އައިޖީއެމްއެޗްގެ އެންމެ ބޮޑު ދެ ސެންޓަރުކަމަށްވާ ހިތުގެ ބަލިތަކުގެ ޚާއްޞަ މަރުކަޒާއި، ނާރުގެ ބަލިތަކުގެ ޚާއްޞަ މަރުކަޒުގެ ހިންގުން ހަވާލުކޮށްފައިވާ ފަރާތްތަކަށް 5.3 މިލިއަން ޑޮލަރު ނުދައްކާ ހުރިކަން ފާހަގަވެފައިވާކަމަށް އިންތިޚާބީ ރައީސްގެ އޮފީހުން ބުނެފިއެވެ.
އިންތިޚާބީ ރައީސްގެ އޮފީހުން ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން އިންތިގާލީ މަރުހަލާގެ ތަރުޖަމާން މުޙައްމަދު ފިރުޒުލް ވިދާޅުވީ، އައިޖީއެމްއެޗްގެ ބައެއް ސެންޓަރުތަކަކީ ބޭރުގެ ބައެއް ތަންތަނާއި ގުޅިގެން ފަރުވާދޭ މަރުކަޒުތަކެއްކަމަށެވެ. އޭގެތެރޭގައި ނާރު އަދި ހިތުގެ ބަލިތަކުގެ ޚާއްޞަ މަރުކަޒު ފާހަގަކުރެއްވިއެވެ.
އައިޖީއެމްއެޗްގެ ނެޝަނަލް ކާޑިއެކް ސެންޓަރާއި ޔޫރޯ-ރީޖަނަލް އެންޑް ފާޓިލިޓީ ސެންޓަރު ހިންގަނީ އިންޑިއާގެ ހޮސްޕިޓަލުތަކަކާއި ގުޅިގެންނެވެ.
ފިރުޒުލް ވިދާޅުވީ އެތަންތަނަށް ދައްކަންޖެހޭ ބިލުތަކަށް ނުވަތަ ޚިދުމަތްތަކަށް ފައިސާ ނުދައްކާ އެބަހުރިކަމަށެވެ. އެކަމަށް ބެޖެޓު ނެތުމުން ފައިސާ ނުދައްކާހުރިކަން ފާހަގަކުރައްވަމުން ފިރުޒުލް ވިދާޅުވީ އެ އަދަދު 5.3 މިލިއަން ޑޮލަރަށް އަރާކަމަށެވެ.
މިސާލަކަށް ހިތުބެ ބަލިތަކުގެ ފަރުވާއަށް ބޭނުންކުރާ ސްޓަންޓު، ބެލޫން އަދި އެންޖީއޯ ގްރާމް ހެދުމަށް ބޭނުންކުރާ ބައެއް ކޮންޒިއުމަބަލްސް ހިމެނޭކަން. މި ބިލުތައްވެސް ނުދައްކާ ހުރުމުގެ ސަބަބުންވެސް މި ސެންޓަރތަކުގެ ޚިދުމަތް ހުއްޓުމަކަށް އައުމަކީ ނުވަތަ ޚިދުމަތް ހުއްޓުމަކަށް އައުން އެއީ އަޅުގަނޑުމެން ވަރަށް ކަންބޮޑުވާކަމެއް.
– ފިރުޒުލް ވިދާޅުވިއެވެ.
އައިޖީއެމްއެޗަށް މިއަހަރަށް ކަނޑައެޅި ބަޖެޓުން ފައިސާ ހަމަޖެހިފައިވަނީ މުވައްޒަފުންގެ މުސާރައަށް ބޭނުންވާ ފައިސާ އެކަނިކަމަށްވެސް ފިރުޒުލް ވިދާޅުވިއެވެ. އެތަނުގެ ވަސީލަތާއި މަރާމާތަށް ފައިސާ ނެތްކަމަށްވެސް ފިރުޒުލް ވިދާޅުވިއެވެ.
އަދި މެޝިނަރީތަކުގެ މަރާމާތަށްވެސް ފައިސާ ނެތުމުން ހުއްޓިފައިވާކަން ފިރުޒުލް ފާހަގަކުރެއްވިއެވެ.
މިސަރުކާރުން ސިއްޙި މަރުކްޒުގެ މޮޑެލަކީ މައި ހޮސްޕިޓަލްތައް ހިންގުން ހެލްތު މިނިސްޓްރީގެ ދައުރެއް ނެތި ހިންގުންކަމަށް ވިދާޅުވިއެވެ. އެތަންތަން ހިންގަނީ ރައީސްގެ ގަރާރަކުން ވަކި ބޯޑަކުންކަމަށާއި، ކަންބޮޑުވުމަކީ އެތަންތަނަށް ހެލްތު މިނިސްޓްރީގެ ދައުރު ނެތުންކަމަށް ފިރުޒުލް ވިދާޅުވިއެވެ. އެއއީ ސިއްހީ ދާއިރާގެ މުހިންމު ތަންތަންނަމަވެސް، ހެލްތު މިނިސްޓްރީގެ ދައުރު ނެތުމުން ފެންވަރާމެދު ސުވާލު އުފެދޭ ކަންކަން ހުރިކަމަށްވެސް ފިރުޒުލް ވިދާޅުވިއެވެ.
ޤާނޫނުގައިވާގޮތުން ސިއްޙީ ތަންތަނުގެ ފަރާތުން ޖަވާބުދާރީވާންޖެހޭނީ ހެލްތު މިނިސްޓަރުކަމަށާއި، ނަމަވެސް ވަކިވަކިން ހިންގާތަންތަނުން ޖަވާބު ދާއިރީވުމުގައި ދަތިތައް ހުރިކަމަށްވެސް ފިރުޒުލް ވިދާޅުވިއެވެ.
