ކުރިއަށް އޮތް ފަސް އަހަރު އިންތިހާބީ ރައީސް ޑރ. މުހައްމަދު މުއިއްޒާއެކު ސާބިތުކަމާ އެކު ތިބޭނެ ކަމަށް މޯލްޑިވްސް ނޭޝަނަލް ޕާޓީގެ ރައީސް އަދި ދަނގެތި ދާއިރާގެ މެމްބަރު ކާނަލް (ރިޓަޔާޑް) މުހައްމަދު ނާޒިމް ވިދާޅުވެއްޖެއެވެ.
ރޭ އެމްއެންޕީގެ މައި ޖަހަގައިގަ ބޭއްވި އެޕާޓީގެ ގައުމީ ހިންގާ ކައުންސިލްގެ 09 ވަނަ ބައްދަލުވުމުގައި، ކައުންސިލް މެމްބަރަކު، ކުރިއަށް ހުރި އިންތިހާބުތަކުގައި ވާދަކުރުމާއި ބެހޭގޮތުން ފާޅުކުރެއްވި ޚިޔާލަކަށް ޖަވާބު ދެއްވަމުން، އެމްއެންޕީ ގެ ރައީސް ކާނަލް ނާޒިމް ވިދާޅުވީ، ޕީޕީއެމް ޕީއެންސީ އާއި އެކު ގުޅިގެން މަސައްކަތް ކުރުމަށް ހެދިފައިވާ އެއްބަސްވުމަކީ ކުރިއަށް އޮތް 5 އަހަރަށް އެކުލަވާލެވުނު އެއްބަސްވުމެއް ކަމަށާއި، މި އެއްބަސްވުމުގައި ކުރިއަށް ހުރި އިންތިހާބުތަކުގައި 3 ޕާޓީއިން އެކުގައި ވާދަކުރުމާއި ބެހޭގޮތުން ވަކި މާއްދާއެއް ހިމަނާފައިވާނެ ކަމަށެވެ.
ނާޒިމް ވިދާޅުވީ، ޑރ.މުހައްމަދު މުއިއްޒު އަށް ރިޔާސީ އިންތިހާބު ކާމިޔާބު ކުރުމަށް ބޭނުންވި 7 އިންސައްތަ ވޯޓު ލިބުނީ، ރިޔާސީ އިންތިހާބުގެ ދެވަނަބުރުގައި އެމްއެންޕީ އިންވެސް އެކަމަށްޓަކައި ގިނަ މަސައްކަތެއް ކޮށްގެން ކަމަށާއި، ވުމާޢެކު، ޕީޕީއެމް ޕީއެންސީގެ ސަރުކާރު ދެމެހެއްޓުމަށް އަދި ސަރުކާރު ހިންގުމަށް ދޭންޖެހޭ ފުރިހަމަ އެއްބާރުލުން، ކުރިއަށް އޮތް 5 އަހަރަށް އެމްއެންޕީ އިން ދޭނެކަމަށެވެ.
އަޅުގަނޑު ގަބޫލުކުރަން، ކުރިއަށް ހުރި އިންތިހާބު ތަކުގައި ވާދަކުރުމަށް، ޕީޕީއެމް ޕީއެންސީ އާއެކު ވެފައިވާ އެއްބަސްވުން ކައުންސިލް މެމްބަރުންނަށް އެނގެންޖެހޭނެކަމަށް. ވަރަށް އަވަސް މުސްތަގުބަލެއްގައި، ކައުންސިލް މެމްބަރުންނަށް އެ އެއްބަސްވުން ހިއްސާކުރާނަން. އިންތިހާބުތަކުގައި ވާދަކުރުމާއި ބެހޭގޮތުން، 3 ޕާޓީ އިން އެއްބަސްވެފައިވާ މާއްދާއެއް މި އެއްބަސްވުމުގައި އޮންނާނެ.
– ކާނަލް ނާޒިމް ވިދާޅުވިއެވެ.
މީގެ އިތުރުން، އެމްއެންޕީ އަކީ އަބަދުވެސް ގައުމުގެ ހެވާއި ލާބައަށް މަސައްކަތްކުރާނެ ޕާޓީއެއް ކަމަށާއި، އެމްއެންޕީ އުފެދިގެން އައީ އެ އަސާސްތަކުގެ މައްޗަށް ކަމަށާއި، އެހެންކަމުން އެގޮތުގައި ދެމިތިބޭނެކަމަށްވެސް ނާޒިމް ވިދާޅުވިއެވެ.
ސިޔާސީ ޕާޓީ އެއްގެ ކުރިމަގު ބިނާކުރުމަށްޓަކައި، އިންތިހާބީ މަގާމުތަކުގައި ވާދަކުރުމުގެ މުހިއްމުކަމުގެ މައްޗަށް އަލިއަޅުއްވާލައްވައި ނާޒިމް ވިދާޅުވީ، އިންތިހާބުތަކުން ބަލިވުމަކީ ސިޔާސީ ޕާޓީއެއްގެ ކުރިމަގު ބަނަވުމެއް ނޫންކަމަށާއި، ސިޔާސީ ޕާޓީއެއް ކުރިއެރުމަށްޓަކައި، އިންތިހާބުތަކުގައި ވާދަކުރުމަކީ ކޮންމެހެންވެސް ކުރަންޖެހޭނެ، އަދި އެހާމެ މުހިއްމު މަސައްކަތެއް ކަމުގައި ދެކިލައްވާ ކަމަށެވެ. އެހެންކަމަށްވުމާއެކު، އެމަނިކުފާނުގެ އެދުމަކީ، ކުރިއަށްހުރި ހުރިހާ އިންތިހާބެއްގައިވެސް އެމްއެންޕީ އިން ވާދަކުރުން ކަމަށް ނާޒިމް ވިދާޅުވިއެވެ.
ޕީޕީއެމް ޕީއެންސީ އާއި އެކު ހެދިފައިވާ އެއްބަސްވުން ޕާޓީގެ ގައުމީ ކައުންސިލް މެމްބަރުންނާއި ވަރަށް އަވަހަށް ހިއްސާކުރައްވާނެ ކަމަށާއި، އަދި ކުރިއަށް ހުރި އިންތިހާބުތަކުގައި ވާދަކުރުމަށް، މިއެއްބަސްވުމުގައި ވާ ކަންތައްތައް ކައުންސިލް މެމްބަރުންނަށް އެންގުމަކީ މުހިއްމު ކަމެއްކަމަށް ގަބޫލުކުރައްވާ ކަމަށްވެސް ނާޒިމް ވިދާޅުވިއެވެ.
