ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ވާދަކުރައްވަން، ކުރީގެ ޕްރޮސެކިއުޓަރ ޖެނަރަލް އަލްއުސްތާޒް އަޙްމްދު މުޢިއްޒު ނިންމަވައިފިއެވެ.
މުޢިއްޒު ކުރެއްވި ޓްވީޓެއްގައި ވިދާޅުވީ، ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި މާލޭގެ ދާއިރާއެއްގެ މެންބަރުކަމަށް ކުރިމަތިލުމުގެ ވިސްނުން ގެންގުޅުއްވާކަމަށެވެ. ނަމަވެސް ވާދަކުރައްވަނީ މާލޭގެ ކޮން ދާއިރާއަކަށްކަމެއް މުޢިއްޒު ވިދާޅެއް ނުވެއެވެ.
20 ވަނަ ރައްޔިތުންގެ މަޖިލީހުގެ އިންތިޚާބު އޮންނާނީ އަންނަ އަހަރުގެ އޭޕްރީލަމުގެ ކުރީކޮޅު ނުވަތަ މާރިޗް މަހުގެ ފަހުކޮޅުއެވެ. އައު މަޖިލިސް ހުވާ ކުރައްވާނީ މެއި މަހުގެ ތެރޭގައެވެ.
އައު މަޖިލީހުގައި 93 ދާއިރާ ހިމެނެއެވެ. މިހާރު ހިނގަމުންދާ މަޖިލީހުގައި ހިމެނެނީ 87 ދާއިރާއެވެ. އަންނަ ދައުރަށް އިތުރުވަނީ މާލޭގެ ދާއިރާތަކެވެ. އަންނަ އިންތިޚާބަށް ވާދަކުރައްވާ ބައެއް ފަރާތްތަކުން އަންނަނީ އެކަން އިއުލާންކޮށް ކެމްޕެއިން ކުރަމުންނެވެ.
މުޢިއްޒު ވާދަކުރައްވަނީ އެއްވެސް ސިޔާސީ ޕާޓީއަކުންކަމެއްވެސް ހާމަކުރައްވާފައެއް ނުވެއެވެ.
