އިޒްރާއީލުގެ ޔަހޫދީން ފަލަސްތީނުގެ ރައްޔިތުންނަށް ދެމުންގެންދާ ލާއިންސާނީ އަނިޔާ އެއްމެ ހަރުކަށި އިބާރާތުން ކުށްވެރި ކުރާ ކަމަށާއި، އެ އަނިޔާތައް މިހާރުން މިހާރަށް ހުއްޓާލުމަށް ގޮވާލާކަމަށް އެމްއެންޕީ ރައީސް އަދި ރައްޔިތުންގެ މަޖިލީހުގެ ދަނގެތީ ދާއިރާގެ މެމްބަރު ކާނަލް (ރިޓަޔާޑް) މުހައްމަދު ނާޒިމް ގޮވާލައްވާފިއެވެ.

ރޭ ކުރިއަށް ދިޔަ އެމްއެންޕީގެ 09 ވަނަ ގައުމީ ހިންގާ ކައުންސިލްގެ ބައްދަލުވުމުގައި ވާހަކަ ދައްކަވަމުން ނާޒިމް ވިދާޅުވީ، އިޒްރާއީލުން ފަލަސްތީނުގެ ރައްޔިތުންނަށް ދެމުންގެންދާ އަނިޔާ ތަކަކީ ބައިނަލްއަގްވާމީ މުއާހަދާތަކާވެސް ޚިލާފު، އަދި ލާއިންސާނީ އަނިޔާ ތަކެއް ކަމަށާއި، އެހެންކަމަށްވުމާއެކު، މިހާރުން މިހާރަށް ހަމަލާތައް ހުއްޓާލުމަށް ގޮވާލާކަމަށެވެ.

އިޒްރޭލުން ފަލަސްތީނުގައި ދެމުން ގެންދާ އުދުވާނީ ހަމަލާތައް މިޕާޓީގެ ފަރާތުން އެއްމެ ހަރުކަށި އިބާރާތުން ކުށްވެރި ކުރަން. އަދި މި އުދުވާނީ ހަމަލާތައް މިހާރުން މިހާރަށް ހުއްޓާލާ، ބައިނަލްއަގްވާމީ މުއާހަދާތަކާއި އެއްގޮތްވާ ގޮތުގެ މަތީން އަމަލުކުރުމަށް މި ޕާޓީގެ ފަރާތުން އިޒްރޭލަށް ގޮވާލަން. އަދި ފަލަސްތީނުގެ ރައްޔިތުންނާއި އެކު ތިބިކަން ދައްކައިދިނުމުގެ ގޮތުން، މިޕާޓީގެ ހެޑްއޮފީހުގައި ހަރުކޮށްފައިވާ އެލްއީޑީ ބޯޑުގައި، އިޝްތިހާރެއް އަބަދުވެސް ދައްކަމުންދާނެ ވާހަކަވެސް ދަންނަވާލަން.

– ނާޒިމް ވިދާޅުވިއެވެ.

އަދި އެމްއެންޕީ ދެމިތިބޭނީ އަބަދުވެސް ފަލަސްތީނުގެ ރައްޔިތުންގެ ދިފާއުގައި ކަމަށާއި، 1967 އދ އިން އެކުލަވާލައިފަވާ ބޯޑަރ އާއި އެއްގޮތަށް ފަލަސްތީނަށް މިނިވަން ދައުލަތެއްގެ މަގާމު ލިބެންޖެހޭނެކަމަށް ގަބޫލުކުރާކަމަށެވެ. އަދި އިޒްރާއީލުން މިކަމަށް އިހްތިރާމްކުރުމާއެކު، ފަލަސްތީނުގެ ރައްޔިތުންގެ ހައްގުތައް ކަށަވަރުކުރުމަށް ބައިނަލްއަގްވާމީ މުޖުތަމައުއަށް ގޮވާލާކަމަށްވެސް ނާޒިމް ވިދާޅުވިއެވެ.