މިހާރު ހިނގަމުންދާ އިސްރާއީލް-ހަމާސް ހަނގުރާމާގައި އިސްރާއީލުން ޣައްޒާއަށް ދެމުންދާ އުދުވާންގައި، ޣައްޒާގައި ފަލަސްތީނުން ޝަހީދުވި މީހުންގެ އަދަދު 1100 އަށް އަރާފައިވާ ކަމަށް ވަށާލާފައިވާ ޣައްޒާގެ ސިއްހަތާ ބެހޭ ވުޒާރާއިން ބުނެފިއެވެ. އަދި އޭގެ އިތުރުން މި ހަމަލާތަކުގައި މިހާތަނަށް ފަލަސްތީނުގެ 5،339 މީހުން ޒަޚަމްވެފައިވާކަމަށްވެސް ޣައްޒާގެ ހެލްތު މިނިސްޓްރީން ބުނެފައި ވެއެވެ.
މިހަފްތާގެ ހޮނިހިރުދުވަހު ހަމާސްޖަމާއަތުން އިސްރާއިލަށް ދިން ކުއްލި ހަމަލާތަކަށްފަހު އިސްރާއީލުން ފަލަސްތީނުގެ ރައްޔިތުންނާއި ދެކޮޅަށް ފެށި ހަމަލާތަކާއެކު، ހުޅަނގު އައްސޭރީގައި މަރުވި މީހުންގެ އަދަދު 27 އަށް އަރާފައިވާ ކަމަށް އެ މިނިސްޓްރީން ބުންޏެވެ. އަދި 150 އަށް ވުރެ ގިނަ މީހުން ވަނީ ޒަހަމްވެފަ އެވެ.
ފާއިތުވި 5 ދުވަހު ޣައްޒާއަށް އިސްރާއީލުން ދޭންފެށި ހަމަލާތަކަށް ހުއްޓުމެއް އައިސްފައި ނުވާއިރު، އިސްރާއީލުން މިހާރުވަނީ ޣައްޒާއަށް ކާނާއާއި ތެލާއި އަދި ފެން ސަޕްލައި ކުރުން ހުއްޓުވާފައެވެ. އަދި މަދު ގަޑިއިރުތަކެއްގެ ތެރޭގައި ޣައްޒާއަށް ކަރަންޓު ފޯރުކޮށްދޭ ހަމައެކަނި ޕަވަރ ޕްލާންޓު ހުއްޓުމަކަށް އަންނާނޭ ކަމަށްވެސް ޣައްޒާގެ ރަސްމީ ފަރާތްތަކުން ވަނީ ހާމަކޮށްފައެވެ.
ހަމާސް ޖަމާއަތުން އިސްރާއީލަށް ދިން ކުއްލި ހަމަލާތަކަށްފަހު އިސްރާއީލުގެ އެތައްހާސް ސިފައިންނެއް މިހާރުވަނީ ޣައްޒާގެ ބޯޑަރު ކައިރިއަށް ޖަމާކޮށްފައެވެ. މަސްރަހު ދިރާސާކުރާ ފަތާތްތަކުން ބުނަމުންދަނީ އިސްރާއީލުން ތައްޔާރުވަމުން ދަނީ އެއްގަމުން މަގުން ޣައްޒާއަށް އެރުމަށް ކަމުގައެވެ.
