ހުރިހާ އިންތިޚާބެއްގައި ވެސް އެމްއެންޕީން ނިކުންނާނީ ޕީ.ޕީ.އެމް/ޕީ.އެންސީ ކޯލިޝަން އާއި ގުޅިގެން ކަމަށް މިރޭ ބޭއްވި ޕީ.އެން.ސީ ކައުންސިލް ބައްދަލުވުމުގައި ދަނގެތީ ދާޢިރާގެ މެމްބަރު އަދި އެމްއެންޕީގެ ލީޑަރު ކާނަލް ނާޒިމް ވިދާޅުވެއްޖެއެވެ.
އެމް.އެން.ޕީއަށް ކުރަމުން އަންނަ ތުޚުމަތު ތަކަށް ރައްދު ދެއްވާ މިރޭ ބޭއްވި އެޕާޓީގެ ކައުންސިލް ބައްދަލުވުމުގައި ނާޒިމް ވިދާޅުވީ، އެޕާޓީ އަކީ ވަކި ޤައުމެއްގެ ވަކި ބައެއްގެ ޕާޓީއެއް ނޫން ކަމަށާއި އެ ޕާޓީގެ މެމްބަރުންނަކީ މުޅި ޤަޢުމުގެ ބައެއް ކަމަށެވެ.
ނާޒިމް މިހެން ވިދާޅުވެފައިވަނީ އެމް.އެން.ޕީގެ ބައެއް މެމްބަރުން ޕީޕީއެމް/ޕީއެންސީ ކޯލިޝަން އާއެކު އިންތިޚާބުތަކާއި ގުޅޭ ގޮތުން ވެފައިވާ އެއްބަސް ވުމާއި މެދު ކަންބޮނޑުވުން ފާޅު ކުރައްވާތީ އާއި އެކަން ސާފު ނުވާތީ އެކަން ހުރިހާ މެމްބަރުންނަށް ސާފުކޮށްދެއްވަމުންނެވެ.
އެގޮތުން ނާޒިމް ވިދާޅުވީ އިންތިޚާބީ ރައީސް ޑރ.މުހައްމަދު މުޢިއްޒު އާއި އެކު ވެފައިވާ އެއްބަސްވުމުގައި އިންތިޚާބާއި ބެހޭ ޙާއްސަ މާއްދާއެއް އޮންނާނެ ކަމަށެވެ. އަދި އެ މާއްދާގައި ވާގޮތުން މިފަސް އަހަރުގެ ތެރޭގައި ރާއްޖޭގައި ބާއްވާ ހުރިހާ އިންތިޚާބެއްގައިވެސް 3 ޕާޓީން ވާދަ ކުރައްވާނީ ގުޅިގެން ކަމަށް ވިދާޅުވިއެވެ.
އިންތިޚާބެއް ކުރިމަތި ވުމުން ޕްރައިމަރީއެއް ބާއްވަން ޖެހިއްޖެ ނަމަ ޕްރައިމަރީއެއް ބާއްވައި އެ ޕްރައިމަރީ އިން މޮޅުވާ މީހަކަށް ހުރިހާ ޕާޓީ އަކުން ތާއީދު ކުރާނީ.
– ނާޒިމް ވިދާޅުވިއެވެ.
އެންމެ އަވަހަށް ދެން އިންތިޚާބެއް އޮންނާނެ ކަމަށް އިލެކްޝަންސް ކޮމިޝަންސްއިން ނިންމާފައި ވަނީ އަންނަ ޖެނުއަރީ މަހުއެވެ. އެއީ އިންތިޚާބީ ރައީސް ޑރ،މުހައްމަދު މުޢިއްޒު ހުންނެވި މަޤާމް މާލޭގެ މޭޔަރު ކަމުގެ މަޤާމަށް މީހަކު އައްޔަން ކުރުމަށް ބާއްވަން ހަމަޖެހިފައިވާ އިންތިޚާބެވެ. އެއަށްފަހު އިންތިޚާބެއް ބޭއްވުމަށް ހަމަޖެހިފައިވަނީ މާރިޗު ނުވަތަ އޭޕްރީލް ހިސާބުގައި ރައްޔިތުން މަޖިލީހަށް މެމްބަރުން ހޮއްވުމަށް ބާއްވާ އިންތިޚާބެވެ.
މަޖިލިސް އިންތިޚާބުގައި އެމްޑީޕީންވެސް ވަނީ ހުރިހާ ދާއިރާއަކަށް ވާދަ ކުރުމަށް ނިންމާފައެވެ. މަޖިލިސް އިންތިޚާބުގައި ވާދަކުރުމުގެ ޝައުގުވެރިކަން ގިނަ ބަޔަކު ދަނީ ފާޅު ކުރަމުންނެވެ.
