ފަލަސްތީނުގެ ހަމާސް ޖަމާއަތުން ގާޒާއަށް ދެމުންދާ ރޮކެޓް ހަމަލާތަކާއި، މުޖާހިދުން ގާޒާގެ ބޯޑަރު ހުރަސްކޮށް އިސްރާއީލަށް ވަދެގަނެ ދިން ހަމަލާތަކުގައި އިސްރާއީލުގެ އެތައް ސަތޭކަ މީހުން މަރުވުމާއިގުޅިގެން ބަދަލު ހިފުމުގެ ގޮތުން ޔަހޫދީ ސިފައިން ގާޒާއަށް ދެމުންދާ އުދުވާނީ ހަމަލާތަކުގައި ޝަހީދުވި ފަލަސްތީނު މީހުންގެ އަދަދު 704 އަށް އަރައިފިއެވެ.
ފަލަސްތީނު އޮތޯރިޓީގެ ހެލްތު މިނިސްޓްރީން ހާމަކޮށްފައިވާ ގޮތުގައި މީގެ ތެރެއިން 687 މީހުން ޝަހީދުވެފައިވަނީ އިސްރާއީލުގެ އަސްކަރިއްޔާއިން ގާޒާއަށް ދެމުންދާ ބޮމުގެ ހަމަލާތަކުގައެވެ. މީގެ ތެރޭގައި 140 ކުޑަ ކުދިންނާއި 105 އަންހެނުންވެސް ހިމެނެއެވެ.
އޭގެ އިތުރުން 17 މީހަކު ޝަހީދުވެފައި ވަނީ ހުޅަނގު އައްސޭރީގެ ހިފާފައިވާ ބިންތަކުގައެވެ. އަދި ހުޅަނގު އައްސޭރީގައި ފަލަސްތީނުގެ 90 މީހަކަށްވަނީ އަނިޔާވެސް ވެފައެވެ.
ހަމައެއެކު އިސްރާއީލުގެ ރަސްމީ ފަރާތްތަކުން ހާމަކޮށްފައިވާ ގޮތުގައި ފާއިތުވި ހޮނިހިރު ދުވަހު ހަމާސް ޖަމާއަތުން އިސްރާއީލަށް ދީފައިވާ ހައިރާންކުރުވަނިވި ހަމަލާތަކުގައި މިހާތަނަށް މަރުވެފައިވާ އެގައުމުގެ މީހުންގެ އަދަދު މިހާރުވަނީ 900 އަށް އަރާފައި ކަމުގައެވެ. އޭގެ ތެރޭގައި މިއުޒިކް ފެސްޓިވަލަކަށް ހަމަލާދީ މަރާލި އިސްރާއީލުގެ 250 އާންމުންވެސް ހިމެނެއެވެ.
މިހަމަލާތަކަށްފަހު ހަމާސް ޖަމާއަތުން ވަނީ އިސްރާއީލުގެ ގިނަ އަދަދެއްގެ މީހުން ރަހީންވެސް ކޮށްފައެވެ. ހަމާސް ޖަމާއަތުން މިހާރު އިންޒާރު ކޮށްފައިވާގޮތުގައި، އިސްރާއީލުގެ އަސްކަރިއްޔާއިން ގާޒާއަށް ދެމުންދާ ބޮމުގެ ހަމަލާތަކުގެ ތެރެއިން، ކުރިން އިންޒާރު ދިނުމަކާނުލާ ދޭ ބޮމުގެ ކޮންމެ ހަމަލާއަކަށް، ހަމާސްއިން ރަހީން ކޮށްފައިވާ ހޮސްޓެޖުންގެ ތެރެއިން މީހަކު މަރާލާނެ ކަމުގައެވެ.
އިސްރާއީލުގެ ބޮޑުވަޒީރު ބެޖަމިން ނަތަންޔާހޫ ވިދާޅުވެފައިވަނީ މިހާރު ގާޒާއަށް ދެމުންދާ ބޮމުގެ ހަމަލާތަކަކީ އަދި ފެށުމެއް ކަމުގައެވެ. އޭނާ އިތުރަށް ވިދާޅުވެފައިވަނީ ހަމާސްޖަމާއަތުގެ މުޖާހިދުން އަދިވެސް އިސްރާއީލުގެ އެތެރޭގައި ހަރަކާތްތެރިވަމުން ދާކަމުގައެވެ.
