ހުކުރު ދުވަހަކީ ހަމަ އާދައިގެ މަތީން އެހެން ދުވަސްތަކެކޭވެސް އެއްގޮތަށް ދުވަހުގެ ފެށުން ފެށިގެން އައި ދުވަހެކެވެ. މިނިސްޓަރ އަމީންގެ ބައްޕަ އަހުމަދު މަނިކަކީ ދީނީ ކަންކަމަށް ލޯބި ކުރައްވާ ފަރުޟު ފަސްނަމާދު ގަޑިން ގަޑިއަށް އަދާކުރައްވާ އަޅުވެރިއެވެ. ހަމަ އެހެންމެ ޢާއިލީ ލޯތްބާއި، އާއިލީ ގުޅުން ދެމެހެއްޓުމުގެ ލާމަސީލު ނަމޫނާއެވެ. އުފަން ރަށް ގދ. ގައްދޫގެ ރައްޔިތުންވެސް އަހުމަދު މަނިކު ސިފަ ކުރައްވަނީ ގާތް އެކުވެރި މަޖާ މިޒާޖެއްގެ މިތުރެއްގެ ގޮތުގެވެ.
އަހުމަދު މަނިކު ގިނަ ވަގުތު ހޭދަކުރައްވަނީ އަނބިކަނބަލުންނާއި ކާފަދިންނާއިއެކު ގޭގައެވެ. އަމިއްލަ ދަރިން ތަރުބިއްޔަތު ކުރި ބީދައިން ކާފަދަރިންނަކީވެސް ރަނގަޅު ތަރުބިއްޔަތެއް މަތީ ތަރުބިއްޔަތުވާ ދަރިންތަކަށް ހެދުމަށް އަހުމަދު މަނިކުގެ ހުރިހާ ވަގުތެއް ހޭދަ ކުރެއްވިއެވެ.
މިދިޔަ ހުކުރު ދުވަހަކީވެސް ހަމަ މިބީދައިން ދުވަހުގެ ފެށުމާއި ހަމައިން އެރޭގެ މަޢުރިބު ނަމާދަށް، ނޫރު މިސްކިތާއި ހަމައަށް ދިއުމާއި ހަމައަށްވެސް އާއިލީ އުފަލުގައި އަހުމަދު މަނިކު ވަގުތު ހޭދަކުރެއްވި ދުވަހެކެވެ.
ޢާންމުކޮށް އަހުމަދު މަނިކު މަޢުރިބަށް ވަޑައިގެން ގެއަށް ވަޑައި ގަންނަވަނީ އިޝާނަމާދުވެސް ކުރައްވައިގެންނެވެ. ދެނަމާދު ދެމެދު އާންކޮށް އަހުމަދު މަނިކު ވަގުތު ހޭދަ ކުރައްވަނީ މިސްކިތުގައެވެ.
އާދައިގެން މަތީން އެރޭވެސް ނަމާދަށް ވަޑައިގެން އަހުމަދު މަނިކު ގެއަށް ވަޑައިގެންނެވީ އިޝާނަމާދަށްފަހު ސައިކަލުގައެވެ. އަހުމަދު މަނިކު ދިރިއުޅުއްވަނީ ބޮޑު ތަކުރުފާނު މަގު ރައީސް ޔާމީން ދިރިއުޅުއްވާ ގެއާއި ޖެހިގެން ހަމަ އެބްލޮކުގައިި ހުންނަ ހ. ޝީރީން ވިލާގައެވެ. ގެއަށް ވަޑައިގެންނެވި މަގުމަތީގައި ކުއްލިއަކަށް ހިނގާދިޔަ ނުރައްކާތެރި އެކްސިޑެންޓަކީ އަހުމަދު މަނިކު ތާއަބަދަށް ވަކިވާން މެދުވެރި ހިތާމަވެރި ހާދިސާއެވެ. އިޝާ ނަމާދު ނިންނާމަ ބޮޑުތަކުރު ފާނުމަގުން ސައިކަލުގަ ގެއަށް ދުއްވާފަ ދަނިކޮށް، ބާރަށް ދުވާފަ އައި ކާރަކުން އަހުމަދު މަނިކު އާދައިގެ ސްޕީޑެއްގައި ދުއްވާފަ އައި ސައިކަލުގައި ޖެހި، ދުއްވަމުން އައި ސައިކަލުމަތިން އަހުމަދު މަނިކު ވެއްޓުނީ އަގަ ވަތަށެވެ.
އެހާދިސާ ހިގައިދިޔައީ ހެންވޭރުކޮޅުގަ، ބޮޑުތަކުރުފާނު މަގުގައި ހުންނަ ޕީޕީއެމް އޮފީސް ކުރުމަތިން ކަމަށްވުމާއެކު، އެވަގުތު ގިނަބަޔަކު އެސަރަހައްދަށް ޖަމާވެފައި ވެއެވެ. ދުއްވަމުން އައި ސައިކަލުން ބުރައިގެން ގޮސް އަހުމަދު މަނިކު މަގުމައްޗަށް ވެއްޓިފައި، ހަރަކާތް ހުއްޓިފައި އޮތް މަންޒަރު އެވަގުތު އެތައް ބަޔަކު ފޮޓޯވެސް ނަގާހަދާފައި ވެއެވެ.
އެހާދިސާ ހިނގިތާ ގިނަ އިރުތަކެއް ނުވަނީސް، ހާދިސާ ހިނގި ސަރަހައްދުގައި ތިބި ގިނަބައެއްގެ އެހީތެރިކަމާއެކު އަހުމަދު މަނިކު ވަނީ އެމްބިއުލާންސްގައި ހޮސްޕިޓަށް ގެންގޮސްފައެވެ.
އަހުމަދު މަނިކަކީ އެސަރަހައްދުގައި އުޅޭ ގިނަ މީހުންވެސް ދަންނަ މޫނަކަށް ވުމާއެކު، އަހުމަދު މަނިކު އެކްސިޑެންޓުވެ ހޮސްޕިޓަކަށް ގެންދިޔަކަން އާއިލާއަށް އެނގިފައިވަނީ، އެއީ ކުރީހެ މިނިސްޓަރު އަމީން، އަދި ކުރީގެ މެމްބަރު އަމީތުގެ ބައްޕަކަން އެގި އަމީތަށް މީހަކު ގުޅާ ބައްޕަ ހޮސްޕިޓަލަށް ގެންދިޔަ ވާހަކަ ބުނުމުންނެވެ.
ނަމަވެސް އެދުވަހަކީ ބްރިޖުމަތީގައިވެސް އެކްސިޑެންޓެއްވެ މުޅި ބްރިޖު ބްލޮކްވި ދުވަހަށްވެސް ވުމުން، އަމީތު ކިޔައިދިން ގޮތުގައި އޭނާއަށް ގުޅާ ބައްޕަ އެކްސިޑެންޓްވެގެން ހޮސްޕިޓަލަށް ގެންދިޔަކަމަށް މީހަކު ބުނުމުން އަމީތަށްވެސް ފުރަތަމަ އެކަން ގަބޫލު ނުކުރެވުނެވެ. އަމީތު ކިޔައިދިން ގޮތުގައި ބައްޕަ އެކްސިޑެންޓްވި ވާހަކަ މީހަކު ގުޅާފަ ބުނުމުން އެންމެ ފުރަތަމަ ހީކުރެވުނީ، އެއީ ބައްޕަކަމަށް ހީކޮށް ބުރިޖް މަތީގައި އެދުވަހި ވީ އެކްސިޑެންޓުގެ ވާހަކަ ކަމުގައެވެ.
ނަމަވެސް ފަހުން ބައްޕަގެ ފޯނަށް ގުޅުމުން ބައްޕަ އޮތީ ހޮސްޕިޓަލުގެ އީއާރުގައި ކަމަށް، ފޯނު ނެގި އައިޖީއެމް ހޮސްޕިޓަލުގެ ނަރުސް ކުއްޖަކު އާއިލާއަށް މައުލޫމާތު ދިނެއެވެ. އެއާއިއެކު އަހުމަދު މަނިކު ހޮސްޕިޓަލަށް ގެންދިޔަތާ ފަސް ވަރަކަށް މިނިޓް ނުވަނީވެސް އަމީތާއި، އަމީން ވަނީ ހޮސްޕިޓަލަށް ގޮސްފައެވެ. ހޮސްޕިޓަލަށް ދިޔައިރުވެސް އެކްސިޑެންޓަކީ އެހާ ބޮޑު އަދި ބައްޕަގެ ފުރާނައަށް ނުރައްކާވާފަދަ އެކްސިޑެންޓަކަށް ވެދާނެކަމަށް ކުޑަކޮށްވެސް ވިސްނިފައި ނުވެއެވެ.
ހޮސްޕިޓަލަށް ގެންދިޔައިރުވެސް އަހުމަދު މަނިކު ހޭނާރައެވެ. އައިޖީއެމްޗާއި، އޭޑީކޭގެ ޑޮކްޓަރުންވެސް އަހުމަދު މަނިކަށް ފަރުވާ ދިނުމުގައި ވަރަށް ގާތުން ވަނީ މަސައްކަތް ކުރައްވާފައެވެ. އައި އެމަރޖެންސީގައި އަހުމަދު މަނިކަށް ފަރުވާ ދިނުމަށްފަހު، އައިޖީއެމްއެޗްގައި ހެދި ސީޓީ ސްކޭންތަކަށްފަހު ހަމަ އެރޭ އައިޖީއެމްއެޗް އަދި އޭޑީކޭގެ ޑޮކްޓަރުން އާއިލާއަށް މައުލޫމާތު ދިނީ، އެކްސިޑެންޓުގައި އަހުމަދު މަނިކުގެ ބޮލަށް ލިބުނު ގެއްލުންތަކުގެ ސަބަބުން ސިކުނޑިއަށް ލޭހިގާ، ސިކުނޑި މަރުވެފައިވާކަމުގެ ހިތާމަވެރި ޚަބަރެވެ.
އެއާއެކު ޑޮކްޓަރުން ބޭނުންވީ، އެކްސިޑެންޓުގައި އަހުމަދު މަނިކުގެ ބޮލަށް ލިބިފައިވާ އަނިޔާގެ ސަބަބުން އަހުމަދު މަނިކަށް ފަރުވާ ދިނުމަށް އައިސޫއަށް ބަދަލު ކުރުމަށެވެ. އެއަށްފަހު ޖެހިގެން އައި ދެދުވަހު އަހުމަދު މަނިކަށް ފަރުވާ ދެމުންގޮސްފައިވަނީ އައިޖީއެމްއެޗް އަައިސީޔޫގައެވެ. ޑޮކްޓަރުން އުއްމީދު ކަނޑާލާފައި އޮތް ނަމަވެސް، އާއިލާއިން ދިޔައީ، ކޮންމެވެސް އަލިމަގެއް ފެނި، އަހުމަދުމަނިކު ދިރި ދުނިޔޭގައި ހުންނާނޭކަމުގެ އުއްމީދު ކުރަމުންނެވެ. އެހެންނަމަވެސް ފަރުވާ ދެމުން ދަނިކޮށް، އައިލާގެ 4 ކުދިންގެ ބައްޕަ ނިޔާވީ ހޮނިހިރު ދުވަހުރޭ ދަންވަރު 2:50 ގައެވެ.
އަހުމަދު މަނިކުގެ ވަކެވެ ދިއުމަކީ މުޅި އާއިލާއަށާއި، ގާތް އެކުވެރިންނާއި ގައްދޫގެ ރައްޔިތުންނަށްވެސް ގަބޫލު ކުރަން ދަތިވި ކުއްލި ވެކިވެދިއުމަށް ވަނީ ވެގެން ގޮސްފައެވެ.
އަހުމަދު މަނިކުގެ ކުއްލި ވަކިވެ ދިއުމާއިއެކު އެންމެ ދޮށީ ދަރިފުޅު އަދި އެކި ސަރުކާރު ތަކުގައި ވަޒީރުކަމާއި، ސަރުކާރުގެ އިސް މަޤާމުތައް ފުރުއްވާފައިވާ، ކުރީގެ މިނިސްޓަރު އަމީން ވިދާޅުވީ ބައްޕައަކީ ތަރުބިއްޔަތުގެ މޭސްތިއެއް ކަމަށެވެ. އަދި ޢާއިލީ ގުޅުމާއި، ޢާއިލީ ލޯބީގައި ބައްޕަ އަކީ އެފަދަ ދެވަނައެއް ނެތް ނޫމޫނާއެއް ކަމަށް އަމީން ވިދާޅުވިއެވެ. ވަކިން ޚާއްސަކޮށް ދީނީ ކަންކަމަށް ފަރުވާތެރި ދީން ވެރި ބޭފުޅެއް ކަމުގައި ވަނީ އަމީން ބައްޕަ ސިފަކުރައްވާފައެވެ.
ބައްޕައަކީ ތަރުބިއްޔަތުގެ މޭސްތިރިއެއް. ދީންވެރި، ޢިލްމަށް ލޯބިކުރި އެދުރެއް. ކެތްތެރިކަމާއި ޙިކުމަތްތެރިކަމުގެ ތަނބެއް. އާއިލީ ލޯބީގެ ދެވަނައެއް ނެތް ނަމޫނާއެއް. ހިތްހެޔޮ އެކުވެރިއެއް.
– އަމީން ވިދާޅުވިއެވެ.
އަމީންގެ އިތުރުން ދަރިކަލުން އަމީތުވަނީ ބައްޕަގެ ވަކިވެ ދިއުމާއިއެކު ހެޔޮ ދުޢާކޮށް ތައުޒިޔާ ދެންނެވި އެންމެހާ ފަރާތްތަކަށް ޝުކުރު އަދާކުރައްވާފައެވެ. ރައްޔިތުންގެ މަޖިލިހުގެ މަޑުއްވަރި ދާއިރާގެ ކުރީގެ މެމްބަރު އަމީތަކީ ޖަޕާނުގެ ޑެޕިއުޓީ އެމްބަސަޑަރެއްގެ މަޤާމު ފުރުއްވަމުން ގެންދަވާ ބޭފުޅަކަށް ވީނަމަވެސް އަމީތު މި ދުވަސްކޮޅު ހުންނެވީވެސް ޗުއްޓީގައި ރާއްޖޭގައެވެ.
ބައްޕައަށް ކުއްލި ގޮތަކަށް ކުރިމަތިވި އެކްސިޑެންޓާއި ގުޅިގެން ހެޔޮދުޢާ ކޮށްދެއްވި އެންމެހާ ފަރާތްތަކަށް ވަރަށް އިޚްލާސްތެރިކަމާއެކު ޝުކުރު ދަންނަވަން.
– އަމީތު ވިދާޅުވިއެވެ.
އަހުމަދު މަނިކުގެ ޖަނާޒާ އިއްޔެ އަސްރު ނަމާދަށްފަހު ހުޅުމާލޭ ސަރަހާގައިވަނީ ބާއްވާފައެވެ. ޖަނާޒާގައި ނައިބް ރައީސް ފައިސަލް ނަސީމާއި އެތައް ސަތޭކަ ޢާންމު ރައްޔިތުން ވަނީ ބައިވެރިވެފައެވެ. އަދި މޫނު ދެކިލުމަށް ދައުލަތުގެ އިސްވެރިންނާއި ގިނަ އަދަދެއްގެ ރައްޔިތުން ވަނީ ވަޑައިގެންފައެވެ.
މިވަގުތު އަހުމަދު މަނިކުގެ 4 ދަރިންވެސް އެދެނީ ވީހާވެސް ގިނަ ބައެއްގެ ހެޔޮ ދުޢާ ބައްޕައަށް ކޮށް ދެއްވުމެވެ.
މި ފުރުސަތުގައި ޚަބަރު އޮންލައިންގެ ފަރާތުންވެސް މަރުޚޫމް އަހުމަދު މަނިކުގެ ފުރާނަފުޅަށް ސުވަރުގޭގެ ދާއިމީ ނިއުމަތް މިންވަރު ކުރައްވައި ޢާއިލާއަށް ކެތްތެރިކަން ދެއްވުން އެދި ދުޢާކުރަމެވެ.
