ވެލެންސިޔާގެ މިހާރު މިއޮތް ޓީމާއެކު ރަނގަޅު ހިސާބެއްގައި ނިންމާލެވޭނެ ކަމުގެ ޔަގީންކަން އެބައޮތްކަމަށް ކުލަބް ވެލެންސިޔާގެ ކޯޗު މުހަންމަދު އާތިފް (އާތީ) ބުނެފިއެވެ.
އާ ސީޒަނަށް ވެލެންސިއާގެ ތައްޔާރީތަކާ ބެހޭގޮތުން ނޫސްވެރިންގެ ބައްދަލުވުމުގައި ވާހަކަ ދައްކަމުން އާތީ ބުނީ އޮކްޓޫބަރު މަހު ވެލެންސިއާ އިން ޕްރީ ސީޒަން ޕްރެކްޓިސް ފެށިއިރު ކޮންމެވެސް ވަރަކަށް ޓީމަށް އާ ކުޅުންތެރިންތަކެއް ލިބުނު ކަމަށާއި އެހެން ނަމަވެސް މިދިިޔަ މަހެއްހާ ދުވަސްތެރޭ ޓީމުގެ މެނޭޖްމަންޓުން ކުޅުންތެރިން ހޯދުމުގައި ކުރި މަސައްކަތުން ލީގުގައި ރަނގަޅު ޗެލެންޖެއް ދެވޭނެ ޓީމެއް އެކުލަވާލެވިފައިވާ ކަމަށް ގަބޫލުކުރާކަމަށެވެ.
އަޅުގަނޑަށް ދަންނަވަން ނޭނގެ ފުރަތަމަ މެޗު ނޫނީ ދެ ވަނަ މެޗު އަޅުގަނޑުމެން ބޭނުންވާ ހިސާބަށް އަންނާނެއެކޭ. އަޅުގަނޑުމެންނަށް ވަރަށް ޔަގީންކަމާ އެކީ އެނގޭ މިހާރު މި އޮތް ޓީމަކީ މި ލީގު ނިމޭއިރު ރަނގަޅު ހިސާބަކަށް ދެވޭނެ ޓީމެއްކަން.
– އާތީ ބުނެފައިވެއެވެ.
އާތީ ބުނީ ފުރަތަމަ ޑިވިޝަނުގައި ވާދަކުރާއިރުގައި މާޒިޔާ އާއި އީގަލްސް އަދި ގްރީން ސްޓްރީޓްސް ފަދަ ރަނގަޅު ލެވަލްގެ އެކުގައި ކުޅެފައި ތިބި ކުޅުންތެރިންތަކެއް ވެލެންސިއާ އަށް ވެސް ބޭނުންވާ ކަމަށާއި މިހާރު އެ ފަދަ ސްކޮޑެއް ބިނާކުރެވޭނެ ކަމުގެ އުއްމީދު އެބައޮތް ކަމަށެވެ.
މިހާރު މުބާރާތުގެ ފުރަތަމަ މެޗު އަންނަން ހަފްތާ އަކަށްވީއިރު މި އޮތީ ފުރަތަމަ ޑިވިޝަނުގެ ޓީމުތަކާ ޗެލެންޖް ކުރެވޭނެ ވަރުގެ ސްކޮޑެއް. އެހެން ނަމަވެސް ސްކޮޑެއް އޮތުމަކީ ނިމުމެއް ނޫން. މީގެ ކޮމްބިނޭޝަން ބޭނުން. ފިޓްނަސް ލެވަލް ބޭނުން."
– އާތީ ބުނެފައިވެއެވެ.
މިދިޔަ ސީޒަނުގެ ދެ ވަނަ ޑިވިޝަނުގެ ޗެމްޕިއަންކަން ހޯދައި އަލުން ފުރަތަމަ ޑިވިޝަނަށް ޕްރޮމޯޓްވި ވެލެންސިއާ އިން ވަނީ މި ފަހަރުގެ ޓްރާންސްފާ ބާޒާރުގައި ރަނގަޅު މަސައްކަތްތަކެއްކޮށް ފެންވަރު ރަނގަޅު ކުޅުންތެރިންތަކެއްގެ ސޮއި ހޯދައިފަ އެވެ. ވެލެންސިއާ އިން ގެނައި ފާހަގަކޮށްލެވޭ ކުޅުންތެރިންނަށް ބަލާއިރު ރާއްޖޭގައި އުފެދުނު އެންމެ މޮޅު ކުޅުންތެރިޔާ އަލީ އަޝްފާގު (ދަގަނޑޭ) އާއި ރާއްޖޭގެ މޮޅު ކުޅުންތެރިޔާގެ މަގާމު ދެ ފަހަރެއްގެ މަތިން ހޯދި އަލީ ފާސިރު (ސެންޓޭ) އާއި ގައުމީ ޓީމުގެ ގޯލްކީޕަރު މުހައްމަދު ފައިސަލް އާއި ފުރަތަމަ ޑިވިޝަނުގައި ރަނގަޅު ކުޅުމެއް ދައްކާފައިވާ އަހުމަދު އިމާޒް (އާއްކޮ) އަދި ކުރިން ގައުމީ ޓީމުން ފެނުނު ހުސެއިން ނިޔާޒް މުހައްމަދު (ބޮކުރީ) އާއި ޓީސީ ސްޕޯޓްސް ކްލަބް ދޫކޮށް އަލުން ވެލެންސިއާއާ ގުޅުނު ގައުމީ ޓީމުގެ ކެޕްޓަން އަދި މިސީޒަންގައި ވެލެންސިއާގެ ވެސް ކެޕްޓަން އަކުރަމް އަބްދުލް ގަނީ ހިމެނޭ އެވެ.
ވެލެންސިއާ ލީގުގައި ކުޅޭ ފުރަތަމަ މެޗުގައި ހޯމަ ދުވަހުގެރޭ ބައްދަލުކުރާނީ ކްލަބް ގްރީން ސްޓްރީޓްސްއާއެވެ.
ކޮމެންޓު ފޮނުވާ