ސަރުކާރުގެ މައި ހޮސްޕިޓަލް، އައިޖީއެމްޗުގައި އުފައްދާފައިވާ މެންޓަލް ހެލްތު ސެންޓަރުގެ ޑޮކްޓަރުންނަށް ނުދެއްކި ހަ ސަތޭކައަށްވުރެ ގިނަ ބަލި މީހުން ތިބިކަމަށް އެ ހޮސްޕިޓަލުން ބުނެފިއެވެ.
އައިޖީއެމްއެޗުން ބުނީ މިހާތަނަށް ޑޮކްޓަރަށް ނުދެއްކި 662 މީހުން އެބަތިބިކަމަށެވެ. ޑޮކްޓަރަށް ދެއްކުމަށް ކިއުގައި ޖެހުމުން މަހެއްހާ ދުވަހުގެ ތެރޭގައި ޑޮކްޓަރަށް ދެއްކޭނެކަމަށް އައިޖީއެމްއެޗުން ބުންޏެވެ.
"ނޭޝަނަލް މެންޓަލް ހެލްތު ޑިޕާޓްމަންޓް"ގެ ނަމުގައި ސަރުކާރުގެ އިދާރާއެއް އުފެއްދީ މިދިޔަ އަހަރުގެ ޑިސެމްބަރު މަހުގެ ތެރޭގައެވެ.
ނެޝަނަލް މެންޓަލް ހެލްތު ޑިޕާޓްމަންޓަކީ މި ދާއިރާ އިތުރަށް ހަރުދަނާކޮށް، މިކަމާއި ގުޅޭ ސިޔާސަތުތައް ކަނޑައަޅާ ތަންފީޒުކުރުމުގައި އިތުރަށް ބާރުއެޅުމަށް އުފެއްދެވި ޑިޕާޓްމަންޓެކެވެ.
ނޭޝަނަލް މެންޓަލް ހެލްތު ޑިޕާޓްމަންޓް ޤާއިމުކުރުމުގެ މަޤުޞަދުތަކުގެ ތެރޭގައި ދިވެހިރާއްޖޭގައި ނަފްސާނީ ދުޅަހެޔޮކަން ކުރިއަރުވައި، ނަފްސާނީ ދުޅަހެޔޮކަމަށް މުޖުތަމަޢު އަހުލުވެރިކޮށް، ނަފްސާނީ ސިއްޙަތުގެ ދާއިރާއިން ހިންގާ ޕްރޮގްރާމްތައް ކަނޑައެޅުން ހިމެނެއެވެ. އަދި ނަފްސާނީ ސިއްޙަތުގެ ދާއިރާގެ ސިޔާސަތުތަކާއި ލަނޑުދަނޑިތައް ޙާޞިލްކުރުމަށް ހިންގާ ޕްރޮގްރާމްތަކާއި ކުރެވޭ މަސައްކަތްތައް ވިލަރެސްކޮށް، ޞިއްޙީ ޚިދުމަތްދޭ ސަރުކާރުގެ ތަންތަނުން ނަފްސާނީ ޞިއްޙަތުގެ ޚިދުމަތްތައް ފޯރުކޮށްދޭކަން ކަށަވަރުކުރުން ހިމެނެއެވެ.
ނަފްސާނީ ޞިއްޙަތާއި ގުޅުންހުރި މަސައްކަތްތައް ކުރާ އަމިއްލަ ފަރާތްތަކާއި ޖަމުޢިއްޔާތަކާއި ޖަމާޢަތްތަކާއި ގުޅުން ބަދަހިކޮށް އެ ފަރާތްތަކުގެ އެއްބާރުލުން ހޯދައި، އެފަރާތްތަކުން ކުރާ މަސައްކަތްތަކަށް ބޭނުންވާ ފަންނީ އެހީތެރިކަމާއި ލަފާދިނުމަކީވެސް މިޑިޕާޓްމަންޓް އުފެއްދުމުގެ މުހިންމު މަޤުޞަދެކެވެ.
