސްތީނުގެ ހަމާސް ޖަމާއަތުން އިސްރާއީލަށް ދިން ކުއްލި ހަމަލާއެއްގައި އެގައުމުގެ 1،400 އަށްވުރެ ގިނަ މީހުން މަރާލާ، އިސްރާއީލުގެ 150 އަށްވުރެ ގިނަމީހުން ރަހީނު ކުރުމާއި ގުޅިގެން ބަދަލު ހިފުމުގެ ގޮތުންނެވެ.
